- 2019-04-02 07:46:57
- ចរាចរណ៍
ឯកឧត្ដម ស៊ុន ចាន់ថុល ពោលចំៗ អាណិតនគរបាល ព្រោះអ្នកបើកបរមិនអើពើគោរពច្បាប់
- 2019-04-02 07:46:57
- ចំនួនមតិ 0 | ចំនួនចែករំលែក 0
ឯកឧត្ដម ស៊ុន ចាន់ថុល ពោលចំៗ អាណិតនគរបាល ព្រោះអ្នកបើកបរមិនអើពើគោរពច្បាប់
ចន្លោះមិនឃើញ
“មែនទែនខ្ញុំអាណិតនគរបាលយើងណាស់ …គាត់ឈរតាមផ្លូវ…ឃើញអ្នកបើកម៉ូតូអត់ពាក់មួក មកវ៉ូ…គាត់ស្ទាក់ អាម៉ូតូមួយទៀតរត់កាត់ទៅបាត់ទៀត…នៅស្រុកគេម៉ូតូដេញភ្លាម វ៉ៃខ្នោះតែម្តង។ អញ្ចឹងយើងអាណិតមន្ត្រីយើង គាត់ឈរហាលថ្ងៃផង ឯងជិះម៉ូតូអត់ពាក់មួក គេចង់ចាប់ ឯងអត់ឈប់ ហើយគេចចង់បុកទាំងប៉ូលីសថែមទៀត”។ ទាំងនេះជាចំណាប់អារម្មណ៍របស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន បានពោលចំៗ អាណិត នគរបាលចរាចរណ៍ ដែលប្រចាំការនៅតាមគោលដៅស្តុបនានា ក្នុងទីក្រុងភ្នំពេញ។
ថ្លែងក្នុងឱកាសត្រួតពិនិត្យការដ្ឋានស្ពានជ្រោយចង្វារកាលកាលពីចុងសប្ដាហ៍មុន ឯកឧត្ដម ស៊ុន ចាន់ថុល បានមានប្រសាសន៍ថា កន្លងមកនគរបាលតែងមានចំណាត់ការលើអ្នកបើកបរល្មើសច្បាប់ ប៉ុន្តែមានអ្នកបើកបរមួយចំនួនបែរជានៅតែ បើកបរលើសល្បឿនកំណត់ ដឹកសំពីងសំពោង និងមិនគោរពភ្លើងសញ្ញាជាដើម ខណៈយានយន្តគ្រប់ប្រភេទធ្វើចរាចរនៅតាមដងផ្លូវមានរាប់សែន រាប់លានគ្រឿង។ ដូច្នេះក្នុងនាមប្រជាពលរដ្ឋល្អ ត្រូវមានតួនាទី និងកាតព្វកិច្ចគោរពច្បាប់ ដោយមិនចាំបាច់ឱ្យនគរបាលចរាចរណ៍ហត់នឿយឡើយ។
“វប្បធម៌នេះត្រូវតែកែ កុំឱ្យតែរដ្ឋាភិបាលម្នាក់ឯងធ្វើការ ខ្លួនយើងប្រជារាស្ត្រត្រូវតែធ្វើការទាំងអស់គ្នា ទើបយើងអាចចូលរួមកសាងប្រទេសជាតិបាន។ ដូច្នេះ មិនមែនតែរដ្ឋាភិបាលម្នាក់ទេអាចធ្វើបាន ប្រជារាស្ត្រទាំងអស់គ្នាត្រូវតែចូលរួមធ្វើការ និងអនុវត្ត ច្បាប់ទាំងអស់គ្នា”។
ខណៈបញ្ហាគ្រោះថ្នាក់ចរាចរណ៍បានបន្តកើតមានឡើងជា រៀងរាល់ថ្ងៃនោះ កាលពីសប្ដាហ៍មុនសម្ដេចតេជោ ហ៊ុន សែន បានលើកឡើងថា ករណីគ្រោះថ្នាក់ចរាចរណ៍គឺជាចំណុចដ៏គួរឱ្យព្រួយបារម្ភ និងបានបណ្ដាលឱ្យមនុស្សស្លាប់ច្រើនជាងសម័យសង្គ្រាមទៅទៀត។ បច្ចុប្បន្នគ្រោះថ្នាក់ចរាចរណ៍បានឆក់យកអាយុជីវិតមនុស្សចន្លោះពី ៦នាក់ទៅ៧ នាក់ក្នុងមួយថ្ងៃ និងបានធ្វើឱ្យកម្ពុជាខាតបង់ថវិកាជាង ៣០០លានដុល្លារអាមេរិក ក្នុងមួយឆ្នាំ។ របាយការណ៍កន្លងមកបានបង្ហាញថា មូលហេតុចម្បង ដែលបណ្ដាលឲ្យមានគ្រោះថ្នាក់ចរាចរណ៍គឺល្បឿន ប្រជែង និងមិនប្រកាន់ស្តាំជាដើម៕