- 2019-04-09 04:55:25
- ជំនឿ
អ្នកឆ្នាំកុរឆ្នាំ២០១៩ គួរមកស្វែងយល់ពីទិស ហុង ស៊ុយ របស់ខ្លួន
- 2019-04-09 04:55:25
- ចំនួនមតិ 0 | ចំនួនចែករំលែក 0
អ្នកឆ្នាំកុរឆ្នាំ២០១៩ គួរមកស្វែងយល់ពីទិស ហុង ស៊ុយ របស់ខ្លួន
ចន្លោះមិនឃើញ
សម្រាប់បុណ្យចូលឆ្នាំខ្មែរ ឆ្នាំកុរ នៅសល់មិនដល់១សប្ដាហ៍ទៀតទេនឹងមកដល់ហើយ។ ដូច្នេះ ថ្ងៃនេះ Sabay សូមបង្ហាញអំពីហុងស៊ុយ នៃទិសរបស់ឆ្នាំកុរ តើទិសណាជាទិសល្អសម្រាប់ឆ្នាំ២០១៩នេះ។ ក្នុងឆ្នាំនេះ ទិសមង្គលមានចំនួន០៤ គឺទិសលិច ទិសកើត ទិសជើង និងទិសជើងឆៀងលិច។ ឯទិស៤ផ្សេងទៀត ទទួលរងឥទ្ធិពលផ្កាយគ្រោះ។ យ៉ាងណាក៏ដោយ ដើម្បីអាចចាប់យកថាមពលល្អៗ ដែលកើតឡើងក្នុងទិសមង្គល និងការពារគ្រោះដែលនឹងនាំមកដោយអបមង្គល យើងគួរឈ្វេងយល់និងរៀបចំតាមទិសដូចខាងក្រោម៖
១. ទិសលិច៖ ជាទិសសិរីសួស្ដី ទទួលឥទ្ធិពលផ្កាយជោគលេខ១ ប្រចាំឆ្នាំ។ នៅពេលដែលផ្ដាយលេខ១ រះចំទិសខាងលិច ឥទ្ធិពលរបស់វាត្រូវបានពង្រឹងបន្ថែម ដោយធាតុប្រចាំទិស។ អាស្រ័យហេតុនេះ ទិសខាងលិចគឺជាទិសមង្គលបំផុតមួយក្នុងឆ្នាំនេះ។ ទិសនេះនឹងនាំជោគលាភ សិរីសួស្ដី ជោគការងារ។ បុគ្គលដែលរស់នៅក្នុងផ្ទះសម្បែងបែរមុខទៅខាងលិច ឬមានកន្លែងរកស៊ី អគារការិយាល័យដែលបែរចំទិសលិចក៏នឹងទទួលបានជោគលាភច្រើនអនេក។ ក្នុងឆ្នាំ២០១៩ ទ្វារ ឬបង្អួចដែលថិតនៅទិសនេះ គួរបើកចំហជាញឹកញាប់។ មិនត្រឹមតែប៉ុណ្ណោះ រឿងមង្គលជាច្រើននឹងកើតឡើងបន្ថែមទៀតប្រសិនបើ មានទឹក មានអាងត្រី ឬរូបសំណាកសត្វនាគដាក់បន្ថែមក្នុងទិសនេះ។
២. ទិសកើត៖ ជាទិសមង្គលនាំមកនូវជោគលាភការងារ និងជំនួយពីមនុស្សមានឥទ្ធិពលដោយសារផ្កាយជោគលេខ ៦។ ប៉ុន្ដែធាតុរបស់ផ្កាយនេះមិនសមប្រកបជាមួយធាតុរបស់ទិសកើតឡើយ។ ដើម្បីអាចកែប្រែបញ្ហាជម្លោះធាតុនេះ និងទទួលយកនូវសិរីមង្គលពីផ្កាយលេខ៦ បាន ធាតុទឹកត្រូវតែមានវត្តមាននៅទិសខាងកើត។ ដូចនឹងទិសខាងលិចដែរ មានទឹក មានអាងត្រី ឬរូបសំណាកសត្វនាគដាក់បន្ថែមនៅទិសនេះ នឹងនាំមកនូវមង្គលច្រើនអនេក។
៣. ទិសជើង៖ ទិសនេះនាំមកនូវជោគលាភទំនាក់ទំនង។ គេក៏គួរតែពង្រឹងបន្ថែមដោយធាតុទឹកតូច។ ដាក់ពាង អាងត្រី និងសត្វនាគ នៅទិសនេះនឹងនាំជោគលាភខាងការងារបន្ថែម ដល់បុគ្គលដែលរស់នៅក្នុងផ្ទះ។ ផ្ទុយទៅវិញ បើមានធាតុទឹកធំ ដូចជាទន្លេបឹងបួរ ឬអាងហែលទឹក បុគ្គលដែលរស់នៅក្នុងផ្ទះប្រែមានអារម្មណ៍រវើរវាយ ស្រើបស្រាលជាសព្វមួយដង អាចឈានដល់ភាពផិតក្បត់។
៤. ទិសជើងឆៀងលិច៖ ទិសនេះជាទិសមង្គលដែលនាំមកនូវជោគលាភខាងទំនាក់ទំនង និងឱកាសការងារល្អៗ សម្រាប់ពេលអនាគត។ គេអាចពង្រឹងបន្ថែមនូវឥទ្ធិពលផ្កាយនេះ ដោយប្រើប្រាស់ធាតុភ្លើងបន្ថែមទៀត។ គួរបើកភ្លើងបំភ្លឺជាប្រចាំ និងរៀបចំទីកន្លែងនេះ បានស្អាតបាត នឹងនាំលាភសំណាងបន្ថែមដល់បុរសមេគ្រួសារ។
សម្រាប់ទិសមិនសូវល្អមានដូចជា៖
៥-៦. ទិសត្បូង, ទិសត្បូង ឆៀង កើត៖ ទិសត្បូងទទួលរងឥទ្ធិពលផ្កាយជម្លោះ ដែលនាំកនូវរឿងរ៉ាវឈ្លោះប្រកែក និងការយល់ខុសនានា។ ទិសត្បូងឆៀងកើត នាំមកនូវភាពស៊យ ដូចជាការបាត់បង់ទ្រព្យជាដើម។ ធាតុភ្លើងគួរបំពាក់នៅទិសទាំងពីរនេះ ហើយបើកបំភ្លឺជាប្រចាំដើម្បីបង្ក្រាបផ្កាយគ្រោះ។
៧-៨. ទិសត្បូងឆៀងលិច និងទិសជើងឆៀងកើត៖ ទិសនេះប្រឈមជាមួយផ្កាយគ្រោះលេខ៥ និងផ្កាយគ្រោះលេខ២ ដែលនាំមកនូវ ឧបសគ្គ និងភាពតានតឹង គ្រប់បែបយ៉ាង ព្រមទាំងជំងឺ ឈឺថ្កាត់នានា។ ឥទ្ធិពលផ្កាយគ្រោះទាំងពីរមានសភាពខ្លាំងក្លាយដោយសារឥទ្ធិពលធាតុប្រចាំទិស។ បុគ្គលទាំងឡាយដែលរស់ក្នុងផ្ទះបែរទៅទិសទាំងពីរគួរប្រើប្រាស់គ្រឿងអលង្ការមាសប្រាក់ដើម្បីបង្ក្រាបឥទ្ធិពលផ្កាយទាំងនេះ។
រង្វិលទិសមានឥទ្ធិពលជាប្រចាំទៅលើគេហដ្ឋាន ហើយយើងគួររៀចំដូចរៀបរាប់ខាងលើ។ ក្រៅពីនេះ ប្រិយមិត្តអ្នកអានក៏អាចរៀបចំកន្លែងការងារ និងក្បាលដំណេកផ្ទាល់ខ្លួនដោយផ្អែកតាមរង្វិលទិសប្រចាំឆ្នាំ ដើ្បីទទួលយកជោគសំណាង និងបញ្ចៀសគ្រោះកាចដែរ។ ជាក់ស្ដែងតុធ្វើការគួរបែរទៅរកទិសមង្គលមួយរបស់ខ្លួន ហើយក្បាលដំណេកក៏គួរបំបែររកទិសមង្គលមួយទៀតរបស់ខ្លួនដែរ៕
ប្រភពសៀវភៅ៖ ហោរាសាស្រ្ត និង ហុង ស៊ុយ ឆ្នាំ២០១៩ អ្នកបកស្រាយ និង និពន្ធ៖ តាន់ សូដានី