- 2019-01-31 03:21:37
- សេដ្ឋកិច្ច
ឧកញ៉ា ហេង ឡុង៖ ចេកអំបូងលឿងមួយហិចតា អាចរកចំណូលបាន ៥ពាន់ ទៅ១ម៉ឺនដុល្លារ
- 2019-01-31 03:21:37
- ចំនួនមតិ 0 | ចំនួនចែករំលែក 0
ឧកញ៉ា ហេង ឡុង៖ ចេកអំបូងលឿងមួយហិចតា អាចរកចំណូលបាន ៥ពាន់ ទៅ១ម៉ឺនដុល្លារ
ចន្លោះមិនឃើញ
លោកឧកញ៉ា ហេង ឡុង ប្រធានអគ្គនាយកក្រុមហ៊ុន ឡេង ស្រេង អ៊ីនធើណេស៊ីនណលចម្ការកៅស៊ូបឹងកេត ដែលបានបោះទុនវិនិយោគលើដំណាំចេកប្រមាណ ៥០០ហិចតា នៅក្នុងស្រុកស្ទឹងត្រង់ ខេត្តកំពង់ចាម បានឱ្យដឹងថា ដំណាំចេកអំបូងលឿងមួយហិចតាអាចរកចំណូលបានចន្លោះពី ៥ ពាន់ដុល្លារទៅ ១ម៉ឺនដុល្លារអាមេរិក។
បន្ទាប់ពីមានទីផ្សារធំនៅប្រទេសចិន ការដាំចេកលក្ខណៈទំនើប និងប្រកបដោយស្តង់ដាខ្ពស់មិនធ្លាប់មានពីមុនមកនៅកម្ពុជា ត្រូវបានបោះទុនវិនិយោគដោយក្រុមហ៊ុនជាច្រើន។ ជាក់ស្តែងក្រុមហ៊ុន ឡុង ស្រេង អ៊ីនធើណេស៊ីនណលចំការកៅស៊ូបឹងកេតក៏មានដាំដំណាំចេក និង កំពុងប្រមូលផល ដើម្បីនាំចេញទៅកាន់ប្រទេសចិន។
ការនាំចេញចេកអំបូងលឿងពីកម្ពុជា ដោយផ្ទាល់ទៅកាន់ទីផ្សារប្រទេសចិន បានចាប់ផ្ដើមជាផ្លូវការនៅខែមករាឆ្នាំ ២០១៩នេះ ក្រោយកម្ពុជា និងចិន បានចុះកិច្ចព្រមព្រៀងលើពិធីសារមួយ អាចនាំចេញទៅកាន់ប្រទេសចិនបាន។ ប្រទេសចិន បានអនុញ្ញាតឲ្យកម្ពុជា នាំចេញចេក៣០ម៉ឺនតោនក្នុងមួយឆ្នាំ។
លោកឧកញ៉ា ហេង ឡុង បានបន្ថែមថា ប្រទេសកម្ពុជាមានលក្ខណៈអំណោយផលល្អច្រើនយ៉ាងសម្រាប់ដំណាំកសិឧស្សាហកម្ម។ ប៉ុន្តែឱកាសល្អបំផុត សម្រាប់ដំណាំចេកក្នុងខេត្តកំពង់ចាមគឺកត្តាអាកាសធាតុ និងការបើកទូលាយទីផ្សារក្រៅប្រទេស។ ការដាំចេក របស់ក្រុមហ៊ុន ឡុង ស្រេង អ៊ីនធើណេស៊ីនណលចំការកៅស៊ូបឹងកេត ត្រូវបានធ្វើលើចំណែកខ្លះ នៃដីចម្ការកៅស៊ូបឹងកេត ខណៈតម្លៃកៅស៊ូមានការប្រែប្រួលខ្លាំងលើទៅផ្សារ ក្នុងពេលប៉ុន្មានឆ្នាំ ចុងក្រោយនេះ។ ឧកញ៉ា ហេង ឡុង ឱ្យដឹងថា នេះ គឺជាយុទ្ធសាស្ត្រកំណែទម្រង់ថ្មីមួយ ដើម្បីជាការឆ្លើយតបតម្រូវការទីផ្សារពិភពលោក។
ខេត្តកំពង់ចាមមានអំណោយផលល្អបីយ៉ាងក្នុងការធ្វើកសិកម្មពិសេសដំណាំចេកគឺ៖
បច្ចុប្បន្នចេកកំពុងហុចផលល្អ និងផ្តល់ចំណូលបានច្រើន បើប្រៀបធៀបនឹងដំណាំកៅស៊ូ។ដំណាំកៅស៊ូមួយហិចតាអាចទទួលបានទិន្និផលជាងមួយពាន់ដុល្លារប៉ុណ្ណោះក្នុងមួយឆ្នាំ ប៉ុន្តែ ដំណាំចេកវិញអាចទទួលបានទិន្និផលរង្វង់ ៥ពាន់ដុល្លារទៅមួយម៉ឺនដុល្លារក្នុងមួយហិចតា។ ផ្ដល់ឱកាសការងារ និងប្រាក់ចំណូលដល់ប្រជាពលរដ្ឋបានច្រើនជាងមុន។
ចេកអំបូងលឿងកម្ពុជាទទួលទិន្នផលល្អ និងការចាប់អារម្មណ៍ខ្លាំងនៅលើទីផ្សារអន្តរជាតិនាពេលនេះពិតជាបានឆ្លុះបញ្ចាំងពីការខិតខំរបស់ក្រុមហ៊ុនផង និងការចូលរួមពីមន្ត្រីជំនាញក្រសួងកសិកម្មរុក្ខាប្រមាញ់ និងនេសាទផង ក្នុងការគោរពទៅតាមលក្ខណៈបច្ចេកទេស នៃការដាំដុះ និងការវេចខ្ចប់តាមស្តង់ដារអនាម័យខ្ពស់។ លទ្ធផលនេះក៏បានឆ្លើយតបទៅនឹងគោលនយោបាយរបស់ក្រសួងស្ដីពីការជំរុញផលិតកម្ម ក្នុងស្រុកបង្កើនតម្លៃបន្ថែម បង្កើតការងារ បង្កើនប្រាក់ចំណូល កាត់បន្ថយភាពក្រីក្រ និងចំណាកស្រុកតាមរយៈការអភិវឌ្ឍខ្សែសង្វាក់ផលិតកម្មកសិកម្ម។
ក្រុមហ៊ុន ឡេង ស្រេង អ៊ីនធើណេស៊ីនណល ចម្ការកៅស៊ូបឹងកេតបានចុះទុនវិនិយោគប្រមាណជាង ៨លានដុល្លារ សម្រាប់ដាំដុះចេកអំបូងលឿង លើផ្ទៃដីសាកល្បង៥០០ហិចតា ក្នុងនោះផ្ទៃដី១០០ហិចតា កំពុងប្រមូលផល និងវេចខ្ចប់នាំចេញទៅកាន់ទីផ្សារចិន ហើយអនាគតគ្រោងពង្រីកផ្ទៃដីដាំដុះឲ្យដល់ ១ ៥០០ហិចតា ដើម្បីឆ្លើយតបតាមតម្រូវការទីផ្សារប្រទេសចិន ជប៉ុន កូរ៉េ និង អ៊ឺរ៉ុប ជាដើម។
លោកឧកញ៉ា ហេង ឡុង បានមានប្រសាសន៍ថា បើទោះចេកអំបូងលឿងកំពុងមានទីផ្សារខ្ពស់ក៏ពិតមែន ក្រុមហ៊ុននៅតែរក្សាទុកដំណាំកៅស៊ូ ដែលមានស្រាប់រង្វង់ពី ៧០ ទៅ៨០% ដដែល។ លោកបានអំពាវនាវដល់សហគ្រិនទាំងក្នុងស្រុក និងក្រៅស្រុកគួរងាកមកបោះទុនវិនិយោគលើវិស័យ កសិកម្មបន្ថែមទៀត ខណៈផ្ទៃដាំដុះ និងកម្លាំងពលកម្មមានច្រើន។
នៅក្នុងឆ្នាំ ២០១៩នេះ កម្ពុជាអាចនាំចេញចេកអំបូងលឿង ទៅកាន់ទីផ្សារអន្តរជាតិប្រមាណជាង ១លានតោន។ នេះបើតាមការបញ្ជាក់ពីលោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ កាលពីថ្ងៃទី២០ ខែមករា ក្នុងឱកាសចុះពិនិត្យការនាំចេញចេកអំបូងលឿងរបស់ក្រុមហ៊ុនឡុង ស្រេង ។
ការអះអាងរបស់លោករដ្ឋមន្ត្រីដូចនេះ ធ្វើឡើងបន្ទាប់ពីលោកបានសង្កេតឃើញថា ត្រឹមដើមឆ្នាំ២០១៩ តែប៉ុណ្ណោះ កម្ពុជាបាននាំចេញចេកអំបូងលឿងបានប្រមាណជាង ៦ ០០០តោនរួចទៅហើយ ទៅកាន់ទីផ្សារអន្តរជាតិ៕