កម្ពុជាសម្រេចកាត់ថ្ងៃឈប់សម្រាក ៧ ថ្ងៃ

2019-03-29 05:10:36
ព័ត៌មាន

2019-03-29 05:10:36
ចំនួនមតិ 0 | ចំនួនចែករំលែក 0

ចន្លោះមិនឃើញ

រាជរដ្ឋាភិបាលកម្ពុជាសម្តេចតេជោ ហ៊ុន សែន បានសម្រេចកាត់ថ្ងៃឈប់សម្រាកចំនួន ៧ ថ្ងៃ ដែលត្រូវអនុវត្តចាប់ពីឆ្នាំ ២០២០ តទៅ។ ការថ្លែងរបស់សម្ដេចបែបនេះត្រូវបានធ្វើឡើងក្នុងវេទិការាជរដ្ឋាភិបាល ផ្នែកឯកជនលើកទី១៨ នៅថ្ងៃទី ២៩ ខែមីនា នេះ។

សម្ដេចតេជោបានចាត់ទុកការកាត់ថ្ងៃឈប់សម្រានេះ គឺជាការកែទម្រង់មួយ និងបង្កលក្ខណៈងាយស្រួលមួយដល់អ្នកវិនិយោគនៅកម្ពុជា។ យ៉ាងណាមិញសម្រាប់ថ្ងៃឈប់សម្រាកបុណ្យជាតិធំ ធំៗដូចជាបុណ្យចូលឆ្នាំថ្មី បុណ្យភ្ជុំបិណ្ឌ និងបុណ្យអុំទូកជាដើមនៅរក្សាចំនួនបីថ្ងៃដដែល។ ប៉ុន្តែចំពោះបុណ្យចម្រើនព្រះជន្មព្រះមហាក្សត្រ ដែលពីមុនមានបីថ្ងៃ នឹងត្រូវអនុញ្ញាតឱ្យឈប់សម្រាកតែមួយថ្ងៃប៉ុណ្ណោះ។

សម្ដេចបានសុំការយោគយល់ពីជនរួមជាតិចំពោះការកាត់បន្ថយថ្ងៃឈប់សម្រាកនេះ ខណៈកម្ពុជាមានថ្ងៃឈប់សម្រាកច្រើនជាងប្រទេស វៀតណាម ថៃ និងសិង្ហបុរីជាដើម។

ប្រទេសទាំងអស់នៅលើពិភពលោក សុទ្ធតែមានថ្ងៃឈប់សម្រាកប្រចាំឆ្នាំ (Public Holiday) ដោយមានចែកជាថ្ងៃបុណ្យជាតិ បុណ្យអន្តរជាតិ និងបុណ្យសាសនាជាដើម។ បើយោងតាម វេបសាយ Worldatlas ប្រទេសដែលមានថ្ងៃឈប់សម្រាកប្រចាំឆ្នាំច្រើនបំផុត ត្រូវបានចាត់ចំណាត់ថ្នាក់ និងបានធ្វើកំណែប្រែចុងក្រោយបំផុតនៅខែមេសា ឆ្នាំ២០១៧។

១. ស្រីលង្កា៖ ២៥ថ្ងៃ
២. ឥណ្ឌា៖ ២១ថ្ងៃ
៣. កូឡុំប៊ី ហ្វីលីពីន ទ្រីនីដេត និងតូបាហ្គោ៖ ១៨ថ្ងៃ
៤. ចិន និង ហុងកុង៖ ១៧ថ្ងៃ
៥. ថៃ តួកគី និងប៉ាគីស្ថាន៖ ១៦ថ្ងៃ
៦. ជប៉ុន ម៉ាឡេស៊ី អាហ្សង់ទីន លីទុយអានី វៀតណាម ស៊ុយអ៊ែត៖ ១៥ថ្ងៃ
៧. ឥណ្ឌូណេស៊ី ឈីលី និងស្លូវ៉ាគី៖ ១៤ថ្ងៃ
៨. កូរ៉េខាងត្បូង អូទ្រីស ប៊ែលហ្សិក ណ័រវ៉េ និងតៃវ៉ាន់៖ ១៣ថ្ងៃ
៩. ហ្វាំងឡង់ និងរុស្ស៊ី៖ ១២ថ្ងៃ
១០. សិង្ហបុរី អ៊ីតាលី ដាណឺម៉ាក បារាំង អារ៉ាប់រួម ម៉ារ៉ុក សាធារណរដ្ឋឆេក និងលុចហ្សំបួរ៖ ១១ថ្ងៃ។

ចំពោះប្រទេសកម្ពុជា មិនត្រូវបានវិបសាយខាងលើ ចាត់ថ្នាក់ឡើយ ប៉ុន្តែបើយោងតាមអនុក្រឹត្យរបស់រាជរដ្ឋាភិបាលថ្ងៃឈប់សម្រាកប្រចាំឆ្នាំនៅកម្ពុជាមានចន្លោះពី ២៨ ថ្ងៃទៅ៣០ ថ្ងៃ។

អត្ថបទ៖ សុផល