- 2019-03-16 08:00:00
- ការអប់រំ
មិនអន់ទេ! ខ្មែរយើងមានលេខនេះ ជួយជីវិតស្តែងៗ ប្រាប់មុនពីគ្រោះមហន្តរាយ (មានវីដេអូ)
- 2019-03-16 08:00:00
- ចំនួនមតិ 0 | ចំនួនចែករំលែក 0
មិនអន់ទេ! ខ្មែរយើងមានលេខនេះ ជួយជីវិតស្តែងៗ ប្រាប់មុនពីគ្រោះមហន្តរាយ (មានវីដេអូ)
ចន្លោះមិនឃើញ
ប្រព័ន្ធប្រកាសឲ្យដឹងមុន ១២៩៤ គឺលេខទូរសព្ទទាន់ហេតុការណ៍ ទុកសម្រាប់ជូនប្រជាពលរដ្ឋខ្មែរចុះឈ្មោះប្រើប្រាស់ឥតថ្លៃ ដើម្បីទទួលបានព័ត៌មានពីគ្រោះមហន្តរាយធម្មជាតិ និងបញ្ហានានា។
ជារៀងរាល់ឆ្នាំគ្រោះមហន្តរាយតែងនាំបញ្ហារំខានដល់ការរស់នៅ ឬបើធ្ងន់ធ្ងរអាចដល់បាត់បង់ជីវិតមនុស្ស សត្វដោយមិនដឹងដំណឹងមុន។ នេះបើតាមប្រភពពីមន្ត្រី នៃអង្គការក្រៅរដ្ឋាភិបាលមួយ ដែលបានធ្វើការលើផ្នែកនេះ។
កញ្ញា លឿត ចិន្តា អ្នកសរសេរកម្មវិធី នៃអង្គការ People in Need ហៅកាត់ PIN បានប្រាប់ Sabay នៅក្នុងពិពណ៌បច្ចេកវិទ្យាដំបូងគេនៅកម្ពុជា Digital Cambodia ថា លេខទូរសព្ទ Hotline នេះប្រជាពលរដ្ឋអាចចុះឈ្មោះប្រើដោយសេរី ដោយគ្រាន់តែស្ដាប់តាមការណែនាំ។ បន្ទាប់មកលោកអ្នក នឹងអាចទទួលព័ត៌មានមុនយ៉ាងរហ័ស ពេលមានគ្រោះមហន្តរាយ។
សូមទស្សនាវីដេអូរបស់ Development Innovations Cambodia ពីអត្ថប្រយោជន៍ ១២៩៤ និងការជួយជីវិត។
កញ្ញា លឿត ចិន្តា បានបន្តថា ១២៩៤ ប្រជាពលរដ្ឋអាចដឹងដំណឹងមុន ត្រៀមលក្ខណៈទាន់ពេល ដើម្បីរត់រកតំបន់មានសុវត្ថិភាព ទាន់ហេតុការណ៍ និងគេចផុតពីគ្រោះថ្នាក់ដល់ជីវិត។ ព័ត៌មានគ្រោះមហន្តរាយធម្មជាតិនឹងផ្ដល់ដំណឹងចូលមកលេខទូរសព្ទ ដែលបានចុះឈ្មោះចូលប្រព័ន្ធ រាល់១៥នាទីម្ដង ឬមុននេះ ក្នុងករណីតំបន់មានបញ្ហាបន្ទាន់ៗនានា មានដូចជា៖ ករណីខ្យល់កន្ទ្រាក់ ខ្យល់ព្យុះ ទឹកជំនន់ ឬបញ្ហារាំងស្ងួត (ក្នុងករណីមានអាជ្ញាធរថ្នាក់ខេត្តបានរាយការណ៍ចូលប្រព័ន្ធ បន្ទាប់មកនឹងប្រាប់បន្តទៅប្រជាពលរដ្ឋដែលបានភ្ជាប់ ១២៩៤)។
សូមជម្រាបថា ប្រព័ន្ធប្រកាសឲ្យដឹងមុនខាងលើ ត្រូវបានក្រសួងប្រៃសណីយ៍ និងទូរគមនាគមន៍ បានផ្ដល់ឲ្យមកគណៈកម្មការជាតិគ្រប់គ្រងគ្រោះមហន្តរាយ បន្ទាប់មកអាជ្ញាធរក៏បន្តផ្ដល់លេខនេះ មកកាន់អង្គការ People in Need។
តួលេខផ្លូវការ នៃប្រជាពលរដ្ឋកម្ពុជាបានចុះឈ្មោះក្នុងប្រព័ន្ធនេះ មានចំនួនប្រមាណជាង ៧ម៉ឺននាក់ នៅក្នុងតំបន់គោលដៅ ចំនួន ១៥ ខេត្តនៅទូទាំងប្រទេសកម្ពុជា។ កន្លងទៅ បើគិតចំនួនសារជូនដំណឹងជាមុន ដែលបានផ្ញើចេញទៅកាន់ប្រជាពលរដ្ឋ សរុបមានដល់ទៅជាង២១ម៉ឺនសារ ដែលស្ដីពីគ្រោះមហន្តរាយនានា និងការបង្ការជីវិតដ៏មានប្រសិទ្ធភាព។