អស់បារម្ភ! ចង់បើកអាជីវកម្មថ្មី អត់ទុនអាចសាកដាក់សំណើទៅមូលនិធិនេះបាន

2019-05-28 08:15:39
សេដ្ឋកិច្ច

2019-05-28 08:15:39
ចំនួនមតិ 0 | ចំនួនចែករំលែក 0

ចន្លោះមិនឃើញ

មូលនិធិសម្រាប់ការវិនិយោគមួយបានប្រមូលថវិកាចំនួន៥៥លានដុល្លារដើម្បីទុកជួយជាប្រភពទុនសម្រាប់អ្នកចង់បង្កើតអាជីវកម្ម ឬពង្រីកអាជីវកម្មតែមិនមានទុនគ្រប់គ្រាន់ដើម្បីបំពេញក្ដីស្រម៉ៃរបស់ខ្លួន។

OOCTANE ជាមូលនិធិមួយបង្កើតឡើងកាលពីឆ្នាំទៅដោយលោក សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន WorldBridge Group ដោយចាប់ផ្ដើមពីថវិកា៥លានដុល្លារ ហើយរហូតមកដល់ពេលនេះ មូលនិធិនេះមានថវិការហូតដល់៥៥លានដុល្លារ។

(លោក Tapas KUILA ពេលផ្ដល់បទសម្ភាសន៍ជាមួយSabay ព្រឹកមិញ)

អ្នកចាត់ការទូទៅរបស់មូលនិធិOoctane លោក Tapas KUILA មានប្រសាសន៍ក្នុងបទសម្ភាសន៍ជាមួយSabay នៅថ្ងៃនេះថាថវិកាទាំង៥៥លានដុល្លារនេះបានមកពីថវិការបស់លោក សៀ ឫទ្ធី និងអ្នកវិនិយោគស្និទ្ធនឹងលោក សៀ ឫទ្ធី មួយចំនួនទៀត។

លោកបន្តថាមូលនិធិនេះ បង្កើតឡើងក្នុងគោលបំណងជួយដល់អ្នកចង់បង្កើតអាជីវកម្ម ឬពង្រីកអាជីវកម្មរបស់ខ្លួន ប៉ុន្តែនៅខ្វះធនធាន ឬការប្រឹក្សាយោបល់ជាដើម។

លោកបន្ថែមថា៖ «មនុស្សមួយចំនួនបានព្យាយាមធ្វើរឿងទាំងនេះ ប៉ុន្តែពួកគេបានជួបបញ្ហាប្រឈមមួយចំនួន ដូចជាមិនមានការគាំទ្រត្រឹមត្រូវណាមួយជាដើម...មិនត្រឹមតែត្រូវការដើមទុន តែក៏ត្រូវការការជួយផ្ដល់ប្រឹក្សា ការណែនាំ ដើម្បីធ្វើអាជីវកម្មមួយជោគជ័យ»។

អ្នកចង់បង្កើតអាជីវកម្មដំបូង ឬចង់ពង្រីកអាជីវកម្មរបស់ខ្លួនបន្ថែមអាចទាក់ទកដាក់សំណើសុំមូលនិធិ ឬសុំការប្រឹក្សាយោបល់របាន ដោយមិនប្រកាន់ថាអាជីវកម្មលើវិស័យអ្វីនោះទេ។

ទោះយ៉ាងណា លោកTapas KUILA មានប្រសាសន៍មូលនិធិក៏ចង់ផ្ដោតសំខាន់លើអាជីវកម្មទាក់ទងនឹងការដឹកជញ្ជូនទំនិញឬមនុស្ស ការធ្វើអាជីវកម្មតាមអនឡាញ និងអាជីវកម្មទាក់ទងនឹងការដោះស្រាយបញ្ហាទិញ លក់ឬជួលអចលនទ្រព្យជាដើម។

(សាររបស់មូលនិធិ)

លោកបន្តយ៉ាងដូចនេះថា៖ «ដូចជាមានApp ទិញលក់លើអនឡាញ ហើយចង់ពង្រីកទៅខេត្តផ្សេងទៀត នឹងរកទុនបន្ថែម យើងអាចជួយបាន យើងអាចក្លាយជាដៃគូរអាជីវកម្ម...យើងចង់ធ្វើជាដៃគូអាជីវកម្ម...យើងឲ្យទុនទៅអ្នក ហើយត្រឡប់វិញយើងអាចក្លាយជាដៃគូអាជីវកម្ម...ហើយវាមិនមែនជាប្រាក់កម្ចីទេ តែជាដៃគូ យើងធ្វើការរួមគ្នា ដើម្បីភាពរីកចម្រើនរបស់ក្រុមហ៊ុន»។

សម្រាប់ករណីអ្នកបើកអាជីវកម្មថ្មី មានទុនខ្លួនឯង តែចង់បានប្រឹក្សាយោបល់ លោកថាក៏ខាងមូលនិធិជួយបានផងដែរ និងមិនមានគិតថ្លៃអ្វីនោះទេ ហើយមូលនិធិមានអ្នកជំនាញពីសិង្ហបុរី និងម៉ាឡេស៊ីជាដើម។ លោកTapas KUILA ថា៖ «មិនបានទទួលអ្វីទេបើជួយត្រឹមយោបល់នោះ ប៉ុន្តែយើងគិតថាសព្វថ្ងៃសេដ្ឋកិច្ចកំពុងរីកចម្រើន យើងត្រូវការធ្វើរឿងនេះ បើមិនធ្វើទេប្រាំឆ្នាំក្រោយនឹងទទេ យើងមានចក្ខុវិស័យវែងឆ្ងាយ យើងជួយដោយមិនសម្លឹងឃើញផលប្រយោជន៍មកវិញទេ»។

គួរបញ្ជាក់ថាអ្នកចង់បង្កើតអាជីវកម្ម ឬចង់ពង្រីកអាជីវកម្មអាចទាក់ទងទៅមូលនិធិ Ooctane ដើម្បីដាក់សំណើសុំមូលនិធិឬប្រឹក្សាយោបល់បានចាប់ពីពេលនេះតទៅ ហើយមូលនិធិនេះមិនបានដាក់របារកំណត់ចំនួនទុននោះទេ ពោលគឺតិចឬច្រើនអាស្រ័យលើទំហំនៃអាជីវកម្ម៕

អត្ថបទ៖ ទូច សុខា