គ្រួសារមួយនេះហើយ ដែលជំរុញឲ្យលោក Scott Neeson បង្កើតយុទ្ធនាការរៃអង្គាសប្រាក់ជួយគ្រួសារក្រីក្រ

2019-05-07 07:56:54
ព័ត៌មាន

2019-05-07 07:56:54
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីដើមឆ្នាំមុន យើងបានណែនាំអ្នកឱ្យស្គាល់អំពីក្រុមគ្រួសារលោកជា។ ផ្ទះបែកបាក់របស់ពួកគេបានធ្វើឱ្យយើងចាប់ផ្ដើមយុទ្ធនាការ GivingTuesday ដើម្បីរៃអង្គាសប្រាក់សម្រាប់គ្រួសារ ដែលមានវិបត្តិ។ នេះជាការរៀបរាប់របស់ លោក ស្កុតនីសិន (Scott Neeson) ដែលជាស្ថាបនិក នៃអង្គការមូលនិធិកុមារកម្ពុជា រឺ Cambodian Children's Fund (CCF) បានបង្ហោះនៅលើបណ្ដាញគណនីរបស់ខ្លួន កាលពីថ្ងៃត្រង់ ថ្ងៃទី ៧ ខែឧសភា ២០១៩។

"ពួកយើងអរគុណណាស់ចំពោះការបរិច្ចាគរបស់អ្នកចំពោះគ្រួសារនេះ ដែលមានកន្លែងសុវត្ថិភាពមួយសម្រាប់រស់នៅ។ ផ្ទះចំនួនបីត្រូវបានសាងសង់ឡើងដោយសារតែយុទ្ធនាការនេះ។"

លោកបានបន្តទៀតថា ពួកគេក៏ទទួលបានម៉ូតូមួយផងដែរ ដែលជាអំណោយមួយសម្រាប់ឱ្យម្ដាយ និងឪពុករបស់ពួកគេផ្ដល់ឱ្យគ្រួសារ ហើយវាបានបង្ហាញតាមរយៈស្នាមញញឹមរបស់ពួកគេ។

ប្រវត្តិសង្ខេប លោក ស្កុតនីសិន (Scott Neeson)

លោក ស្កុតនីសិនបានកើតនៅក្នុងតំបន់មួយនៃប្រទេសស្កុតឡែន ស្ថិតក្នុងចក្រភពអង់គ្លេស ហើយគ្រួសាររបស់លោកបានផ្លាស់ទីទៅរស់នៅប្រទេសអូស្ត្រាលីតាំងពីលោកមានអាយុ៥ឆ្នាំម្ល៉េះ។ ពេលវ័យជំទង់ លោកបានទៅធ្វើការនៅក្រុមហ៊ុនភាពយន្ត រហូតលោកអាចក្លាយខ្លួនជាប្រធានប្រតិបត្តិផ្នែកទីផ្សារនៅក្នុងឧស្សាហកម្មភាពយន្តហូលីវ៉ូដ (20 Century Fox International) ទៀតផង។

អំឡុងឆ្នាំ ២០០៣ គឺជាពេលដែលលោកបានធ្វើដំណើរកម្សាន្តមកកាន់ប្រទេសកម្ពុជា។ លោកបានទៅខេត្តសៀមរាប សារមន្ទីរទួលស្លែង និង តំបន់ទេសចរណ៍សំខាន់ៗមួយចំនួនផងដែរ។ ប៉ុន្តែអ្វីដែលធ្វើអោយលោកចង់ចាំមិនភ្លេច រហូតឈានដល់ការកែប្រែខ្សែជីវិតរបស់លោកទាំងស្រុងនោះគឺ គ្រាមួយ ដែលលោកបានទៅទីលានចាក់សំរាមនៅតំបន់ស្ទឹងមានជ័យ រាជធានីភ្នំពេញ។

ពេលទៅដល់ទីនោះ លោកមានអារម្មណ៍សង្វេគជាខ្លាំងនៅពេលដែល លោកបានឃើញកុមារតូចៗ និង មនុស្សជាច្រើនរស់នៅទីនោះពោរពេញដោយការលំបាក ខ្វះអនាម័យ និង រស់នៅក្នុងបរិស្ថានដ៏អាក្រក់បំផុត។ ព្រឹត្តិការណ៍នេះបានធ្វើអោយលោកគិតថា លោកត្រូវតែធ្វើអ្វីម្យ៉ាងដើម្បីជួយដល់ពួកគេ ហេតុនេះហើយ ទើបនៅឆ្នាំ ២០០៤ លោកបានសម្រេចចិត្តលាឈប់ពីការងារ។ បន្ទាប់មកលោកបានលក់ផ្ទះ លក់រថយន្ត លក់កប៉ាល់ទេសចរណ៍ផ្ទាល់ខ្លួន និង ទ្រព្យសម្បត្តិមួយចំនួនទៀត ដើម្បីយកលុយមកបើកអង្គការមូលនិធិកុមារកម្ពុជា (CCF) ជំនួសវិញ។

បេសកកម្មរបស់លោកគឺធ្វើយ៉ាងណា ដើម្បីអោយកុមារទាំងនោះទទួលបានការអប់រំក្នុងកម្រិតមួយខ្ពស់ និង ការជួយដល់គ្រួសារក្រីក្ររបស់ពួកគេអោយមានចំណីអាហារបរិភោគ ព្រមទាំងមានកន្លែងស្នាក់នៅសមរម្យទៀតផង៕