ការ share លើ Facebook ដែលបំផ្លាញជីវិតគ្រួសារទាំងស្រុងរបស់អតីតបុគ្គលិកធនាគារម្នាក់

2019-01-26 08:54:04
ការអប់រំ

2019-01-26 08:54:04
ចំនួនមតិ 0 | ចំនួនចែករំលែក 0

ចន្លោះមិនឃើញ

Avijit Das Patnaik ត្រូវបានក្រុមហ៊ុនបណ្តេញចេញពីការងារ និង មិនអាចស្វែងរកការងារថ្មីបានឡើងអស់៥ខែមកហើយ ក្រោយលោក share រូបដែលគេធ្វើឡើងដោយរូបទង់ជាតិសឹង្ហបុរីត្រូវគេហែកចេញ ដើម្បីមើលឃើញទង់ជាតិឥណ្ឌា។

Avijit Das Patnaik រូបថតនៅកោះបាលី ជាមួយកូនប្រុស

បុរសវ័យ ៤៥ឆ្នាំរូបនេះបានប្រាប់ Channel NewsAsia ថា "ប្រសិនបើអ្នកវាយឈ្មោះរបស់ខ្ញុំក្នុង Google អ្នកនឹងឃើញឈ្មោះខ្ញុំមានអ្នកទស្សនាច្រើនណាស់ គេ search រកឈ្មោះរបស់ខ្ញុំ ច្រើនជាងគេ search រកការប្រឆាំងភេរវកម្ម ឬ អ្នកបោកប្រាស់ទៅទៀត" ។

ផលវិបាកនៃការចែករំលែករូបភាពនៅលើទំព័រហ្វេសប៊ុកកាលពីខែសីហាឆ្នាំមុន បានធ្វើឱ្យបុរសដែលមានលំនៅអចិន្រ្តៃយ៍នៅសិង្ហបុរីដែលមានដើមកំណើតមកពីឥណ្ឌា ដែលឥឡូវនេះគាត់ត្រូវបាត់បង់ការងារ ហើយគាត់ ប្រពន្ធនិងកូនតូច២នាក់របស់គាត់នឹងត្រូវចាកចេញពីប្រទេសដែលជាផ្ទះរបស់ពួកគេអស់រយៈពេលជាង១០ឆ្នាំមកហើយ។

ថ្ងៃទី១៥ ខែសីហានៅពេលអតីតបុគ្គលិករបស់ធនាគារ DBS បាន share ក្នុង Facebook group Singapore Indians & Expats ដែលមានសមាជិកប្រមាណ ១២ ០០០ ហើយវាជារូបភាពដែលគេបានបង្ហោះតៗគ្នាច្រើនដងមកហើយនៅលើបណ្តាញសង្គម។

អ្នកនិយមលេងអ៊ិនធើណែតហាក់ដូចជារួមគ្នារិះគន់រូបភាពនេះថាជាការមិនគោរព។ ខណៈដែលលោក Patnaik មិនបាននិយាយលំអិតពីអ្វីដែលបានកើតឡើង ធនាគារ DBS បានចេញសេចក្តីថ្លែងការណ៍ថាគាត់លែងជាបុគ្គលិករបស់ពួកគេទៀតហើយ ព្រោះធនាគារ "មិនគាំទ្រដាច់ខាតចំពោះសកម្មភាពបែបនេះដែលធ្វើឡើងដោយបុគ្គលិករបស់យើង" ។

គាត់ស្តាយចំពោះអ្វីដែលបានកើតឡើង ប៉ុន្តែគាត់បានអះអាងថា វាគ្រាន់តែជារូបបែបសិល្បៈដែលលោកបានចែករំលែកពីវេបសាយមួយដែលគេធ្វើរូបបែបនេះប៉ុណ្ណោះ។

លោក Patnaik បាននិយាយថា "នៅថ្ងៃដែលខ្ញុំបានបង្ហោះរូបនោះខ្ញុំចង់លើកឡើងថារាងកាយខ្ញុំជាជនជាតិសិង្ហបុរី តែបេះដូងរបស់ខ្ញុំនៅតែជាជនជាតិឥណ្ឌា" ហើយលោកគិតថាវាអ្វីដែល "សង្គមអាចទទួលយកបាន" ។ លោកបន្តថា ធ្ងន់ធ្ងរជាងនេះទៅទៀត មានវេបសាយមួយបានបង្កើតព័ត៌មានមិនពិត ដោយបានសរសេរថា បុរសម្នាក់នោះត្រូវបានគេចាប់ខ្លួនហើយ គឺបុរសដែលបានបង្កើតរូបភាពនោះ ដែលវាកាន់តែធ្វើឲ្យកំហឹងអ្នកប្រើប្រាស់បណ្តាញសង្គមដែលកំពុងខឹងគាត់ស្រាប់នោះកាន់តែពុះកញ្រ្ជោល ទោះជាពូកគេមិនដឹងការពិតក៏ដោយ។

Patnaik និយាយថាលោកនៅតែអត់ការងារធ្វើបួនប្រាំខែទៅហើយ បើទោះជាលោកដាក់ពាក្យមិនថាក្នុងប្រទេស ឬ ក្រៅប្រទេសសិង្ហបុរីក្តី វាហាក់បីដូចជាក្រុមហ៊ុនជាច្រើនមិនអាចទទួលយកលោកបាន។

សម្រាប់ជនបរទេសដូចលោក ការងារគឺជាអ្វីៗគ្រប់យ៉ាង ការងាររបស់គាត់គឺជាជីវិត។

លោកនិយាយថាជួនកាលលោកចង់ធ្វើអត្តឃាត។ លោកក្រោកពីគេងដោយមិនដឹងថាត្រូវធ្វើអ្វីពេញមួយថ្ងៃ។ ប៉ុន្តែសំនួរជាច្រើនជុំវិញខួរក្បាលរបស់លោក រួមតាំងពីការគិតទៅដល់កូនស្រីអាយុ១២ឆ្នាំ និង កូនប្រុសអាយុ៩ឆ្នាំរបស់លោកផងដែរ។

ដើម្បីដកខ្លួនចេញពីភាពច្របូកច្របល់ លោកបានសរសេរសៀវភៅ២ក្បាលលក់ឲ្យក្រុមហ៊ុន Amazon មួយក្បាលនិយាយអំពីបាល់ទាត់ និង មួយទៀតនិយាយអំពីដំណើរការថវិកា។ លោកក៏បានតាំងចិត្តថា "ហេតុអ្វីមិនយក [ជំនាញរបស់លោក] ទៅបង្រៀនអក្ខរកម្មផ្នែកហិរញ្ញវត្ថុនៅសាលារៀន និង ជួយកម្មករសំណង់សរសេរអក្សរ?"៕

ប្រភព៖ Channelnewsasia ប្រែសម្រួល៖ សុខ លាងហ៊ត