- 2019-03-09 04:16:25
- ព័ត៌មាន
និស្សិតមួយក្រុម បង្កើតកម្មវិធីមនុស្សធម៌ និងការថែរក្សាបរិស្ថាន
- 2019-03-09 04:16:25
- ចំនួនមតិ 0 | ចំនួនចែករំលែក 0
និស្សិតមួយក្រុម បង្កើតកម្មវិធីមនុស្សធម៌ និងការថែរក្សាបរិស្ថាន
ចន្លោះមិនឃើញ
សិស្សនិស្សិតជាង ១០០នាក់ដែលមកពីដេប៉ាតឺម៉ង់វិទ្យាសាស្ត្រសេដ្ឋកិច្ច និងគ្រប់គ្រងជាភាសាបារាំង (Filière d'économie et de Gestion ) នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និង សាកលវិទ្យាល័យ លីយ៉ុង II បានរួមគ្នារៀបចំនិងបង្កើតឡើងនូវដំណើរទស្សនកិច្ចសិក្សារួមគ្នាក្រោមប្រធានបទផ្សេងៗ ក្នុងគោលបំណងដើម្បីបង្កើតក្ដីស្រលាញ់ចំពោះធម្មជាតិ ការថែរក្សាបរិស្ថាន ការខ្វល់ខ្វាយពីបម្រែបម្រួលអាកាសធាតុ ការចូលរួមសកម្មភាពមនុស្សធម៌ ការចូលរួមថែរក្សាការពារនូវសម្បត្តិបេតិកភណ្ឌវប្បធម៌ជាតិ ជាពិសេសផ្ដល់ភាពកក់ក្ដៅតាមរយៈការរឹតចំណងសាមគ្គីភាពរវាងគ្នា និងគ្នាក្នុងសង្គមខ្មែរ ។
នៅឆ្នាំនេះទស្សនកិច្ចសិក្សា ដែលប្រព្រឹត្តឡើងតាមរយៈក្រុមនិស្សិតនេះផងដែរ នឹងប្រព្រឹត្តឡើងនៅខេត្តកំពង់ធំ និងសៀមរាប មានរយៈពេល ៤ ថ្ងៃ ៣យប់ ចាប់ពីថ្ងៃទី ០៧ ដល់ថ្ងៃ ១០ ខែ មីនា ឆ្នាំ ២០១៩ ក្រោមប្រធានបទ "ការចូលរួមរបស់យុវជនឆ្ពោះទៅរកវឌ្ឍនភាព នៃសង្គម" ។
សកម្មភាពរបស់ក្រុមនិស្សិតមានដូចជា៖
ការតម្រង់ទិសក្នុងការជ្រើសរើសជំនាញនៅថ្នាក់ឧត្ដមសិក្សា និងការចែករំលែកអំពីចំណេះដឹងផ្នែកបរិស្ថាននៅវិទ្យាល័យមួយក្នុងខេត្តកំពង់ធំ
ការរាំជាក្រុមទ្រង់ទ្រាយធំ នៅមុខលានជល់ដំរី ដោយមានវត្តមាននៃការចូលរួមទស្សនាពីភ្ញៀវជាតិ អន្តរជាតិ ដែលជាសារបង្ហាញពីចង្វាក់រាំខ្មែរ និងដើម្បីឲ្យអ្នកមកទស្សនាស្វែងយល់ពីវប្បធម៍របស់ខ្មែរ
ការដាំដើមឈើ និងការប្រលែងត្រីនៅក្នុងសហគមន៍មួយដែលស្ថិតនៅស្រុកបន្ទាយស្រី ខេត្តសៀមរាប
សកម្មភាពមនុស្សធម៌តាមរយៈការបរិច្ចាគជាសម្ភារៈ ថវិកាដែលបានរៃអង្គាសពីសប្បុរសធម៍នានា ទៅកាន់សាលាកុមារគ ថ្លង់មួយក្នុងខេត្តសៀមរាប
ការជិះកង់ជុំវិញបរិវេណប្រាសាទអង្គរវត្ត និងការទស្សនាប្រាសាទបន្ទាយក្តី ប្រាសាទអង្គរវត្ត និង ប្រាសាទតាព្រំ
ការប្រគំតន្ត្រីខ្នាតតូចនាពេលរាត្រី ដោយមានការសម្ដែងចេញពីទេពកោសល្យផ្ទាស់ពីក្រុមនិសិ្សត។
គួរបញ្ជាក់ផងដែរថា កាលពីឆ្នាំមុនៗក្រុមនិស្សិតបាននាំយកអំណោយជាសម្ភារៈសិក្សា សំលៀកបំពាក់ ក៏ដូចជាថវិកាមួយចំនួន ដែលបានមកការបរិច្ចាគរបស់សប្បុរសជននានា និងមួយចំណែកបានមកដោយក្រុមនិស្សិតផ្ទាល់ ទៅជួយកុមារ ដែលកំពុងខ្វះខាត និងកុមារពិការដែលកំពុងស្នាក់នៅតាមបណ្ដាអង្គការមួយចំនួនក្នុងខេត្តកំពង់ស្ពឺ និងបានចូលរួមការដាំដើមកោងកាងនៅក្នុងសហគមន៍ព្រៃលិចទឹកក្នុងខេត្តព្រះសីហនុ ក្នុងគោលដៅជំរុញការអភិរក្ស និងថែរក្សាព្រៃលិចទឹកដែលជាជម្រកដ៏សំខាន់សម្រាប់មច្ឆជាតិនានាដែលមច្ឆជាតិទាំងនោះហើយជាប្រភពចំណូលដ៏សំខាន់សម្រាប់ប្រជាជននេសាទនៅក្នុងសហគមន៍។លើសពីនេះទៅទៀតក្រុមនិសិ្សតទាំងអស់ក៏បានចូលរួមក្នុងការសំអាតនៅតាមតំបន់ទេសចរណ៍សំខាន់ៗមួយចំនួននៅខេត្តដែលយើងរៀបចំកម្មវិធីទៅតាមឆ្នាំនីមួយៗ។
គោលបំណងចម្បងដើម្បីបង្ហាញពីតួនាទីយុវជនកម្ពុជាក្នុងការចូលរួមចំណែកដោះស្រាយបញ្ហាបរិស្ថាន បញ្ហាអាកាសធាតុ និងផ្ដល់ជាគំរូល្អក្នុងការថែទាំបរិស្ថានទៅដល់បងប្អូនប្រជាពលរដ្ឋដែលរស់នៅតាមតំបន់ទេសចរណ៍ នៃព្រះរាជាណាចក្រកម្ពុជា។មួយផ្នែកទៀតយើងក៏ចង់បង្ហាញពីការចូលរួមរបស់យុវជនក្នុងការជួយលើកស្ទួយតំបន់ទេសចរណ៍ក៏ដូចជាជួយសង្គមជាតិទាំងមូលផងដែរ។
ដំណើរទស្សនកិច្ចសិក្សានេះ ទទួលបានការគាំទ្រពី សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច សាកលវិទ្យាល័យលីយ៉ុង II (ប្រទេសបារាំង) ក្រសួងទេសចរណ៍ ក្រសួងអប់រំយុវជន និងកីឡា ក្រសួងបរិស្ថាន ក្រសួងវប្បធម៏ និងវិចិត្រសិល្បៈ សាលាភូមិន្ទរដ្ឋបាល និងការគាំទ្រពីក្រុមហ៊ុនមួយចំនួន៕