មកស្គាល់ឈ្មោះមេរោគដ៏កាចសាហាវ ពេលឆ្មា ឬឆ្កែខាំ អាចបំផ្លាញសរីរាង្គសំខាន់ៗរហូតស្លាប់

2019-02-15 04:23:11
សុខភាព

2019-02-15 04:23:11
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមរយៈការបកស្រាយរបស់ រដ្ឋលេខាធិការ និងអ្នកនាំពាក្យនៃក្រសួងសុខាភិបាល លោកស្រីវេជ្ជបណ្ឌិត ឱ វ៉ាន់ឌីន បានឲ្យដឹងថា នៅពេលឆ្កែខាំ ឬឆ្មាខ្វាចនេះ វាបង្កឲ្យមានអាការ:រោគភ្លាមៗ កើតតាមរយៈមេរោគបាក់តេរី ឈ្មោះ បាតូណេឡា (Bartonella) ដែលបង្កឲ្យកើតមានដុំសរសៃឡាំហ្វាទិច (Lymphogranulome) ដែលអាចធ្វើឲ្យមានសភាពឆ្ងន់ធ្ងរ និងស្លាប់បាន។ នេះបើតាមប្រភពអង្គភាពសារព័ត៌មាន Fresh News ដែលបានចុះផ្សាយកាលពីថ្ងៃទី១៥ ខែកុម្ភៈ ឆ្នាំ២០១៩នេះ។

លោកស្រីវេជ្ជបណ្ឌិត ឱ វ៉ាន់ឌីន (រូបភាព៖ ក្រសួងសុខាភិបាល)

តាមប្រសាសន៍របស់លោកស្រវេជ្ជបណ្ឌិត ឱ វ៉ាន់ឌីន បានឲ្យដឹងទៀតថា ក្រោយពីឆ្មាខាំពី២ទៅ៣សប្ដាហ៍ អ្នកជំងឺនឹងមានអាការៈហើមកូនកណ្ដុរ ករណីមួយចំនួនទៀតមានអាការៈ មានក្តៅខ្លួន ឈឺក្បាល ឈឺសាច់ដុំ ស្រកទម្ងន់ ដំបៅស្បែកធ្លាយចេញមក រលាកសរសៃរដែលធ្វើឲ្យប៉ះពាល់ដល់សរីរាង្គសំខាន់ៗ ពិសេសថ្លើម ជួនកាលមានរលាកភ្នែក ហើយករណីធ្ងន់ធ្ងរនឹងស្លាប់ដោយសាររលាកខួរក្បាល ឫរលាកបេះដូងជាដើម។

រូបតំណាង

អ្វីដែលគួរព្រួយបារម្ភនោះ គឺពុំមានវ៉ាក់សាំងការពារជំងឺ«ដុំសរសៃឡាំហ្វាទិច»នេះឡើយ។ ដូច្នេះហើយក្រសួងសុខាភិបាលបានអំពាវនាវទៅកាន់ប្រជាពលរដ្ឋទាំងអស់ សូមប្រុងប្រយ័ត្ន ប្រសិនបើមានចិញ្ចឹមសត្វឆ្មា ឬឆ្កែ សូមកុំឲ្យកូនតូចៗ លេង ឬប៉ះពាល់ផ្ដេសផ្ដាស។ ក្នុងករណី ឆ្មា ឬឆ្កែខាំ សូមបញ្ជូនទៅកាន់មន្ទីរពេទ្យជាបន្ទាន់ ដើម្បីធ្វើការចាក់វ៉ាក់សាំងឆ្កែឆ្កួត និងតេតាណុសឲ្យបានគ្រប់ចំនួន ដើម្បីបង្ការកុំឲ្យជំងឺឆ្កែឆ្កួត និងជំងឺតេតាណុស។

សូមជម្រាបជូនថា កាលពីថ្ងៃទី១៣ ខែកុម្ភៈ ឆ្នាំ ២០១៩ ក្មេងស្រីម្នាក់បានស្លាប់បាត់បង់ជីវិត ក្រោយពីឆ្មាខាំអស់រយៈពេល៣ខែ ហើយត្រូវបានក្រុមគ្រួសារយកទៅធ្វើបុណ្យតាមប្រពៃណីនៅភូមិធ្លក សង្កាត់ច្រកម្ទេស ក្រុងបាវិត ខេត្តស្វាយរៀង។ ករណីនេះបានធ្វើឲ្យមានការអាណិតអាសូរជាពន់ពេក ទៅក្មេងស្រីរងគ្រោះ ដែលមុនពេលនាងស្លាប់ទៅជំងឺឆ្កែឆ្កួតនេះ បានធ្វើទុក្ខបុកម្នេញជាខ្លាំង រហូតក្មេងស្រីនោះផុតដង្ហើម។ ដូច្នេះសូមមាតា បិតា ទូទាំងប្រទេសកម្ពុជា សូមប្រុងប្រយ័ត្នបំផុត កុំឲ្យមានវិប្បដិសារីដូចជាឪពុកម្ដាយ របស់កុមារីរងគ្រោះនេះ៕