- 2018-12-18 02:42:02
- ការអប់រំ
អាយុ២៣ឆ្នាំ ធ្វើបាន៧យ៉ាងនេះ មុនឆ្នាំ២០១៩មកដល់ ទុកថាជាមនុស្សអស្ចារ្យបំផុតហើយ
- 2018-12-18 02:42:02
- ចំនួនមតិ 0 | ចំនួនចែករំលែក 0
អាយុ២៣ឆ្នាំ ធ្វើបាន៧យ៉ាងនេះ មុនឆ្នាំ២០១៩មកដល់ ទុកថាជាមនុស្សអស្ចារ្យបំផុតហើយ
ចន្លោះមិនឃើញ
រយៈពេល១ឆ្នាំ ស្មើនឹង៣៦៥ថ្ងៃ ពិតជាលឿនបំផុត ពេលខ្លះយើងសឹងតែធ្វើអ្វីមិនទាន់ នឹងពេលវេលាដែលដើរឥតឈប់មិនរង់ចាំអ្នកណាឡើយ។ យើងតែងឆ្លុះកញ្ចក់មើលមុខខ្លួនឯង ហើយតែងសូរខ្លួនឯងថា «ខ្ញុំបានធ្វើអ្វីខ្លះនៅឆ្នាំនេះ»? ប្រសិនបើត្រឹមអាយុ២៣ឆ្នាំ តែអ្នកបានធ្វើរឿង៧យ៉ាងនេះ ចាត់ទុកថា ជាជោគជ័យមួយកម្រិតហើយ។
១. អាចប្រឈមមុខ និងដោះស្រាយបញ្ហាដោយខ្លួនឯង
មានបញ្ហាជាច្រើនចូលមកជីវិត តែយើងអាចដោះស្រាយបានដោយរលូន ដោយខ្លួនឯង ចេញពីការគិតដ៏ស៊ីជម្រៅរបស់ខ្លួនឯង។ ខុសកាលពីមុន ពេលមានបញ្ហាអ្វីបន្តិចបន្តួច ក៏យើងមានអារម្មណ៍ថាបញ្ហាធំ ហើយតែងតែធុញទ្រាន់នឹងឆ្លងកាត់ ពេលខ្លះទៀតបញ្ហាទាំងនោះបែរជាផ្ទេរឲ្យឪពុកម្ដាយជាអ្នកទទួលខុសត្រូវ។ តែពេលនេះ យើងអាចប្រឈមវាដោយខ្លួនឯង មិនថារឿងធំ ឬតូច នោះក៏ចាត់ទុកថា យើងមានទុនដ៏ល្អដើម្បីបន្តជីវិតដ៏វែងឆ្ងាយទៀត។
២. អាចថ្លឹងថ្លែងរឿងណាដែលមានប្រយោជន៍គួរតែគិត និងរឿងណាដែលគួរគ្រវាត់ចោល
ពេលខ្លះរឿងមួយចំនួន បានចូលមកជីវិតយើង វាអាចជារឿងល្អ និងខ្លះទៀត ជារឿងដែលគ្មានប្រយោជន៍ទាល់តែសោះ តែយើងបែរជាចំណាយពេលគិតជាមួយរឿងនោះ។ ចូលដល់វ័យប៉ុននេះ បើយើងចេះថ្លឹងថ្លែង រាល់រឿងរ៉ាវដែលចូលមកក្នុងខួរក្បាល នោះយើងអាចរំដោះបញ្ហាជាច្រើនដែលមកជីវិត។
ដូចបញ្ហាស្នេហា ដែលមនុស្សក្នុងវ័យនេះ កំពុងចាត់ទុកថា វាជាបញ្ហាធំក្នុងជីវិត ហើយតែងតែឈឺចាប់ព្រោះតែរឿងនេះ តែចំពោះយើង អាចជៀសផុតពីរឿងនេះ ដោយបង្វែរការគិត និងផ្ដោតលើអ្វីផ្សេងដែលមានប្រយោជន៍ជាងនេះ គឺចាត់ទុកថា ជាភាពចាស់ទុំមួយក្នុងខ្លួនក្នុងជីវិត ហើយទៅថ្ងៃមុខភាពចាស់ទុំនេះ នាំយើងទៅរកអនាគតដ៏ល្អ។
៣. អាចទិញអ្វីដែលជាញើសឈាមខ្លួនឯង
វាអាចមិនមែនជារឿងធំដុំ សម្រាប់អ្នកមាន តែវាពិតជាមានតម្លៃសម្រាប់អ្នកដែលខំប្រឹងប្រែង រហូតបានអ្វីដែលយើងចង់បាន។ មិនថារបស់នោះ មានតម្លៃប៉ុណ្ណា យើងត្រូវរីករាយនឹងមានវា ព្រោះថាមិនប្រាកដ អ្នកដែលមានវ័យស្របាលយើង អាចធ្វើបាននោះទេ។ ត្រូវដឹងថា របស់មួយ យើងបានតាំងចិត្ត និងដាក់គោលដៅ យកវាឲ្យបាន បើយើងអាចបានវាមក ដោយកម្លាំងញើសឈាមខ្លួនឯង នោះជាជោគជ័យមួយ ព្រោះទៅថ្ងៃមុខបើយើងមានការតាំងចិត្ត និងដាក់គោលដៅ ធ្វើអ្វីផ្សេងដោយច្បាស់លាស់ បែបនេះរហូត នោះភាពបរាជ័យ មិនដែលរត់មករកយើងឡើយ។
៤. ឡើងតំណែង និងប្រាក់ខែនៅកន្លែងការងារ
បើក្រឡេកមកមើលការងារក្នុងឆ្នាំនេះ អ្នកបានសាងស្នាដៃល្អៗជាច្រើន ធ្វើឲ្យអ្នកថ្នាក់ដឹកនាំសប្បាយចិត្ត ហើយរីករាយនឹងដំឡើងតំណែង និងប្រាក់ខែ។ ដូច្នេះអ្នកគួរតែសប្បាយចិត្ត និងមានមោទនភាពលើខ្លួនឯង ចំពោះអ្វីដែលបានបំពេញកន្លងមក។
៥.អាចធ្វើដំណើរកម្សាន្តទៅកន្លែងដែលខ្លួនឯងប្រាថ្នាតាំងពីតូច
កាលពីតូចធ្លាប់មានក្ដីស្រមៃដើរលេងកន្លែងឆ្ងាយៗ ឫទៅកាន់តំបន់ទេសចរណ៍ណាមួយ ដោយខ្លួនឯងទេ? បើក្នុងឆ្នាំនេះ អ្នកបានធ្វើដំណើរកម្សាន្តជាច្រើនកន្លែងដោយខ្លួនឯង ដោយមិនចាំបាច់ចាយលុយគ្រួសារ នោះហើយជាអ្វីដែលអ្នកសម្រេចបានក្នុងជីវិត។ ចំណុចនេះអាចជារឿងតូចតាចសម្រាប់អ្នកមាន តែជាជោគជ័យដ៏ធំសម្រាប់អ្នកដែលប្រឹងប្រែងរកលុយដោយសមត្ថភាព និងអាចទៅកាន់កន្លែងទាំងនោះដូចបំណង។
៦. ក្លាយជាមនុស្សគួរជាទីរាប់អានពីអ្នកជុំវិញខ្លួន
ទៅដល់ទីណាក៏មានអ្នកស្រឡាញ់រាប់អាន ចូលចិត្ត ក៏ចាត់ទុកជាភាពជោគជ័យដែរ។ ចំណុចនេះបង្ហាញថា អ្នកជាមនុស្សល្អ ចេះបត់បែនគ្រប់កាលៈទេសៈ អាចសម្របខ្លួនគ្រប់ជាមួយប្រភេទមនុស្ស មិនមានសត្រូវ មានតែមិត្ត។ ដូច្នេះទៅថ្ងៃមុខ មិនថាមានរឿងអ្វីក៏មានអ្នកនៅពីក្រោយខ្នងចាំលើកទឹកចិត្តដែរ។
៧. អាចកំណត់ពីអ្វីដែលខ្លួនចង់បាននៅអនាគត
ជាជំហានឆ្ពោះទៅរកភាពជោគជ័យ បើអ្នកដឹងពីអ្វីដែលគោលបំណងពិតប្រាកដរបស់អ្នក ហើយបើបានរៀបចំផែនការ ដើម្បីសម្រេចឲ្យបាន គឺកាន់តែល្អប្រសើរថែមទៀត។ តើអ្នកបានកំណត់គោលដៅរបស់ខ្លួនឯងសម្រាប់ឆ្នាំថ្មីឫ? បើមិនទាន់ទេ សូមគិតពិចារណាឡើងវិញ៕