- 2018-12-31 08:17:18
- ព័ត៌មាន
តន្ត្រីសប្បុរសធម៌ដើម្បីកុមារ បំផុសគំនិតលើការលើកកម្ពស់ការផលិតសំលៀកបំពាក់ក្នុងស្រុក
- 2018-12-31 08:17:18
- ចំនួនមតិ 0 | ចំនួនចែករំលែក 0
តន្ត្រីសប្បុរសធម៌ដើម្បីកុមារ បំផុសគំនិតលើការលើកកម្ពស់ការផលិតសំលៀកបំពាក់ក្នុងស្រុក
ចន្លោះមិនឃើញ
ការប្រគំតន្ត្រីមួយ គ្រោងបង្កើតឡើងដើម្បីបំផុសគំនិតសំខាន់លើការផលិតសំលៀកបំពាក់ក្នុងស្រុក ដែលគំនិតផ្ដួចផ្ដើមនេះធ្វើឡើងដោយ KID Project រួមជាមួយដៃគូឧបត្ថម្ភ និងសហការ។ កម្មវិធីនេះ គ្រោងរៀបចំ នៅថ្ងៃទី ១៣ ខែមករា ឆ្នាំ ២០១៩ នៅហាងកាហ្វេ INSTant T Cafe and Restaurent (ផ្លូវ ៤៧)។
នេះមិនមែនជាលើកទី១ ឡើយដែល KID Project បានផ្ដួចផ្ដើមឲ្យមានព្រឹត្តិការណ៍គោលដៅមនុស្សធម៌ ដើម្បីជួយដល់កុមារ, ក្រឡេកមើលកាលពីថ្ងៃទី ២៧ ខែធ្នូ ឆ្នាំ ២០១៥ កម្មវិធីប្រកួតបាល់ទាត់សប្បុរសធម៌ (Football for Kids) របស់ពួកគេបានទទួលការគាំទ្រយ៉ាងច្រើនផងដែរ។
ប៉ុន្តែលើកនេះ ពួកគេជ្រើសរើសយកប្រធានបទថ្មីមួយដែលទាក់ទងទៅនឹងសំលៀកបំពាក់ជាចំណុចសំខាន់នៃសកម្មភាព។ “ក្នុងឱកាសថ្មីនេះ យើងជ្រើសរើសយកសំលៀកបំពាក់ជាគោលគំនិត ពីព្រោះខ្ញុំចង់បង្វែរចំណាប់អារម្មណ៍ខ្លះរបស់យុវជន និងសាធារណជនដើម្បីចូលរួមយកចិត្តទុកដាក់និងលើកកម្ពស់តម្លៃផលិតផលសំលៀកបំពាក់ក្នុងស្រុកឲ្យបានច្រើនជាងមុន។ ពួកយើងចាប់ផ្ដើមគំនិតច្នៃម៉ូដ ដោយខ្លួនឯង និងជ្រើសរើសយកអ្នកផលិតក្នុងស្រុកដើម្បីឲ្យវាចេញជារូបរាង ហើយសង្ឃឹមនឹងផ្សព្វផ្សាយឲ្យបានទូលំទូលាយតាមរយៈការប្រគំតន្ត្រីខ្នាតតូចនាថ្ងៃទី ១៣ ខែមករា របស់យើង។ នេះជាការលើកឡើងរបស់លោក សៀក វិសាល និស្សិតកំពុងបន្តការសិក្សានៅបរទេស និងជាប្រធានគម្រោង KID Project ។
“យើងប្រើប្រាស់ logo ពណ៌ផ្កាឈូកព្រោះវាជាតំណាងនៃសេចក្ដីសង្ឃឹម, ផ្ទៃអាវពណ៌ខ្មៅដែលប្រៀបដូចជាភាពងងឹត និងគ្រាលំបាក នឹងទទួលបានពន្លឺ នៃសេចក្ដីសង្ឃឹម និងសេចក្ដីស្រលាញ់ជាមួយ KID Project។”
កម្មវិធីប្រគំតន្ត្រីសប្បុរសធម៌ដើម្បីកុមារ Joint KID Project នឹងមានការចូលរួមពីកញ្ញា ចិត្ត កញ្ចនា, លោកអ៊ួង សូរយា, លោក Sakada និងក្រុម September’s End ដែលនឹងញ៉ាំងឲ្យបរិយាកាសកាន់តែមានភាពទាក់ទាញ និងសប្បាយរីករាយ។ ទឹកប្រាក់ដែលទទួលបានពីការលក់សំបុត្រចូលរួម និងការលក់សំលៀកបំពាក់ នឹងត្រូវយកទៅបរិច្ចាគជួយដល់កុមារជាសិស្សានុសិស្សជួបការលំបាកខ្វះខាតនៅសាលាបឋមសិក្សាភូមិវាល ខេត្ត សៀមរាប។
អ្នករៀបចំកម្មវិធី និងជាម្ចាស់គម្រោងបញ្ជាក់ថា “ខ្សែសង្វាក់ផលិតកម្មសំលៀកបំពាក់ក្នុងស្រុកមានការខិតខំប្រឹងប្រែងខ្លាំងដើម្បីឲ្យពិភពលោកស្គាល់ពីកម្ពុជា ហើយនេះគួរត្រូវទទួលបានការឲ្យតម្លៃ។ Joint KID Project ធ្វើឡើងដើម្បីចូលរួមលើកតម្លៃសង្គម និងបញ្ជាក់ថាយុវជនជំនាន់ក្រោយក៏មានសមត្ថភាព និងការតាំងចិត្តជំនះរាល់ឧបសគ្គ ដើម្បីសម្រេចក្ដីសុបិន និងអ្វីដែលពួកគេស្រលាញ់ផងដែរ។ ការចូលរួមចំណែកក្នុងសង្គម តាមរយៈការចែករំលែក និងសកម្មភាពគោលដៅមនុស្សធម៌ធ្វើឲ្យខ្ញុំស្គាល់កាន់តែច្បាស់ពីខ្លួនឯង។“
លោក វិសាលបន្ថែមថា ៖ ”ជាចុងក្រោយ ខ្ញុំសូមធ្វើការថ្លែងអំណរគុណដល់ Klassy Watch , instant T cafe , borey derm meas, epic club និង converse Cambodia ជាដៃគូឧបត្ថម្ភ និងសហការដែលបានផ្ដល់ការគាំទ្រ និងជំរុញលើកទឹកចិត្តដល់សកម្មភាពរបស់ Joint KID Project។ ខ្ញុំសង្ឃឹម និងរំពឺងថានឹងសកម្មភាពនេះនឹងទទួលបានការចូលរួមគាំទ្រច្រើនពីសំណាក់យុវជន និងសាធារណជន, ហើយផលិតផលក្នុងស្រុកនឹងទទួលបានការគាំទ្រទៅថ្ងៃអនាគត៕”