- 2019-03-20 02:17:40
- ព័ត៌មាន
មន្ត្រីឧទ្យានុរក្សម្នាក់ទៀតហើយបានរងការវាយប្រហារពីជនល្មើសក្នុងបទល្មើសធនធានធម្មជាតិ
- 2019-03-20 02:17:40
- ចំនួនមតិ 0 | ចំនួនចែករំលែក 0
មន្ត្រីឧទ្យានុរក្សម្នាក់ទៀតហើយបានរងការវាយប្រហារពីជនល្មើសក្នុងបទល្មើសធនធានធម្មជាតិ
ចន្លោះមិនឃើញ
មន្ត្រីជាន់ខ្ពស់ក្រសួងបរិស្ថានឲ្យដឹងថាក្នុងរយៈពេលពីរខែចុងក្រោយនេះមានមន្ត្រីឧទ្យានុរក្សចំនួនពីរនាក់ហើយបានរងការវាយប្រហារពីរជនល្មើសក្នុងបទល្មើសធនធានធម្មជាតិ។
អ្នកនាំពាក្យក្រសួងបរិស្ថាន លោក នេត្រ ភក្ត្រា ត្រូវបានដកស្រង់សម្ដីដាក់លើទំព័រហ្វេសប៊ុកក្រសួងបរិស្ថានកាលពីរសៀលម្សិលមិញថា ឧទ្យានុរក្ស ឈ្មោះ ចក់ សុជាតិ បានរងរបួសធ្ងន់ធ្ងរដោយជនល្មើសបានកាប់ចំនួនប្រាំកាំបិតត្រូវចំត្រង់ក ត្រង់ក្បាល និងដៃ។
ហេតុការណ៍នេះ បានកើតឡើងកាលពីម្សិលមិញនៅក្នុងឃុំក្រយា ស្រុកសន្ទុក ខេត្តកំពង់ធំ ខណៈមន្ត្រីឧទ្យានុរក្សប្រាំរូបចុះល្បាត និងបានជួបបុរសពីរនាក់កំពុងកាប់ឆ្ការទន្រានដីព្រៃសម្រាប់ធ្វើចម្ការ។ ប្រភពដដែលបន្តថាឧទ្យានុរក្សទាំងប្រាំនាក់បានដេញចាប់បុរសពីរនាក់ខាងលើ ហើយឧទ្យានុរក្សឈ្មោះ ចក់ សុជាតិ បានទាក់ជើងដួល និងត្រូវបានជនល្មើសវាយប្រហារដោយកាំបិត។ ឯមន្ត្រីបួនរូបផ្សេងទៀតមិនរងរបួសនោះទេ ខណៈជនបង្កបានរត់គេចខ្លួន។
ប្រភពខាងលើឲ្យដឹងដែរថាកាលពីចុងខែមករា ឆ្នាំ២០១៩ មន្ត្រីឧទ្យានម្នាក់ឈ្មោះ ចេង ចាន់ធី ត្រូវបានក្រុមព្រានព្រៃប្រដាប់ដោយកាំភ្លើងបាញ់ប្រហារមកលើ ធ្វើឱ្យរបួស ចំភ្លៅ អំឡុងពេលនៃការចុះបង្ក្រាបបទល្មើសសត្វព្រៃក្នុងភូមសាស្ត្រនៃដែនជម្រកសត្វព្រៃស្រែពកក្នុងខេត្តមណ្ឌលគិរី។
អ្នកនាំពាក្យក្រសួងបរិស្ថាន លោក នេត្រ ភក្ត្រា បានថ្កោល ទោសចំពោះអំពើនេះ និងថាមន្ត្រីមានសមត្ថកិច្ចបំពុងស៊ើបអង្កេត និងកសាងសំណុំរឿងបញ្ជូនទៅតុលាការ។
លោក នេត្រ ភក្ត្រា បញ្ជាក់ថា បច្ចុប្បន្ននេះ ក្រសួងបរិស្ថានមានមន្ត្រីឧទ្យានុរក្សចំនួន ១ ២២១ នាក់ដែលកំពុងតែការពារនិងអភិរក្សតំបន់ការពារធម្មជាតិ និងរបៀងអភិរក្សជីវៈចម្រុះចំនួនជិត ៦០កន្លែង ដែលមានទំហំប្រមាណ ៧,៥លានហិកតា៕