- 2019-05-23 08:52:50
- ការអប់រំ
ល្អហួស! សាលារៀន ៥០ នៅភ្នំពេញ និងខេត្តកណ្ដាលបង្រៀនកុមារតូចពីមូលដ្ឋានគ្រប់គ្រងលុយ
- 2019-05-23 08:52:50
- ចំនួនមតិ 0 | ចំនួនចែករំលែក 0
ល្អហួស! សាលារៀន ៥០ នៅភ្នំពេញ និងខេត្តកណ្ដាលបង្រៀនកុមារតូចពីមូលដ្ឋានគ្រប់គ្រងលុយ
ចន្លោះមិនឃើញ
សាលាបឋមសិក្សាចំនួន ៥០ កន្លែងនៅភ្នំពេញ និងខេត្តកណ្ដាលកំពុងអនុវត្តគម្រោងមួយ ទាក់ទងនឹងមូលដ្ឋាននៃការគ្រប់គ្រងលុយ។មូលដ្ឋាននៃការគ្រប់គ្រងលុយរួមមាន ការចេះរកលុយ ការសន្សំ ការចំណាយ និងការបរិច្ចាគលុយ ខណៈបច្ចុប្បន្នសាលារៀនជាច្រើននៅថ្នាក់កម្រិតមូលដ្ឋានភាគច្រើន លោកគ្រូ-អ្នកគ្រូ បង្រៀនសិស្សឱ្យចេះតែអាន សរសេរ និងការគិតលេខ។
គម្រោងនេះត្រូវបានក្រសួងអប់រំយុវជន និងកីឡា ប្រកាសអនុវត្តកាលពីថ្ងៃទី២១ ខែ ឧសភានេះ ដោយមានការគាំទ្រថវិកាពី អង្គការមូលនិធិសិទ្ធិកុមារ។ លោក ណាត ប៊ុនរឿន រដ្ឋលេខាធិការក្រសួងអប់រំយុវជន និងកីឡា បានឱ្យដឹងថា ការអនុវត្តគម្រោងការអប់រំហិរញ្ញវត្ថុមូលដ្ឋាននឹងឈានទៅបង្កើតជាកម្មវិធីសិក្សាមួយសម្រាប់បង្រៀនឱ្យកុមារតូចមានចំណេះដឹងជាមូលដ្ឋានរួមមាន ការចេះរកលុយ ការសន្សំ ការចំណាយ និងការបរិច្ចាគលុយ ហើយកម្មវិធីនេះក៏ទាមទារឱ្យមានការចូលរួមពីសំណាក់ឪពុកម្ដាយ និងអាណាព្យាបាលសិស្សផងដែរ។
លោកស្រី គង់ ម៉ារឌី នាយិកាប្រតិបត្តិអង្គការមូលនិធិសិទ្ធិ កុមារ បានឱ្យដឹងដែរថា កម្មវិធីសិក្សាហិរញ្ញវត្ថុមូលដ្ឋាននេះ បច្ចុប្បន្នមានសាលារៀនកម្រិតមូលដ្ឋាននៅតាមបណ្ដាប្រទេសជាច្រើននៅក្នុងតំបន់ បានបង្កើតឱ្យមានជាកម្មវិធីសិក្សា ខណៈឆ្នាំ២០១៨កម្មវិធីនេះបានអនុវត្តសាកល្បងនៅតាមសាលារៀនមួយចំនួនទទួលបានជោគជ័យ ហើយនៅពេលនេះអង្គការសហការជាមួយក្រសួងអប់រំ និងដៃគូរជំនួយ បន្ថែមថវិកាប្រមាណ១០ម៉ឺនដុល្លារអាមេរិក អនុវត្តនៅតាមសាលាបឋមសិក្សាចំនួន៥០កន្លែងបន្ថែម។
លោកស្រីបន្តថា ការអនុវត្តគម្រោងអប់រំហិរញ្ញវត្ថុ ជូនកុមារតូចនៅថ្នាក់មូលដ្ឋានដែលត្រូវពង្រីកចំនួន៥០សាលាបន្ថែមនេះ នឹងត្រូវប្រើប្រាស់ថវិកាគម្រោងអស់ប្រមាណជាង១០ម៉ឺនដុល្លាអាមេរិក ដើម្បីផ្តល់ការបណ្ដុះបណ្ដាលគ្រួបង្គោល នៅតាមសាលាគោលដៅ ហើយកម្មវិធីសិក្សានេះនឹងត្រូវអនុវត្តបង្រៀនកុមារតូចចាប់ពីឆ្នាំ២០២០តទៅ៕
