- 2019-03-14 03:56:00
- ព័ត៌មាន
មិនដឹងសប្បាយប៉ុណ្ណាទេ! ឆ្នាំនេះ ក្រុងព្រះសីហនុ រៀបចំ "សង្ក្រាន្តសមុទ្រ" នៅឆ្នេរឯករាជ្យ
- 2019-03-14 03:56:00
- ចំនួនមតិ 0 | ចំនួនចែករំលែក 0
មិនដឹងសប្បាយប៉ុណ្ណាទេ! ឆ្នាំនេះ ក្រុងព្រះសីហនុ រៀបចំ "សង្ក្រាន្តសមុទ្រ" នៅឆ្នេរឯករាជ្យ
ចន្លោះមិនឃើញ
ដឹងថាស្អាតកប់ហ្មង! “សង្ក្រាន្តសមុទ្រ" នៅឆ្នេរឯករាជ្យ ក្នុងខេត្តព្រះសីហនុ ដែលនឹងប្រព្រឹត្តិទៅ នៅថ្ងៃទី ១៤ ដល់ ១៦ ខែមេសា ខាងមុខនេះ។ នេះជាព្រឹត្តិការណ៍ធំលើកទី១ សម្រាប់ខេត្តព្រះសីហនុ នៅក្នុងការរៀបចំ "សង្ក្រាន្តសមុទ្រ" ដើម្បីទាក់ទាញភ្ញៀវទេសចរផង និង បង្ហាញពីសក្ដានុពលរបស់ខេត្តផង។
លោក តាំង សុចិត្តគ្រឹស្នា ប្រធានមន្ទីរទេសចរណ៍ខេត្តព្រះសីហនុ បានប្រាប់ Sabay ថា អាចចាត់ទុកបានថានេះជាឆ្នាំទី ០១ ដែលខេត្តព្រះសីហនុ បានត្រៀមរៀបចំសង្ក្រាន្តសមុទ្រ ធំរបស់ខ្លួន ដែលរំពឹងថា ភ្ញៀវទេសចរជាតិ និង អន្ដរជាតិ មកកម្សាន្តក្នុងខេត្តមានការកើនឡើង។
ព្រឹត្តិការណ៍ "សង្ក្រាន្តសមុទ្រ" ត្រៀមរៀបចំរយៈពេល៣ថ្ងៃ គិតចាប់ពីថ្ងៃទី ១៤-១៦ ប៉ុន្ដែក៏នឹងមានការរៀបចំពិព័រណ៍ដ៏ធំមួយទៀត ដែលពិធីនេះនឹងអូសបន្លាយរហូតដល់ថ្ងៃទី ១៨ ទើបចប់។ តាមការបញ្ជាក់របស់ប្រធានមន្ទីរទេសចរណ៍បានឲ្យដឹងថា ព្រឹត្តិការណ៍ធំៗ មានសំខាន់ គឺ៖
១. ការប្រគំតន្ត្រី៖ កម្មវិធីនេះមានការចូលរួម ពីតារាល្បីៗ ទាំងសិល្បករសម័យ និងបុរាណ ឲ្យមានការជួបជុំគ្នា ហើយរួមទាំងមានការរាំលេងកម្សាន្តយ៉ាងសប្បាយនៅតាមតំបន់ឆ្នេរផងដែរ។
២. សកម្មភាពកម្សាន្ត៖ ព្រឹត្តិការណ៍ក៏នឹងបំផុសឲ្យមានការលេងល្បែងប្រជាប្រិយខ្មែរដ៏ពេញនិយមដូចជាបោះឈូង វាយក្អម ទាញព្រ័ត្រ ឡើងសសរខ្លាញ់ លោតអន្ទាក់ភ្លើង លេងពង្រាត់ទីលើឆ្នេរខ្សាច់ និងលាក់កន្សែងជាដើម។ ទន្ទឹមនឹងនេះ ក៏មានការសម្ដែងសៀក នៅតាមឆ្នេរ។ មួយទៀត ក៏មានកម្មវិធីកម្សាន្ត ដូចជាការថតរូប ដែលមានការរៀបចំឲ្យមានទិដ្ឋភាពស្រស់ស្អាតផងដែរ។
៣. ការរៀបចំពិព័រណ៍ទេសចរណ៍ ពាណិជ្ជកម្ម៖ កម្មវិធីនេះ មានការរៀបចំស្តង់ផលិតផលក្នុងស្រុក ស្តង់ម្ហូបអាហារ និង ស្តង់ទេសចរណ៍ ដែលបង្ហាញពីសក្តានុពល និង ការអភិវឌ្ឍនានា របស់ខេត្តព្រះសីហនុ។
កម្មវិធី ក៏មានការរៀបចំកន្លែងស្អាតៗសម្រាប់យុវវ័យបង្ហាញនូវក្តីស្រឡាញ់ចំពោះគ្រួសារ ឪពុក ម្តាយផងដែរ ដូចជាការបង្ហោះគោមដោយភ្ជាប់នឹងពាក្យពេចន៍ជូនពរផ្សេងៗ កន្លែងថតរូបអនុស្សាវរីយ៍ អមជាមួយ ភ្លើងទៀននៅលើឆ្នេរខ្សាច់ ព្រមទាំងមានការបាញ់កាំជ្រួចទៀតផង។
លោក តាំង សុចិត្តគ្រឹស្នា ប្រធានមន្ទីរទេសចរណ៍ប្រចាំខេត្តព្រះសីហនុ បង្ហាញក្ដីរំពឹងថា ភ្ញៀវទេសចរ ជាតិ និងអន្ដរជាតិ នឹងមកកម្សាន្តលេងបានច្រើន ខណៈដែលខេត្តបានខិតខំដោះស្រាយនូវបញ្ហាផ្សេងៗរួចរាល់ហើយ ដូចជា ផ្ទះសំណាក់ សណ្ឋាគារ និងត្រៀមកន្លែងបោះតង់ប្រមាណជា ៥០០តង់ តាមឆ្នេរ។ ក្រៅពីនេះ រដ្ឋបាលខេត្តក៏បានខិតខំជួសជុលផ្លូវ ធ្វើប្រព័ន្ធលូ និងត្រៀមកម្លាំងរួចរាល់ហើយដែរ ដើម្បីរៀបចំសណ្ដាប់ធ្នាប់ ជូនភ្ញៀវទេសចរទាំងឡាយ។
ផ្អែកតាមរបាយការណ៍របស់មន្ទីរទេសចរណ៍ខេត្តព្រះសីហនុ បានឲ្យដឹងថា បច្ចុប្បន្ននេះ ខេត្តព្រះសីហនុមានផ្ទះសំណាក់សរុបជិត ៣០០ សណ្ឋាគារ ជាង៩០ និងការបង្កើតថ្មីនៅសណ្ឋាគារលំដាប់ផ្កាយ ៥មួយចំនួនទៀត ដែលសរុបទៅមានជាង ១ម៉ឺនបន្ទប់ រង់ចាំទទួលស្វាគមន៍ភ្ញៀវទេសចរ ជាតិ និង អន្ដរជាតិ មកទស្សនាខេត្តព្រះសីហនុ។
រូបភាព៖ រដ្ឋបាលខេត្តព្រះសីហនុ