- 2019-06-05 03:36:37
- ព័ត៌មាន
ចុងបញ្ចប់នៃមនុស្សជាតិអាចនឹងកើតមានឡើងបើមនុស្សមិនភ្ញាក់រលឹកទប់ស្កាត់បញ្ហាកំពុងកើតមាន
- 2019-06-05 03:36:37
- ចំនួនមតិ 0 | ចំនួនចែករំលែក 0
ចុងបញ្ចប់នៃមនុស្សជាតិអាចនឹងកើតមានឡើងបើមនុស្សមិនភ្ញាក់រលឹកទប់ស្កាត់បញ្ហាកំពុងកើតមាន
ចន្លោះមិនឃើញ
អរិយធម៌របស់មនុស្សប្រហែលជាអាចផុតរលត់ទៅវិញនៅប៉ុន្មានទសវត្សរ៍ខាងមុខ ដែលនេះជាកង្វល់មួយបានលើកឡើងនៅក្នុងរបាយការណ៍ស្រាវជាវថ្មីមួយ ព្រមានពីវត្តមានមនុស្សជាតិនៅលើផែនដី។
ការកើតមានឡើងជាបន្តបន្ទាប់នូវផលប៉ះពាល់កើតចេញពីការប្រែប្រួលអាកាសធាតុ គួបផ្សំនឹងការមិនសូវយកចិត្តទុកដាក់ផង វានឹងនាំឲ្យផែនដីមិនអាចសង្គ្រោះបាន និងបង្កើតឲ្យមាននូវភាពវឹកវរនៅក្នុងសង្គមជាតិទូទាំងពិភពលោក។
ការស្រាវជ្រាវនេះធ្វើឡើងដោយក្រុមអ្នកស្រាវជ្រាវនៅទីក្រុងមែលប៊នប្រទេសអូស្រ្តាលីនៃមជ្ឈមណ្ឌលNational Centre for Climate Restoration ។ ក្នុងសេចក្ដីផ្តើមនៃរបាយការណ៍នេះអ្នកស្រាវជ្រាវសរសេរថាស្ថានភាពមនុស្សជាតិ និងផែនដីកំពុងតែជួបនូវភាពច្របូកច្របល់ដែលអាចធ្វើឲ្យជីវិតមនុស្សនៅលើផែនដីនេះដើរទៅរកទីបញ្ចប់របស់ខ្លួន ដោយសារមហន្តរាយអាក្រក់មួយ។
ប្រភពដដែលបន្តថាបច្ចុប្បន្នបម្រែសម្រួលអាកាសធាតុជាការគម្រាមកំហែងមួយដល់អរិយធម៌របស់មនុស្សជាតិ ហើយបានអំពាវនាវឲ្យប្រទេសទាំងអស់នាំគ្នាទប់ស្កាត់ ដោះស្រាយបញ្ហានេះមុនវាឈានដល់ដំណាក់កាលអាក្រក់។
ក្រៅពីបញ្ហាបម្រែបម្រួលអាកាសធាតុ បញ្ហាកង្វះទឹក ស្បៀង ក៏នឹងក្លាយជាដើមហេតុនាំឲ្យសង្គមមនុស្សជ្រួលច្របល់ដែលឈានដល់ជម្លោះកើតឡើងនៅប្រហែលជាបីទសវត្សរ៍ខាងមុខ។
របាយកាណ៍នេះត្រូវបានអ្នកស្រាវជ្រាវនិយាយថាវាជាសេណារីយោមួយសម្រាប់ការពិចារណាចំពោះអនាគតរបស់ផែនដីដែលអាចឈានដល់ភាពជ្រួលច្របល់។ ប្រភពដដែលអះអាងថាបើគ្មានវិធានការទាន់ពេល និងច្បាស់លាស់លើការបំភាយឧស្ម័នផ្ទះកញ្ចក់ទេ នៅឆ្នាំ២០៣០ឧស្ម័ននេះនឹងមានកាន់តែច្រើន។
តាមការសិក្សាកន្លងមក អ្នកជំនាញសន្និដ្ឋានថានៅឆ្នាំ២០៥០សីតុណ្ហភាពនៅលើផែនដីអាចឡើង២អង្សាសេបន្ថែមទៀត។ សមុទ្រទឹកកកនឹងចាប់ផ្តើមរលាយ កម្ដៅក្នុងសមុទ្រកើនឡើង និងកម្ពស់ទឹកសមុទ្រក៏កើនឡើងយ៉ាងលឿនផងដែរ។ ទាំងនេះនឹងអាចធ្វើឲ្យតំបន់អាម៉ាហ្សូនជួបភាពរាំងស្ងួត និងរុក្ខជាតិងាប់។
ប្រភពដដែលពន្យល់ថានៅទ្វីបអាម៉េរិកខាងជើងនឹងរងគ្រោះដោយសារអាកាសធាតុ បណ្ដាលឲ្យភ្លើងឆេះព្រៃ រកលកម្ដៅកើតឡើង ភាពរាំងស្ងួត និងវាលរហោឋាន។ ខ្យល់មូសុងនៅចិនធ្លាក់ចុះ ទឹកហូរចូលទន្លេធំៗនៅទ្វីបអាស៊ីថមថយជាងមួយភាគបី។ ក្រៅពីនេះផ្ទាំងទឹកកករលាយដល់៧០ភាគរយហើយនៅភ្នំAndes ដែលជាភ្នំវែងជាងគេនៅភាគខាងលិចនៃទ្វីបអាម៉េរិកខាងត្បូង។
តាមដែលអ្វីដែលបានលើកឡើងនេះនៅឆ្នាំ២១០០សីតុណ្ហភាពនៅលើផែនដីនឹងឡើង៥អង្សាសេបន្ថែមទៀត។ ឯកសារដដែលបន្ថែមថាគ្រាន់តែសីតុណ្ហភាពនៅលើផែនដីឡើង២អង្សាបន្ថែមមនុស្សមួយពាន់លាននាក់ប្រហែលជាត្រូវផ្លាស់កន្លែង គ្រោះមហន្តរាយកើតមានធ្ងន់ធ្ងរ នឹងអាចឈានដល់ធ្វើឲ្យអរិយធម៌មនុស្សជាតិដើរដល់ទីបញ្ចប់។
ប្រភពខាងលើនិយាយថាពិភពលោកសព្វថ្ងៃមិនទាន់បានគិតដល់ថ្ងៃខាងមុខនោះទេ ហើយថែមទាំងបានធ្វើការតិចតួចប៉ុណ្ណោះដើម្បីដោះស្រាយផលប៉ះពាល់ពីបម្រែបម្រួលអាកាសធាតុនេះ។ ដើម្បីគេចចេញពីគ្រោះថ្នាក់នេះ ពិភពលោកត្រូវខិតខំដោះស្រាយ និងបញ្ចប់ការបំភាយឧស្ម័នផ្ទះកញ្ចក់។
អ្នកស្រាវជ្រាវម្នាក់និយាយថា៖ «ចុងបញ្ចប់នៃភពផែនដីអាចជៀសផុតបាន បើមានការយកចិត្តទុកដាក់ និងមានវិធានការត្រឹមត្រូវ។ យើងត្រូវរួមគ្នា យើងត្រូវជួយគ្នា ដើម្បីធានាពីនិរន្តភាពរបស់អនាគតមនុស្សជាតិ»៕