ជប៉ុនផ្ដល់ជំនួយដល់កម្ពុជាសរុបជាង ៣ពាន់លានដុល្លារ ក្រោមជំនួយ ODA គិតត្រឹមឆ្នាំ២០១៨

2019-03-29 03:04:44
សេដ្ឋកិច្ច

2019-03-29 03:04:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រទេសជប៉ុនបានផ្ដល់ប្រាក់ជំនួយដល់ប្រទេសកម្ពុជាប្រមាណជា ៣ពាន់៩រយលានដុល្លារអាមេរិក ក្រោមជំនួយ ODA គិតត្រឹមឆ្នាំសារពើពន្ធ ២០១៨។ នេះបើយោងតាមខ្លឹមសារសន្ទរកថារបស់ ឯកឧត្ដម ហូរីណូអ៊ុជិ ហ៊ីដេហ៊ីសា ឯកអគ្គរាជទូតវិសាមញ្ញ និងពេញសមត្ថភាពរបស់ប្រទេសជប៉ុនប្រចាំព្រះរាជាណាចក្រកម្ពុជាដែលបានថ្លែងក្នុងកម្មវិធីបើកទស្សនកិច្ចអ្នកសារព័ត៌មានស្ដីអំពីជំនួយ ODA ជប៉ុន២០១៩ កាលពីថ្ងៃទី ២៦ មីនា កន្លងទៅ នៅស្ថានទូតជប៉ុនប្រចាំព្រះរាជាណាចក្រកម្ពុជា។

អស់រយៈពេល ៣០ឆ្នាំចុងក្រោយនេះ យើងបាន និងកំពុងគាំទ្រដល់កម្ពុជាចាប់ពីដំណើរការសន្ដិភាពដំបូងតាមរយៈការកសាងឡើងវិញជាបន្តបន្ទាប់ និងរហូតដល់ការអភិវឌ្ឈន៍សេដ្ឋកិច្ច។ រដ្ឋាភិបាលជប៉ុនបានផ្ដល់ជំនួយដល់កម្ពុជាជាង ៣ពាន់ដុល្លារអាមេរិក ក្រោមជំនួយ ODA គិតត្រឹមឆ្នាំសារពើពន្ធ ២០១៨។ នេះជាការលើកឡើងរបស់ឯកអគ្គរាជទូតជប៉ុនប្រចាំនៅកម្ពុជា។ ឯកឧត្ដម ហូរីណូអ៊ុជិ ហ៊ីដេហ៊ីសា បានបន្តទៀតថា ប្រទេសជប៉ុនគាំទ្រដល់ការពង្រឹងបន្ថែមនូវគ្រឹះសេដ្ឋកិច្ចសង្គម ដើម្បីកម្ពុជាសម្រេចបាននូវឋានៈជាប្រទេសដែលមានចំណូលមធ្យមកម្រិតខ្ពស់ត្រឹមឆ្នាំ ២០៣០ ដោយផ្ដោតលើវិស័យអាទិភាពចំនួន ៣៖

១. ការអភិវឌ្ឍន៍ឧស្សាហកម្ម
២. ការផ្ដល់នូវគុណភាពនៃជីវភាពរស់នៅប្រសើរជាងមុន
៣. ការជំរុញឲ្យមានសង្គមប្រកបដោយនិរន្តភាពតាមរយៈការពង្រឹងអភិបាលកិច្ច។

ប្រទេសជប៉ុនកំពុងធ្វើការរួមគ្នាជាមួយប្រទេសកម្ពុជាក្នុងវិស័យជាច្រើនទៀត។ កិច្ចការទាំងនេះរួមមាន ការកសាងហេដ្ឋារចនាសម្ពន្ធសេដ្ឋកិច្ចសង្គមដូចជាផ្លូវថ្នល់ កំពង់ផែ មន្ទីរពេទ្យ សាលារៀន ធនធានមនុស្ស និងប្រព័ន្ធផ្គត់ផ្គង់ទឹក ការលុបបំបាត់គ្រាប់មីន និងយុទ្ធភណ្ឌមិនទាន់ផ្ទុះ និងការជំរុញការវិនិយោគជាដើម។ ការបញ្ជាក់ថា កិច្ចខិតខំប្រឹងប្រែងរបស់យើងត្រូវបានយល់ដឹងយ៉ាងត្រឹមត្រូវ និងគាំទ្រពីប្រទេសកម្ពុជានិងជប៉ុនគឺសំខាន់។ ដូច្នេះតួនាទីរបស់ប្រព័ន្ធផ្សព្វផ្សាយគឺមិនអាចខ្វះបានទេក្នុងការសម្រេចគោលបំណងនេះ៕

រាយការណ៍ដោយ៖ លោក ទូច សុខា អ្នកសារព័ត៌មាន Sabay

អត្ថបទ៖ ប៊ិន ប៊ុណ្ណា