កុំបណ្ដោយឱ្យសោះ! ទម្លាប់អាក្រក់៦យ៉ាងធ្វើឱ្យខួរក្បាលចុះខ្សោយទាំងវ័យក្មេង

2019-04-30 00:39:00
សុខភាព

2019-04-30 00:39:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខួរក្បាលគឺជាផ្នែកសំខាន់ និងងាយរងការប៉ះពាល់ជាងគេក្នុងចំណោមសរីរាង្គសំខាន់ៗរបស់មនុស្ស។ ដូច្នេះបើរងការខូចខាតធ្ងន់ធ្ងរ វាអាចបណ្ដាលឱ្យដាច់សរសៃប្រាសាទ ឬហៅថាដាច់សរសៃខួរក្បាល ឬខួរក្បាលលែងដំណើរការជាដើម។ នៅពេលនោះ រាងកាយទាំងមូលនឹងក្លាយជាមនុស្សរុក្ខជាតិ មិនអាចបញ្ជាផ្នែកណាមួយនៃរាងកាយបានដូចពីមុនឡើយ។

អាហារ និងទម្លាប់ប្រចាំថ្ងៃអាចជះឥទ្ធិពលដល់ខួរក្បាលបានយ៉ាងងាយ។ ហេតុនេះហើយទើបគ្រូពេទ្យតែងតែណែនាំឱ្យញ៉ាំអាហារណាដែលមានប្រយោជន៍ និងជៀសវាងទម្លាប់អាក្រក់ដូចខាងក្រោមទើបខួរក្បាលអាចដំណើរការបានល្អ ទោះឈានដល់អាយុច្រើនក៏ដោយ។

ចុចអាន៖ ៥ សញ្ញាច្បាស់ៗបញ្ជាក់ថា អ្នកកើតជំងឺគិតច្រើនជ្រុល

១. អត់ញ៉ាំអាហារពេលព្រឹក

គ្រប់គ្នាសុទ្ធតែដឹង ថាអាហារពេលព្រឹកគឺជាអាហារដែលចាំបាច់បំផុតក្នុងចំណោមអាហារទាំង៣ពេល។ ហេតុផលព្រោះថា ពេលភ្ញាក់ឡើងនៅពេលព្រឹក ខួរក្បាលរបស់យើងបានបាត់បង់ថាមពលអស់យ៉ាងច្រើន ទើបត្រូវការអាហារបំប៉នដើម្បីបំពេញបន្ថែមសារធាតុចិញ្ចឹមដែលបានបាត់បង់ក្នុងពេលគេងលក់ពេញមួយយប់នោះ។

ដូច្នេះ បើអ្នកចេះតែអត់ញ៉ាំអាហារពេលជាប្រចាំ ឬញឹកញាប់ វានឹងធ្វើឱ្យកម្រិតជាតិស្ករក្នុងខ្លួនធ្លាក់ចុះ ហើយប៉ះពាល់ដល់ខួរក្បាលធ្ងន់ធ្ងរទៀតផង ហើយបើកាលណាចេះតែបន្តបែបនេះយូរទៅៗ វានឹងធ្វើឱ្យកោសិកាខួរក្បាលវិវត្តទៅរកភាពកាន់ចាស់ បាត់បង់ភាពរំញោច ស្ពឹកស្រពន់ គិតអ្វីមិនបានលឿនដូចពីមុនឡើយ។

២. ទម្លាប់ញ៉ាំអីច្រើនៗពេក

ផ្ទុយពីរឿងអត់អាហារពេលព្រឹក ការញ៉ាំអាហារច្រើនៗពេករយៈកាលយូរទៅនឹងទៅប៉ះពាល់ដល់មុខងាររំលាយអាហារ បង្កើនហានិភ័យនៃការដុះក្បាលពោះ ថែមទាំងឈានដល់ការប៉ះពាល់ខួរក្បាលទៀតផង។ ពេទ្យជំនាញបានបកស្រាយថា ដោយសារតែភាពធាត់ជ្រុល ឬការដុះក្បាលពោះអាចបណ្ដាលឱ្យកើតជំងឺក្រពះពោះវៀន ងាយស្ទះសរសៃឈាម ខ្វះអុកស៊ីសែន ឬដំបៅរលួយជាលិកាជាដើម។ ចំណែកឯខួរក្បាលវិញក៏ស្ពឹកលែងដំណើរការដូចមុន ហើយអាចឈានដល់បញ្ហាវិកលចរិតក៏ថាបាន។

ចុចអាន៖ ហានិភ័យសុខភាព ៧យ៉ាង ស្រីៗមិនគួរមើលរំលងដាច់ខាត

៣. មិនសូវញ៉ាំទឹកឱ្យបានគ្រប់គ្រាន់

ដឹងអត់? ក្នុងខ្លួនយើងមានជាតិទឹកដល់ទៅ៧០%។ អ៊ីចឹងហើយទើបទឹកមានសារសំខាន់ណាស់សម្រាប់គ្រប់មុខងាររបស់រាងកាយ រួមទាំងខួរក្បាលផង។ ការសិក្សាជាច្រើនសុទ្ធតែបង្ហាញថា បើអ្នកហាត់ប្រាណដោយប្រើកម្លាំងខ្លាំងៗរយៈពេល២ម៉ោង តែមិនផឹកទឹកចូលបង្គ្រប់ជាតិទឹកដែលបាត់បង់វិញទេនោះ វានឹងនាំឱ្យសមត្ថភាពចងចាំរបស់យើងចុះអន់ខ្សោយ ប៉ះពាល់ដល់មុខងារខួរក្បាលធ្ងន់ធ្ងរ។

៤. ញ៉ាំជាតិផ្អែមច្រើនពេក

ទោះបីថារាងកាយ និងខួរក្បាលរបស់យើងត្រូវការជាតិស្ករដើម្បីឱ្យដំណើរការបានល្អក៏ពិតមែន តែបើសិនអ្នកញ៉ាំជាតិផ្អែមទាំងនោះច្រើនពេក វានឹងបណ្ដាលឱ្យប្រឈមនឹងជំងឺរ៉ាំរ៉ៃផ្សេងៗជាមិនខាន។ ការសិក្សាមួយដែលធ្វើឡើងដោយអ្នកវិទ្យាសាស្ត្រមកពីសាកលវិទ្យាល័យញូវយ៉ក សហរដ្ឋអាមេរិកបានរកឃើញថា ក្នុងមួយថ្ងៃ មនុស្សមិនគួរតែញ៉ាំស្ករឱ្យលើស២ស្លាបព្រាបាយកន្លះឡើយ។

៥. ធ្វើការក្នុងបរិយាកាសការងារស្ត្រេសច្រើន

អ្នកណាក៏ដឹងថា ស្ត្រេសបានជះឥទ្ធិពលមិនល្អដល់រាងកាយ និងសុខភាពទាំងមូល រួមទាំងខួរក្បាល។ កាលណា ស្ត្រេសកាន់តែខ្លាំង រាងកាយនឹងបញ្ចេញអរម៉ូន Cortisol ដែលជាអរម៉ូនស្ត្រេសតែម្ដង។ កាលណាអរម៉ូនប្រភេទនេះបញ្ចេញមកកាន់តែច្រើន វាមិនត្រឹមតែប៉ះពាល់ដល់កោសិកាខួរក្បាលប៉ុណ្ណោះទេ តែថែមទាំងបង្កើនលទ្ធភាពនៃការកើតជំងឺសតិអារម្មណ៍ បាត់បង់ការចងចាំទៀតផង។

ដូច្នេះទោះបីក្នុងជីវភាពប្រចាំថ្ងៃបច្ចុប្បន្ននេះ ប្រហែលគ្មានអ្នកណាអាចជៀសផុតពីការកើតស្ត្រេសក៏ដោយ តែគួរយល់ដឹងពីវិធីកាត់បន្ថយរាល់ពេលមានអារម្មណ៍ស្ត្រេសម្ដងៗ ដូចជា គេងឱ្យបានគ្រប់គ្រាន់ ធ្វើលំហាត់ប្រាណ ច្រៀងលេង ស្ដាប់ចម្រៀង ជជែកលេងឱ្យបានច្រើន ឬទៅជួបគ្រូពេទ្យបើចូលដល់កម្រិតធ្ងន់ធ្ងរ។

៦. ជក់បារី

គុណវិបត្តិនៃការជក់បារីមានច្រើនណាស់ ដូចជាធ្វើឱ្យជាតិខា្លញ់ក្បាលពោះកើនឡើង សរសៃឈាមខួរក្បាលត្រូវរួញ ប៉ះពាល់កោសិកាខួរក្បាល បណ្ដាលឱ្យវិកលចរិតជាដើម។ មួយវិញទៀត ទោះបីជាក្រសោមខួរក្បាលត្រូវស្ដើងឡើងៗនៅពេលអាយុកាន់តែចាស់ក៏ដោយ តែការជក់បារីនឹងចូលទៅជំរុញឱ្យក្រសោមខួរក្បាលសឹកលឿនជាងអាយុ ហើយប៉ះពាល់ខ្លាំងដល់ការចងចាំ។

ចុចអាន៖ ៦យ៉ាង បង្ហាញថាខួរក្បាលអ្នកកំពុងផ្ទុកសម្ពាធធ្ងន់ គួរសម្រាកលំហែបន្តិចសិន

ដូចបានរៀបរាប់ខាងលើ ដើម្បីកុំឱ្យឆាប់ភ្លេចភ្លាំងទាំងខ្លួនឯងនៅក្មេងនៅឡើយនោះ គួរក្រលេកមើលខ្លួនឯងមើល៍ ថាតើមានបានធ្វើទម្លាប់ណាមួយក្នុងចំណោមទម្លាំងខាងលើដែរអត់? បើមាន គួរបញ្ឈប់ឱ្យបានជាប្រញាប់ តែបើអត់ទេ ក៏គួរស្វែងរកវិធីល្អៗផ្សេងទៀតដើម្បីឱ្យខួរក្បាលកាន់តែដំណើរការ និងមានសុខភាពល្អ៕

ប្រភព៖ bestie ប្រែសម្រួល៖ សរ សុគន្ធី