ក្រុមដើរព្រៃវ័យក្មេងរបស់កម្ពុជា នឹងបង្ហាញស្នាដៃអភិរក្សសម្បត្ដិធម្មជាតិនៅមជ្ឃមណ្ឌល CKCC

2019-05-27 07:37:50
ការអប់រំ

2019-05-27 07:37:50
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមយុវជនចូលចិត្តដើរព្រៃ រហូតត្រូវបានតំណាងជាក្រុមមេគង្គយុវទូតប្រចាំកម្ពុជា នឹងរៀបចំកម្មវិធី“ដំណើរផ្សងព្រេងរបស់មេគង្គយុវទូត” នៅដើមខែមិថុនានេះ ដើម្បីបង្ហាញពីគុណតម្លៃរបស់ទន្លេមេគង្គតាមរយៈការសម្ដែងសិល្បៈ និងការចែករំលែកពីរឿងរ៉ាវដែលមេគង្គយុវទូតបានខិតខំប្រឹងប្រែងធ្វើអស់រយៈពេល១៤ខែ។

កញ្ញា អាំង សិរីរតន៍

កញ្ញា អាំង សិរីរតន៍ ត្រូវបានជ្រើសរើសជាបុគ្គលឆ្នើមក្នុងការរួមចំណែកអភិរក្សទន្លេមេគង្គ ដោយគម្រោងអច្ឆរិយភាពទន្លេមេគង្គ និងជាតំណាងក្រុមបានឲ្យដឹងថា គោលបំណងនៃកម្មវិធីដំណើរផ្សងព្រេងរបស់មេគង្គយុវទូត គឺដើម្បីផ្សព្វផ្សាយពីស្នាដៃរបស់មេគង្គយុវទូត ព្រមទាំងផ្សព្វផ្សាយពីសារវិជ្ជមានរបស់ទន្លេមេគង្គ ក្នុងន័យបង្កើនការយល់ដឹង និងរំលឹកដឹងគុណទៅដល់ទន្លេដែលបានផ្ដល់ប្រយោជន៍ឲ្យយើងទាំងអស់គ្នា ហើយក៏ចង់ឲ្យប្រជាជនខ្មែរបានចូលរួមកាន់តែច្រើនក្នុងកិច្ចការពារ និងអភិរក្សទន្លេឲ្យមាននិរន្ដភាព។

ចុចអាន៖ ពូកែដើរព្រៃ រហូតក្លាយជាយុវតីឆ្នើមតំណាងអ្នកអភិរក្សសម្បត្ដិធម្មជាតិនៅកម្ពុជា

ក្រោមការជួយគាំទ្រដោយ ជំនួយពីពលរដ្ឋអាម៉េរិក(USAID) និងគម្រោងអច្ឆរិយភាពនៃទន្លេមេគង្គ(Wonders of the Mekong) រយៈពេល១៤ខែកន្លងមក មេគង្គយុវទូតដែលមានវ័យចន្លោះពី ១៨ ទៅ ២៥ឆ្នាំ បានខិតខំប្រឹងប្រែងធ្វើការលើសកម្មភាពអភិរក្ស និងលើកស្ទួយការយល់ដឹងពីទន្លេមេគង្គនៅកម្ពុជាដោយធ្វើគម្រោងចំនួន៧រួមមាន គម្រោងសរសេរសៀវភៅរឿងនិទានខ្លី គម្រោងធ្វើវីដេអូបំលាស់ទីត្រី គម្រោងរូបសំណាក់មាតាមេគង្គ គម្រោងបទចម្រៀងទន្លេមេគង្គ គម្រោងអេកូទេសចរណ៍ គម្រោងសិល្បៈករនៃទន្លេមេគង្គ និងគម្រោងសម្ភារៈអប់រំពីទន្លេមេគង្គ។

កម្មវិធីនេះនឹងប្រារព្ធទៅនៅថ្ងៃទី១៥ ខែមិថុនា ឆ្នាំ២០១៩ ក្នុងសាលពហុបំណង នៃមជ្ឈមណ្ឌលសហប្រតិបត្ដិការកម្ពុជា-កូរ៉េ (CKCC) ចាប់ពីម៉ោង១រសៀល រហូតដល់ ម៉ោង៦កន្លះល្ងាច។ កម្មវិធីដំណើរផ្សងព្រេងរបស់មេគង្គយុវទូត ដែលពិពណ៌នាពីអច្ឆរិយភាពនៃទន្លេមេគង្គ គឺកាន់តែពិសេសនិងអស្ចារ្យដោយមានការសហការជាមួយក្រុមសិល្បៈប្រពៃណីសហសម័យនិងក្រុមចម្រៀងសម័យ SmallWorld SmallBand ក្រុមតូច(SWSB) ដើម្បីរៀបចំនូវការនិទានរឿងបែបសិល្បៈដែលមានភាពច្នៃប្រឌិត។ លើសពីនោះ កម្មវិធីក៏នឹងមានសកម្មភាពដូចជា៖

ការតាំងពិព័រណ៌ពីស្នាដៃរបស់មេគង្គយុវទូត និងអង្គការអភិរក្សនានានៅកម្ពុជា
ការតាំងពិព័រណ៍ការងារមុខជំនាញក្នុងវិស័យអភិរក្សបរិស្ថានពីស្ថាប័នអង្គការចំនួន១៤ នៅកម្ពុជា
ការចែករំលែកចំណេះដឹងអំពីការងារក្នុងវិស័យអភិរក្សពីបណ្ដាអង្គការអភិរក្សហើយស្វែងយល់ពីជីវចម្រុះ ធនធានធម្មជាតិ និងវិធីសាស្ដ្រផ្សេងៗដែលអ្នកជំនាញប្រើប្រាស់ក្នុងការអភិរក្សសម្បត្ដិធម្មជាតិរបស់ខ្មែរយើង។
ការជជែកពិភាក្សាពីមុខជំនាញ និងការងារក្នុងវិស័យអភិរក្ស ជាមួយអ្នកជំនាញមកពីស្ថាប័ននានាទាំងវិស័យឯកជន វិស័យសង្គមស៊ីវិល និងវិស័យរដ្ឋ ដើម្បីឲ្យយុវជនបានមើលឃើញឱកាសកាន់តែច្រើនពីការងារអភិរក្ស និងចាប់យកជំនាញ និងការងារទាំងនេះ។

គួរបន្ថែមថា ទន្លេមេគង្គ ជាទន្លេមានពូជត្រីចំរុះដ៏សំបូរបែបជាង៨០០ប្រភេទ ហើយច្រើនជាងគេលំដាប់លេខ៣នៅលើពិភពលោក បន្ទាប់ពីទន្លេអាម៉ាស្សូន និងទន្លេកុងហ្គោ។ មហាតំបន់ទន្លេមេគង្គ ក៏ជាផ្ទះរបស់រុក្ខជាតិមិនតិចជាង២០០០០ប្រភេទ បក្សី១២០០ប្រភេទ សត្វល្មូន៨០០ប្រភេទ និងថនិកសត្វ៤៣០ប្រភេទផងដែរ។ មិនត្រឹមតែសត្វ និងរុក្ខជាតិប៉ុណ្ណោះទេ ទន្លេមេគង្គបានទ្រទ្រង់ជីវិតមនុស្សប្រមាណជាង៣០០លាននាក់ដែលក្នុងនោះមានជនជាតិដើមជិត១០០ក្រុមផ្សេងៗគ្នារស់នៅក្នុងតំបន់នេះ។ ចំពោះអាងទន្លេមេគង្គក្រោមតែម្យ៉ាង វិស័យជលបានផ្ដល់អត្ថប្រយោជន៍ដល់តម្លៃសេដ្ឋកិច្ចប្រមាណជាង១១ពាន់លានដុល្លាក្នុង១ឆ្នាំរួមបញ្ជូលទាំងវិស័យជលផលនៅកម្ពុជាផងដែរ៕

អត្ថបទ៖ ស៊ិន សាវ៉េត