- 2019-04-03 04:29:22
- ការអប់រំ
ជើងខ្លាំងក្នុងថ្នាក់ស្រីម្នាក់គត់ ប្រាប់ថានឹងប្តេជ្ញាចាប់អាជីពផ្សារដែកឲ្យល្អបំផុត ព្រោះហេតុផល២
- 2019-04-03 04:29:22
- ចំនួនមតិ 0 | ចំនួនចែករំលែក 0
ជើងខ្លាំងក្នុងថ្នាក់ស្រីម្នាក់គត់ ប្រាប់ថានឹងប្តេជ្ញាចាប់អាជីពផ្សារដែកឲ្យល្អបំផុត ព្រោះហេតុផល២
ចន្លោះមិនឃើញ
នេះអាចចាត់ទុកថា ជារឿងប្លែកមួយ ហើយមានមនុស្សស្រីតិចណាស់ ហ៊ានលះបង់ និងប្រថុយទៅរៀនជំនាញផ្សារដែក ដែលមនុស្សទូទៅតែងគិតថា វាជាការងាររបស់មនុស្សប្រុស។
អ្នកជំនាញផ្សារដែកអាជីព នៅសហរដ្ឋអាមេរិក ជាមធ្យមអាចរកចំណូលបានចន្លោះពី ៣ ២០០ ទៅ ៣ ៤០០ដុលា្លរ ក្នុង១ខែ ឬស្នើ ៤១ ៦០០ដុល្លារក្នុងឆ្នាំ។ នេះបើតាមតួលេខពីនាយក នៃមជ្ឈមណ្ឌលបណ្ដុះបណ្ដាលវិជ្ជាជីវៈជាន់ខ្ពស់។
ធ្វើអ្វីសូមធ្វើចេញពីចិត្តស្រលាញ់ កុំគិតថាខ្លួនជាស្រី អាយុច្រើនធ្វើមិនបាន! នេះជាសម្ដីរបស់សិស្សស្រីចំណាស់ជនជាតិអាមេរិកកាំង ដែលមានបំណងក្លាយខ្លួនជាអ្នកផ្សារដែកអាជីព ក្រោមហេតុផល២យ៉ាង។
អ្នកស្រី Cristina Velez មានអាយុ ៥១ឆ្នាំ ជាសិស្សស្រីចំណាស់ តែម្នាក់គត់ក្នុងជំនាញខាងលើ សម្រាប់ឆ្នាំសិក្សា ២០១៩នេះ។ បច្ចុប្បន្ន អ្នកស្រី កំពុងបន្តការសិក្សា ក្នុងថ្នាក់រៀនជំនាញផ្សារដែក ក្នុងមជ្ឈមណ្ឌលបណ្ដុះបណ្ដាលវិជ្ជាជីវៈជាន់ខ្ពស់ នៃមហាវិទ្យាល័យសហគមន៍ Valenciaដែលមានទីតាំងនៅក្នុងទីក្រុង Orlando នៃរដ្ឋ Florida។
អ្នកស្រី Cristina Velez មានអាយុ ៥១ឆ្នាំ មានទីតាំងកំណើតនៅក្នុងដែនកោះព័រតូរីកូ (Puerto Rico) នៃសហរដ្ឋអាមេរិក បានប្រាប់អ្នកយកព័ត៌មាន Sabay ថា ហេតុផលទី១ ដែលមករៀននៅទីនេះ គឺអ្នកស្រីស្រលាញ់ជំនាញផ្សារដែកនេះ រួមនឹងមានការគាំទ្រពីក្រុមគ្រួសារស្រាប់ផងដែរ។ ដូច្នេះពេលនេះ គឺវាមិនទាន់យឺតពេលទេសម្រាប់ខ្លួនដែលត្រូវមករៀន។
ហេតុផលទី២ អ្នកស្រីចង់ក្លាយជាស្ត្រីដែលមានអាជីពផ្សារដែក ដែលមានចំណេះដឹងខ្ពស់មិនមែនគ្រាន់តែធ្វើកូនជាងតូចតាច ឬធ្វើការដើម្បីតែលុយតែមួយមុខនោះទេ។ គិតមកដល់ពេលនេះ អ្នកស្រីបានរៀនអស់រយៈពេល ជាង២ខែហើយសម្រាប់ជំនាញខាងលើ ដែលក្នុងថ្នាក់រៀន គឺមានសិស្សស្រីតែម្នាក់គត់សម្រាប់ឆ្នាំសិក្សា ២០១៩នេះ។
យ៉ាងនេះក្ដី អ្នកស្រី Cristina Velez បញ្ជាក់ថា ទោះមានតែស្រីម្នាក់ឯងក៏ពិតមែន តែអ្នកស្រី មិនដែលមានអារម្មណ៍ឯកា ឬពិបាកក្នុងការរៀនទេ ព្រោះមហាវិទ្យាល័យ ដែលអ្នកស្រីកំពុងរៀន គឺមានសម្ភារៈទំនើបឲ្យសិស្សរៀន ដូចជាម៉ាស៊ីនកាត់ដែកគ្រប់ធុន គ្រប់តម្រូវការ និងមានគ្រូបណ្ដុះបណ្ដាលក៏មានជំនាញល្អ ជាហេតុមិនពិបាកសម្រាប់អ្នកស្រីរៀន។
អ្វីដែលធ្វើឲ្យអ្នកស្រីកាន់តែសប្បាយចិត្ត ឱកាសការងារក្រោយរៀនចប់ ព្រោះមជ្ឈមណ្ឌលបណ្ដុះបណ្ដាលវិជ្ជាជីវៈជាន់ខ្ពស់ ដែលអ្នកស្រីកំពុងរៀនសព្វថ្ងៃ គឺមានកិច្ចសហការការងារឲ្យសិស្ស ហ្វឹកហាត់ និងផលិតឧបករណ៍ធ្វើពីដែកពិសេសៗ ដូចជា គន្លឹះដែក ទុកសម្រាប់ទីភ្នាក់ងារសហព័ន្ធអវកាសជាតិ នៃសហរដ្ឋអាមេរិក ឬហៅកាត់ NASAជាប្រចាំផងដែរ។
បើតាមលោក Michale Kepner ជានាយក នៃមជ្ឈមណ្ឌលបណ្ដុះបណ្ដាលវិជ្ជាជីវៈជាន់ខ្ពស់ បានឲ្យដឹងថា លោកមានការលើកទឹកចិត្តជានិច្ច សម្រាប់សិស្សមកពីគ្រប់ទីកន្លែង ពិសេសស្ត្រី ដើម្បីចាប់យកជំនាញ ដ៏ពិតប្រាកដសម្រាប់ជីវិត។ លោកថា សាលាមានត្រៀមឧបករណ៍ល្អ ៗទុកជូនសិស្ស ដែលក្នុងនោះមានម៉ាស៊ីនកាត់ដែកធុនធំ ចំនួន ៤គ្រឿង ដែលក្នុង១គ្រឿង តម្លៃជិត ១០ម៉ឺនដុល្លារ ដើម្បីទុកឲ្យសិស្សប្រើការ ហ្វឹកហាត់រៀនសូត្រ។
សូមបញ្ជាក់ថា បើតាមនាយកមជ្ឈមណ្ឌលខាងលើ បានបន្ថែមថា ចំពោះមជ្ឈមណ្ឌលបណ្ដុះបណ្ដាលវិជ្ជាជីវៈជាន់ខ្ពស់ ក្រៅពី អ្នកស្រី Cristina បើគិតតាំងពីសាលាចាប់ផ្ដើមមក ជំនាញសម្រាប់ជំនាញផ្សារដែកនេះ មានស្ត្រីចំនួន៥នាក់តែប៉ុណ្ណោះដែលបានបញ្ចប់ការសិក្សា ហើយបើសរុបទាំងCristina គឺ៦នាក់។
រាយការណ៍ផ្ទាល់ពីសហរដ្ឋអាមេរិកដោយ៖ ពៅ រក្សា អ្នកសារព័ត៌មាន Sabay