- 2019-05-21 03:20:07
- សេដ្ឋកិច្ច
តើកម្ពុជាចំណាយពេលប៉ុន្មានឆ្នាំ ទើបអាចនាំចេញចេកទៅកាន់មហាយក្សចិនបាន?
- 2019-05-21 03:20:07
- ចំនួនមតិ 0 | ចំនួនចែករំលែក 0
តើកម្ពុជាចំណាយពេលប៉ុន្មានឆ្នាំ ទើបអាចនាំចេញចេកទៅកាន់មហាយក្សចិនបាន?
ចន្លោះមិនឃើញ
ចេកអំបូងលឿងរបស់កម្ពុជាបាននាំចេញទៅកាន់ទីផ្សារចិន ដោយផ្ទាល់នៅដើមខែឧសភានេះ ខណៈក្រុមហ៊ុនចំនួន ៥ បានទទួលការអនុញ្ញាតឱ្យនាំចូល ក្នុងចំណោមក្រុមចំនួន ១០ ផ្សេងទៀតដែលបានស្នើសុំនាំចេញ។ ក្រុមហ៊ុនទាំង៥ នោះមានក្រុមហ៊ុន ឡង មេត ក្រុមហ៊ុនសុវណ្ណរាជសី ក្រុមហ៊ុនឡុងស្រេងហ៊ុយជៀន ក្រុមហ៊ុនហ្គែនឡែន និងហ្គ្រីនអាយឡែន ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញចេកស្រស់ទៅកាន់ទីផ្សារចិន។
តើកម្ពុជាបានចំណាយពេលប៉ុន្មានឆ្នាំទើបអាចនាំចេញចេកអំបូងលឿងទៅកាន់ទីផ្សារចិនបាន?
ជាអធិបតីក្នុងពិធីសម្ពោធរោងចក្រវេចខ្ចប់ និងនាំចេញផ្លែចេកអំបូងលឿងស្រស់របស់ក្រុមហ៊ុន ឡង មេតកលពីចុងសប្ដាហ៍មុននៅស្រុកឈូកខេត្តកំពត លោក វេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានឱ្យដឹងថា កម្ពុជាបានចំណាយពេលប្រហាក់ប្រហែល៥ឆ្នាំ ទម្រាំអាចនាំចេញផ្លែចេកស្រស់ទៅកាន់ទីផ្សារប្រទេសចិនបាន ខណៈការចរចាដើម្បីនាំចេញមិនមែនជារឿងងាយស្រួលទេ ព្រោះភាគីអ្នកបញ្ជាទិញពីកម្ពុជាគេត្រូវធ្វើការស្ទាបស្ទង់ថា តើកម្ពុជាបានរៀបចំខ្លួនរួចហើយឬនៅ ជាពិសេសវិធាននៃការដាំដុះត្រូវស្របទៅ តាមបច្ចេកទេសរបស់គេ ក្នុងនោះមានការរៀបចំដី រៀបចំជី ពូជ ការគ្រប់គ្រង និងការវេច ខ្ចប់ជាដើម។
នៅពេលឆ្លើយតបតាមការទាមទារហើយ ក្រុមហ៊ុនអ្នកបញ្ជាទិញនឹងចុះមកពិនិត្យមើលផ្ទាល់ ទើបអនុញ្ញាតឱ្យនាំចេញបាន។ កម្ពុជាបានចរចាជា មួយភាគីចិនអំពីនីតិវិធី បែបបទ ឯកសារចាំបាច់សំខាន់ៗទាំងច្បាប់ និងបច្ចេកទេស ជាពិសេសឯកសារអនាម័យនិងភូតគាមអនាម័យមុនឈានទៅចុះហត្ថលេខាលើអនុស្សរណៈនៃការយោគ យល់គ្នាកាលពីថ្ងៃទី០២ ខែសីហា ឆ្នាំ២០១៨ ស្ដីពីការនាំចេកស្រស់ចេញទៅកាន់ទីផ្សារចិន។
ក្រោយពីបានចុះពិនិត្យ និងវាយតម្លៃរបស់ក្រុមការងារបច្ចេកទេសវាយតម្លៃរបស់អគ្គរដ្ឋបាល គយ របស់ចិននាចុងខែកុម្ភៈ បានចុះពិនិត្យ ១០ ក្រុមហ៊ុន ដែលបានដាក់ពាក្យស្នើសុំគោលការណ៍អនុញ្ញាតនាំចេញផ្លែចេកអំបូងលឿងស្រស់។ ក្រោយការបញ្ចប់ធ្វើការវាយតម្លៃ គឺមានតែក្រុមហ៊ុនចំនួន០៥ ប៉ុណ្ណោះអាចមានសិទ្ធិនាំចេញបាន ក្នុងនោះមានក្រុមហ៊ុនសុវណ្ណរាជសី ឡុងស្រេងហ៊ុយជៀន ហ្គែនឡែន ហ្គ្រីនអាយឡែន និងក្រុមហ៊ុនឡងមេត ដែលគោរពបានតាមលក្ខខណ្ឌច្បាប់ និងបច្ចេកទេស ហើយអាចធ្វើការនាំចេញចេកស្រស់ទៅកាន់ទីផ្សារចិនលើកទី១ បានចំនួនជាង១០០តោនកាលពីថ្ងៃទី៩ ខែឧសភា។
“ដូច្នេះល្គឹកណាដែលយើងត្រូវបានអនុញ្ញាតឱ្យនាំចូលក៏ត្រូវការទាមទារនូវពេលវេលាដែរ។ដូចខ្ញុំបានជម្រាបគេបានវាយតម្លៃ និងទទួលយក៥ក្រុមហ៊ុន ទើបនៅដើមខែនេះយើងអាចនាំចេញបាន។ អញ្ចឹងរាល់កិច្ចការទាំងអស់ត្រូវការពេលវេលាជាជំហានៗ”។ នេះបើតាមប្រសាសន៍ឯកឧត្ដម វេង សាខុន។
កន្លងមកកម្ពុជាក៏បាននាំចេកអំបូងលឿងចេញទៅប្រទេសចិន តាមប្រទេសវៀតណាមជាបណ្ដោះអាសន្នបានប្រមាណជិត ៤ម៉ឺនតោនផងដែរ គិតត្រឹមដំណាច់ខែមេសា ឆ្នាំ២០១៩។ ការនាំចេញតាមបណ្ដោះអាសន្នតាមច្រកវៀតណាមនាពេលកន្លងមក ដោយសារកម្ពុជាត្រូវការពេលវេលាកសាងហេដ្ឋារចនាសម្ព័ន្ធចាំបាច់មួយចំនួន។ ហេដ្ឋារចនាសម្ពន្ធចាំបាច់ទាំងនោះរាប់បញ្ចូលទាំងការត្រៀមលក្ខណៈរបស់កំពង់ផែ សម្រាប់ដឹកជញ្ជូនចេកទៅកាន់ប្រទេសចិនផងដែរ។
“អញ្ចឹងកំពង់ផែត្រូវរៀបចំដុយសម្រាប់ដោយភ្លើងទូកុងទ័រន័រត្រជាក់ មិនអាចលើកដាក់ពីរថយន្តហើយ យកទៅគរចោលបានទេ ពោលគឺត្រូវដោតដុយឱ្យដំណើរការម៉ាស៊ីនត្រជាក់ជាប្រចាំ។ នេះហើយជាបរិបថថ្មីនៃការនាំចេញផលិតផលកសិកម្មរបស់យើង ហើយប្រសិនបើយើងធ្វើបានជោគជ័យ យើងនឹងមានការនាំចេញផ្លែស្វាយ ស្រកានាគ ផ្លែមាន ជាបន្តបន្ទាប់ទៀតដែលភាគច្រើនផ្លែឈើទាំងនោះអាចឆាប់រលួយជាងចេក។ ដូច្នេះប្រសិនបើយន្តការនៃការសម្របសម្រួលការដឹកជញ្ជូនយើងមិនបានល្អទេ នោះជាបទពិសោធន៍មួយ ដែលគិតថា យើងមិនអាចឈានទៅរកការនាំចេញបានទូលំទូលាយនៅពេលខាងមុខបានទេ”។
ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋានកសិកម្ម លោក ងិន ឆាយបានមានប្រសាសន៍ឲ្យដឹង នៅក្នុងពិធីពិធីសម្ពោធការនាំចេញផ្លែចេកអំបូងលឿងស្រស់កម្ពុជា ទៅកាន់ទីផ្សារប្រទេសចិនបានឱ្យដឹងថា ផលិតកម្មចេកអំបូងលឿងដែលកំពុងមានទីផ្សារខ្ពស់នៅអន្តរជាតិ ហើយកំពុងត្រៀមរៀបចំធ្វើការនាំចេញជាបន្តបន្ទាប់នាចាប់ពីពេលនេះតទៅ។
បន្ថែមលើនេះឧកញ៉ា ផែ ហុកឈួន អគ្គនាយកក្រុមហ៊ុន ឡង មេត អេហ្រ្គីខលឈ័រ ឱ្យដឹងថា ការវិនិយោគដំណាំចេកដ៏ធំដំបូងគេនៅកម្ពុជានេះគឺជាការចូលរួម ចំណែកដ៏សំខាន់មួយក្នុងការជួយជំរុញកំណើនសេដ្ឋកិច្ចជាតិតាមរយៈការផ្ដល់ការងារ កាត់បន្ថយភាពក្រីក្រជូនប្រជាពលរដ្ឋក្នុងប្រទេសកម្ពុជាក៏ដូចជាជួយកាត់បន្ថយការចំណាកស្រុក។ ក្រុមហ៊ុននេះបានដំណើរការរៀបចំចម្ការចេកលើផ្ទៃដីសរុប ១ ០០០ហិចតា ដែលត្រូវប្រើប្រាស់ទុនវិនិយោគជាង៣២លានដុល្លារ ដោយវិនិយោគរួមគ្នាជាមួយនឹងក្រុមហ៊ុនចិន។ បច្ចុប្បន្ន ផ្ទៃដីជាង៤០០ហិចតា កំពុងប្រមូលផល វេចខ្ចប់ និងដំណើរការនាំចេញដោយសង្ឃឹមថា ក្នុងឆ្នាំ២០១៩ ចេកស្រស់ប្រមាណជាង ២,២ម៉ឺនតោន នឹងត្រូវធ្វើការនាំចេញ ហើយឆ្នាំ២០២០ រំពឹងថាបរិមាណនេះនឹងកើនឡើងដល់ជាង ៣ម៉ឺនតោន។ ទន្ទឹមនឹងនេះ ក្រុមហ៊ុនបានស្រូបយកកម្លាំងពលកម្ម ក្នុងស្រុកជាង៨០០នាក់ ហើយឆ្នាំ២០២០ ត្រូវការពលកម្មបន្ថែមជាង ១ ០០០នាក់ទៀតផងដែរ។
ភ្ជាប់ទៅនឹងការវិនិយោគផ្នែកកសិកម្មនេះ ឯកឧត្ដម វេង សាខុន ឱ្យដឹងទៀត ក្នុងឆ្នាំ ២០១៩ នេះរំពឹងថា នឹងអាចសម្រេចបានប្រមាណ១២ម៉ឺនតោន ហើយឆ្នាំ ២០៣០ និងអាចផលិតចេកនាំចេញប្រមាណ ១លានតោនទៅកាន់ប្រទេសចិនក្នុងមួយឆ្នាំ។ ដូច្នេះស្ថិតក្នុងបរិបទនៃកំណើនសេដ្ឋកិច្ច ការរីកចម្រើនផ្នែកបច្ចេកវិទ្យាកសិកម្ម ការកែច្នៃ វេចខ្ចប់ និងនាំចេញ ក្រសួងកសិកម្ម រុក្ខាប្រមាញ់ និងនេសាទបាននិងកំពុងខិតខំពង្រឹងកិច្ចសហប្រតិបត្តិការជាមួយដៃគូអភិវឌ្ឍន៍នានា និងវិស័យឯកជន ដើម្បីគាំទ្រ និងវិនិយោគលើគ្រប់ខ្សែច្រវាក់តម្លៃកសិកម្មចាប់ពីចំណុច A ដល់ Z តាមរយៈការបង្កើនផលិតភាពផលិតផល ការវេចខ្ចប់ ការរក្សាស្តុកទុក ការកែច្នៃប្រកបដោយគុណភាព អនាម័យ និងសុវត្ថិភាព សមស្របតាមស្តង់ដារនៃទីផ្សារនាំចេញ ឆ្លើយតបទៅតាមតម្រូវការទីផ្សារទាំងក្នុង និងក្រៅប្រទេស។ ដើម្បីសម្រេចគោលដៅនេះ ឯកឧត្ដមរដ្ឋមន្ត្រីបានសំណូមពរបន្តរក្សាកិច្ចសហប្រតិបត្តិការឲ្យមានលក្ខណៈប្រទាក់ក្រឡាគ្នាជាមួយគ្រប់គ្រប់តួអង្គពាក់ព័ន្ធទាំងអស់ក្នុងស្មារតីទទួលខុសត្រូវខ្ពស់តាមអភិក្រម “រដ្ឋ-ឯកជន-ដៃគូអភិវឌ្ឍន៍ និងសហគមន៍”។
ក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្ដមរដ្ឋមន្ត្រីបានអំពាវនាវឲ្យវិស័យឯកជនដែលមានលទ្ធភាព ពិនិត្យនិងពិចារណាវិនិយោគក្នុងវិស័យកសិកម្ម ជាពិសេសលើការកែច្នៃ វេចខ្ចប់កសិផលថែមទៀត ដើម្បីរួមគ្នាកាត់បន្ថយការនាំចេញវត្ថុធាតុដើមដែលនេះជាកត្តាមួយដ៏សំខាន់ក្នុងការបង្កើនតម្លៃបន្ថែម បង្កើតការងារ និងលើកកម្ពស់ជីវភាពរស់នៅ៕