- 2019-01-19 06:45:59
- សុខភាព
កូនស្រីក្លាហាន ស្ម័គ្របរិច្ចាគថ្លើម ដើម្បីឪពុកបានរស់
- 2019-01-19 06:45:59
- ចំនួនមតិ 0 | ចំនួនចែករំលែក 0
កូនស្រីក្លាហាន ស្ម័គ្របរិច្ចាគថ្លើម ដើម្បីឪពុកបានរស់
ចន្លោះមិនឃើញ
អ្នកនាងYvonne Chan បានសម្រេចចិត្តស្ម័គ្របរិច្ចាគថ្លើម ដើម្បីឪពុកបានរស់ទោះជាត្រូវអាឡោះអាល័យប្តីហើយនិងកូនស្រី២នាក់ក៏ដោយ។
នៅពេលដែលនាងប្រុងនឹងចូលបន្ទប់វះកាត់នៅមន្ទីរពេទ្យ National University Hospital (NUH) ប្រទេសសឹង្ហបុរី ពាក្យចុងក្រោយដែលចាន់បានលឺគឺកូនស្រីអាយុ៥ឆ្នាំរបស់នាងនិយាយទាំងទឹកភ្នែកថា "ម៉ាក់ សូមចេញមកវិញ ហើយឃើញខ្ញុំ" ។
អ្នកនាងចាន់ក៏សម្រក់ទឹកភ្នែកដូចគ្នា ហើយកូនស្រីអាយុ២ឆ្នាំរបស់នាងក៏យំលាម៉ាក់។ ប៉ុន្តែនាងត្រូវតែតាំងចិត្តយ៉ាងម៉ឺងម៉ាត់ថាត្រូវតែវះកាត់យកថ្លើមប្តូរឲ្យឪពុកនាងដែលត្រូវការថ្លើមជាចាំបាច់បើពុំទេលោកនឹងរស់មិនផុត១ឆ្នាំឡើយ។
ឪពុកនាងបាននិយាយថា "ខ្ញុំបានប្រាប់ខ្លួនឯងឲ្យភ្លេចវា។ ខ្ញុំមិនចង់ឱ្យពួកគេឈឺចាប់ទេហើយអាយុរបស់ខ្ញុំក៏ចាស់ហើយដែរ។ ប្រសិនបើខ្ញុំទទួលបានថ្លើមពួកគេ តើខ្ញុំអាចរស់បានយូរប៉ុណ្ណា? ១០ ឆ្នាំ? ២០ ឆ្នាំ?”។
ក្រោយពិភាក្សាជាមួយបងប្រុស២នាក់ ហើយទីបំផុតក្រោយពិនិត្យ ឃើញថាអ្នកដែលសាកសមបំផុតក្នុងការបរិច្ចាកថ្លើមគឺ ចាន់។ នាងក៏យល់ព្រមឲ្យពេទ្យធ្វើការ។
ឪពុករបស់ចាន់បាននិយាយទៅកាន់កូនប្រសារប្រុស កុំឲ្យកូនស្រីរបស់គាត់វះកាត់ប្តូរថ្លើមអី។ តែអ្វីៗហួសពេលទៅហើយ។ ចាន់ត្រូវបានរុញចូលទៅក្នុងបន្ទប់វះកាត់រួចជាស្រេច។
ប្រាប់ Channel NewsAsia នៅថ្ងៃនេះ ចាន់ដែលជាវិស្វករវ័យ៣៥ឆ្នាំបាននិយាយថា កាលនោះខែកញ្ញា ឆ្នាំ២០១៧។ "នៅពេលនោះខ្ញុំគិតថា ៖ នេះគឺសម្រាប់ឪពុករបស់ខ្ញុំ ដូច្នេះខ្ញុំមិនគិតថាមានអ្វីផ្សេងអាចរារាំងខ្ញុំមិនឲ្យធ្វើវាទេ។ វាលើសពីការដឹងគុណ។ វាព្រោះតែចំណងដ៏រឹងមាំរវាងខ្ញុំហើយនឹងគាត់"។
ឥឡូវនេះ ឪពុកនាងឈ្មោះ Casey កំពុងមានសុខភាពល្អ។
Lee Guan Huei វេជ្ជបណ្ឌិតនៅមន្ទីរពេទ្យ NUH បាននិយាយថា បើតាមច្បាប់សរីរាង្គរបស់សឹង្ហបុរី ជនដែលអាចបរិច្ចាគសរីរាង្គទាល់តែគេស្លាប់ បើពុំនោះទេសំណើរបរិច្ចាគរបស់គេនឹងត្រូវទាត់ចោល។ ប៉ុន្តែលោក វេជ្ជបណ្ឌិត Lee បានលើកឡើងថាទោះជាយ៉ាងនេះក្តីមនោសញ្ចេតនារបស់សមាជិកគ្រួសារមិនអាចឃាត់ជាប់ឡើយ។
វេជ្ជបណ្ឌិត Shridar Iyer ផ្នែកផ្លាស់ប្តូរថ្លើមរបស់ National University Hospital បាននិយាយថាការវះកាត់ប្តូរថ្លើមទាមទារឲ្យអ្នកបរិច្ចាគលះបង់ខ្ពស់ ហើយត្រូវឆ្លងកាត់ការធ្វើតេស្តសុខភាព និង សម្ភាសន៍ដោយគណៈកម្មការជំនាញ។
ជាច្រើនករណីដែលអ្នកគ្រោងបរិច្ចាគគ្រឿងក្នុងរបស់ខ្លួនរន្ធត់នៅពេលទទួលបានព័ត៌មានលម្អិតពីវេជ្ជបណ្ឌិត។ អ្នកខ្លះក៏ប្តូរចិត្តមិនបរិច្ចាគវិញ។ ឧទាហរណ៍ពួកគេភ្ញាក់ផ្អើលនៅពេលដឹងថាការបរិច្ចាគថ្លើមឲ្យមនុស្សពេញវ័យមានន័យថា ៦០ ទៅ ៧០% នៃថ្លើមទាំងមូលរបស់គេត្រូវបានបរិច្ចាគ។
អត្រាស្លាប់របស់អ្នកបរិច្ចាគអាចមានដល់ទៅ ០,៥% ហើយនិងហានិភ័យសុខភាពដែលបណ្តាលពីផលវិបាកនេះអាចមានពី ១៥ ទៅ ២០%។ ម្យ៉ាងទៀត ពួកគេត្រូវសម្រាកពីការងារឬសាលាពី៦ទៅ៨សប្តាហ៍ក្រោយបរិច្ចាគដើម្បីឲ្យសុខភាពប្រសើរឡើងវិញ។
សម្រាប់ចាន់ ដែលបានបរិច្ចាគផ្នែកខ្លះនៃថ្លើមសម្រាប់ឪពុក នាងមានពាក្យទាំងនេះសម្រាប់អ្នកដែលចង់បរិច្ចាគថ្លើមរបស់ពួកគេ។ "ប្រសិនបើអ្នកគិតថានេះជារឿងត្រឹមត្រូវ ធ្វើវា។ កុំសួរខ្លួនឯង ពីព្រោះអ្នកកំពុងធ្វើរឿងល្អហើយ។ គ្រាន់តែមានមោទនភាពចំពោះខ្លួនឯង បន្តដំណើរទៅមុខ ធ្វើអ្វីដែលបេះដូងអ្នកប្រាប់អ្នក"។
សឹង្ហបុរីជាប្រទេសមានការអភិវឌ្ឍខ្លាំង។ អតីតនាយករដ្ឋមន្រ្តីសឹង្ហបុរី លោក លី ក្វាន់យូ ធ្លាប់បាននិយាយថាភាពរីកចម្រើនរបស់ប្រទេសលោកគឺដោយសារ ចំណងគ្រួសាររឹងមាំរបស់ប្រជាជនសឹង្ហបុរី ឧទាហរណ៍ឪពុកម្តាយអាចបោះបង់គ្រប់យ៉ាងសូម្បីការងារដ៏មមាញឹករបស់ពួកគេដើម្បីតែទៅលើកទឹកចិត្តពេលកូនប្រលង។
រឿងរ៉ាវរបស់ចាន់ ប្រហែលជាឧទាហរណ៍មួយក្នុងចំណោមទិដ្ឋភាពជាច្រើនក្នុងសង្គមសឹង្ហបុរី ហើយក៏ប្រហែលជាកត្តាមួយក្នុងចំណោមកត្តាជាច្រើនទៀតដែលជម្រុញឲ្យប្រទេសនេះមានការអភិវឌ្ឍខ្លាំង៕