- 2019-03-30 02:09:03
- ព័ត៌មាន
តៃវ៉ាន់គ្រោងបង្កើតច្បាប់ប្រហារជីវិតសម្រាប់អ្នកបើកបរមានជាតិស្រវឹងបណ្ដាលឲ្យអ្នកដទៃស្លាប់
- 2019-03-30 02:09:03
- ចំនួនមតិ 0 | ចំនួនចែករំលែក 0
តៃវ៉ាន់គ្រោងបង្កើតច្បាប់ប្រហារជីវិតសម្រាប់អ្នកបើកបរមានជាតិស្រវឹងបណ្ដាលឲ្យអ្នកដទៃស្លាប់
ចន្លោះមិនឃើញ
តៃវ៉ាន់គ្រោងនឹងបង្កើនការដាក់ទណ្ឌកម្មចំពោះអ្នកដែលបង្កគ្រោះថ្នាក់ចរាចរណ៍សម្រាប់អ្នកស្រវឹងហើយបើកបរ រួមមានការកាត់ទោសប្រហារជីវិត បើវាជាករណីធ្ងន់ធ្ងរបំផុត។ នេះបើតាម Channel News Asia ចុះផ្សាយកាលពីថ្ងៃព្រហស្បតិ៍។
គណៈរដ្ឋមន្ត្រីតៃវ៉ាន់កាលពីថ្ងៃទី ២៨ ខែមីនា បានធ្វើវិសោធនកម្មក្រមព្រហ្មទណ្ឌដោយបញ្ចូលទោសប្រហារជីវិតសម្រាប់អ្នកស្រវឹងបើកបរ ប្រសិនបើអំពើនោះត្រូវបានរកឃើញថាជា "ចេតនា"។
សំណើនេះត្រូវការការអនុម័តពីសភា។ សេចក្តីព្រាងច្បាប់នេះបានកើតឡើងបន្ទាប់ពីអត្រាការស្លាប់បាត់បង់ជីវិតដោយសារគ្រោះថ្នាក់ចរាចរណ៍មានកម្រិតខ្ពស់ ដែលបានបង្កឱ្យមានកំហឹងមហាជនរីករាលដាលឡើង។
បច្ចុប្បន្ន ការផ្ដន្ទាទោសអតិបរមានៅតៃវ៉ាន់ចំពោះអ្នកបើកបរមានជាតិស្រវឹង ហើយបណ្ដាលឲ្យអ្នកដទៃស្លាប់ គឺត្រូវជាប់ពន្ធនាគារ១០ឆ្នាំ។
ប៉ុន្តែប្រសិនបើច្បាប់ចរាចរណ៍ថ្មីរបស់តៃវ៉ាន់ចូលជាធរមាន អ្នកប្រព្រឹត្តបទល្មើសនឹងត្រូវបានបន្ថែមរយៈពេលជាប់ពន្ធនាគារ ប្រសិនបើពួកគេបង្កកំហុសច្រំដែលក្នុងរយៈពេល៥ឆ្នាំ។
ជាងនេះទៅទៀត បើអ្នកស្រវឹងបើកបរបណ្ដាលឲ្យអ្នកដទៃស្លាប់ទោះត្រូវបានតុលាការរកឃើញថា អំពើនោះបើទោះបីមិនមែនកើតឡើងដោយកំហុស "ចេតនា" ក៏ដោយ ក៏អ្នកប្រព្រឹត្តបទល្មើសប្រឈមនឹងការជាប់ពន្ធនាគារអស់មួយជីវិតដែរ ឬ ជាប់គុក១២ឆ្នាំបើបង្កឲ្យមានរបួសធ្ងន់ធ្ងរ។
នៅក្នុងករណីដ៏រន្ធត់មួយកាលពីខែមករា បុរសវ័យ ៤០ ឆ្នាំម្នាក់បានបើកបរក្រោមស្ថានភាពស្រវឹង ដោយបានបើកឡាន១២កៅអីរបស់គាត់បុកនឹងឡានតាក់ស៊ី បណ្ដាលឲ្យមនុស្ស៣ នាក់ស្លាប់ និង ៣នាក់រងរបួសរួមនឹងរូបគាត់ផងដែរ។
មានប្រទេសតិចតួចបំផុតដែលបានកាត់ទោសប្រហារជីវិតសម្រាប់ករណីបើកបរដែលមានជាតិស្រវឹង។ ចិនធ្លាប់បានប្ដេជ្ញាថានឹងប្រហារជីវិតអ្នកបង្កគ្រោះថ្នាក់ចរាចរណ៍ ខណៈដែលរដ្ឋមួយចំនួននៅសហរដ្ឋអាមេរិក ក៏មានទោសប្រហារជីវិតសម្រាប់ករណីចរាចរណ៍នេះផងដែរ។
កាលពីឆ្នាំ ២០១៤ បុរសម្នាក់នៅរដ្ឋតិចសាស់ត្រូវបានចោទប្រកាន់ពីបទឃាតកម្ម បន្ទាប់ពីគាត់បានបើកឡានរបស់គាត់ចូលទៅក្នុងហ្វូងមនុស្ស ហើយសម្លាប់មនុស្ស ៤ នាក់។
ទោសប្រហារជីវិតរបស់តៃវ៉ាន់ ធ្លាប់បានធ្វើទៅលើបុរសម្នាក់ដែលបានសម្លាប់ប្រពន្ធហើយនិងកូនខ្លួនឯងកាលពីខែកញ្ញា ហើយនេះគឺជាការកាត់ទោសប្រហារជីវិតលើកទី១ក្រោមរដ្ឋបាលរបស់លោកស្រីប្រធានាធិបតី សៃ អ៊ីងវ៉េន (Tsai Ing-wen) ដែលបានឡើងកាន់តំណែងក្នុងឆ្នាំ ២០១៦៕