- 2018-12-05 09:50:26
- ការអប់រំ
ហេតុផលមួយចំនួន ដែលយុវជនគួរតែធ្វើការស្ម័គ្រចិត្តឲ្យបានច្រើន
- 2018-12-05 09:50:26
- ចំនួនមតិ 0 | ចំនួនចែករំលែក 0
ហេតុផលមួយចំនួន ដែលយុវជនគួរតែធ្វើការស្ម័គ្រចិត្តឲ្យបានច្រើន
ចន្លោះមិនឃើញ
ការងារស្ម័គ្រចិត្តជាសកម្មភាពការងារមួយ ដែលមិនមានគោលបំណងទាញយកប្រាក់ចំណូល និងមានគោលដៅជួយអង្គភាព និងសហគមន៍ណាមួយ។ ការងារស្ម័គ្រចិត្ត ត្រូវបានគេឲ្យតម្លៃជាសកល នៅទូទាំងពិភពលោក ហើយកម្លាំងដែលចូលរួមច្រើនជាងគេ គឺជាយុវជន។
ដោយឡែកនៅប្រទេសកម្ពុជា ការងារស្ម័គ្រចិត្តត្រូវបានជំរុញយ៉ាងខ្លាំងពីសំណាក់ រាជរដ្ឋាភិបាល និងអង្គការជាតិ អន្តរជាតិនានា ក្នុងគោលបំណងអភិវឌ្ឍន៍ធនធានមនុស្សជាសំខាន់។
ការងារស្ម័គ្រចិត្តមានគុណសម្បត្តិ បីយ៉ាង ដែលពិភពលោកឲ្យតម្លៃយ៉ាងខ្លាំង ទីមួយ គឺអភិវឌ្ឍន៍ចំណេះដឹងផ្ទាល់ខ្លួន រួមមាន បង្កើនជំនាញវិជ្ជាជីវៈ បង្កើនទំនាក់ទំនងក្នុងសង្គម និងមានភាពក្លាហាន។ ទីពីរ គឺ ជួយដល់សហគមន៍ ដែលកំពុងប្រឈមមុខនឹងបញ្ហា ដូចជាបញ្ហាអនក្ខរកម្ម អនាម័យ សុខាភិបាល កសិកម្ម និងវប្បធម៌ជាដើម។ ទីបី គឺ កសាងកេរឈ្មោះនៅក្នុងសង្គម កត្តានេះមានសារៈសំខាន់ ដើម្បីជួយឲ្យយុវជនមានឱកាសទូលំទូលាយក្នុងវិស័យការងារជាតិ និងអន្តរជាតិ។ ឯកឧត្ដម តូច ជឿន អគ្គនាយកនៃអគ្គនាយកដ្ឋានយុវជន ក្រសួងអប់រំ យុវជន និងកីឡាមានប្រសាសន៍ទៅកាន់យុវជនថា ការងារស្ម័គ្រ គឺជាសកលវិទ្យាល័យបើកចំហ (Opening University) យុវជនគ្រប់រូបអាចចូលរៀនបានគ្រប់ពេលវេលា គ្រប់ទីកន្លែង ដោយមិនបង់ថ្លៃ ដើម្បីអភិវឌ្ឍន៍ខ្លួន និងមានឱកាសជួយសង្គមដោយផ្ទាល់។
លោកស្រី ផលីន ថាមេស៊ីស (Pauline Tamesis) តំណាងអង្គការសហប្រជាជាតិប្រចាំនៅកម្ពុជា ថា ឱកាសការងារនៅតាមបណ្ដាស្ថាប័នរដ្ឋ និងឯកជនសម្រាប់និស្សិត ដែលធ្លាប់ធ្វើការងារស្ម័គ្រចិត្តទូលាយជាង និស្សិតដែលមិនធ្លាប់ធ្វើការស្ម័គ្រចិត្ត ព្រោះថា ការងារស្ម័គ្រចិត្តឆ្លុះបញ្ចាំងថា យុវជនរូបនោះធ្លាប់មានបទពិសោធន៍ការងារ មានទំនាក់ទំនងល្អ និងមានឆន្ទៈខ្ពស់ក្នុងការងារ។
ចំណែកឯ លោក ហ្គុយលូម សវ៉ាល់ (Guillaume Sauval) មកពីអង្គការ SVO ជាអង្គការផ្ដល់សេវាកម្មផ្នែកការងារស្ម័គ្រចិត្ត បានបង្ហាញពីបច្ចេកទេសមួយចំនួន ដើម្បីធ្វើការងារស្ម័គ្រចិត្តបានល្អ និងមានប្រសិទ្ធភាព។ យុវជនដែលមិនទាន់មានបទពិសោធន៍លើការងារស្ម័គ្រចិត្ត ពួកគេអាចបន្សាំខ្លួនបន្តិចម្ដងៗ តាមសកម្មភាពស្ម័គ្រចិត្តតូចៗ និងខ្លីៗ ឲ្យបានច្រើន និងស្វែងរកឱកាសចូលរួមការងារស្ម័គ្រធំៗ ដែលត្រូវនឹងជំនាញរបស់ខ្លួន ដោយទទួលការដឹកនាំ បង្ហាត់បង្ហាញ ពីអ្នកស្ម័គ្រចិត្តដែលមានបទពិសោធន៍។ មួយទៀតគឺធ្វើការជាមួយដៃគូ ដែលមានបទពិសោធន៍ មកពីបរទេស ឬអ្នកស្ម័គ្រចិត្តនៅក្នុងសហគមន៍ផ្ទាល់។ យុវជនដែលមានបទពិសោធន៍ធ្វើការងារស្ម័គ្រចិត្តម្នាក់ គឺ ពុទ្ធ វិបុលវឌ្ឍនា បានប្រាប់ថា ការងារស្ម័គ្រចិត្ត ដែលបានធ្វើកន្លងមក បានបង្រៀនគាត់ឲ្យយល់ច្រើនពីបញ្ហាសង្គម ទំហំនៃតម្រូវការសង្គម និងអ្វីដែលខ្លួនគាត់ផ្ទាល់អាចធ្វើបានសម្រាប់សង្គម។ យុវជនរូបនេះបានលើកទឹកចិត្តឲ្យយុវជនកម្ពុជាចូលរួមការងារស្ម័គ្រចិត្តឲ្យបានច្រើនតាមលទ្ធភាព ព្រោះវាមានគុណសម្បត្តិច្រើនយ៉ាងដូចបានរៀបរាប់ខាងដើម។
ត្រលប់ទៅប្រសាសន៍ ឯកឧត្ដម តូច ជឿន វិញលោកថា បញ្ហាកំពុងប្រឈមនាំឲ្យសកម្មភាពការងារស្ម័គ្រចិត្តនៅមានកម្រិតនោះមានបីសំខាន់ៗ ទីមួយ ធនធានមនុស្ស សំដៅដល់ចំណេះដឹងក្នុងការងារស្ម័គ្រចិត្ត។ ទីពីរបញ្ហាហិរញ្ញវត្ថុ ដែលហាក់ដូចជានៅមិនទាន់សម្បូរបែបនៅឡើយ និងទីបី គឺឱកាស ដែលសំដៅដល់ព័ត៌មានផ្សេងៗ ស្ដីពីការងារស្ម័គ្រចិត្ត និងលទ្ធភាពចូលរួមរបស់យុវជន។
យ៉ាងណាក៏ដោយក្នុងឆ្នាំ ២០១៨ នេះ យុវជនដែលបានចូលរួមក្នុងការងារស្ម័គ្រចិត្តមានចំនួនរហូតដល់ជាង ៦ពាន់នាក់ ដែលមិនរាប់បញ្ចូលនូវសកម្មភាពស្ម័គ្រចិត្តខ្លីៗ រាប់ពាន់នាក់ទៀតនោះទេ។ នេះបើតាមការឲ្យដឹងពីអ្នកគ្រប់គ្រងគម្រោង នៃអង្គការសហប្រជាជាតិទទួលបន្ទុកផ្នែកការងារស្ម័គ្រចិត្ត (UN Volunteer) លោក ឃ្លឺក លីវ (Clark Liu)។ តាមរយៈកិច្ចសហការរវាង UNV និងក្រសួងអប់រំ យុវជន និងកីឡា ឯកឧត្ដម តូច ជឿន និង លោក Clark សង្ឃឹមថា ឆ្នាំ ២០១៩ ខាងមុខនេះ នឹងមានយុវជនកម្ពុជាប្រមាណជា ច្រើនជាង ៦ពាន់នាក់បន្ថែមទៀតនឹងត្រូវបានចូលរួមការងារស្ម័គ្រចិត្ត៕