- 2019-06-19 03:47:14
- ការអប់រំ
គួរឲ្យសរសើរ! ស្ថាប័នផ្សេងៗគ្នា រួមបង្កើតសៀវភៅកុមារបន្ថែម ១០ ក្បាល ដើម្បីលើកស្ទួយការអាន
- 2019-06-19 03:47:14
- ចំនួនមតិ 0 | ចំនួនចែករំលែក 0
គួរឲ្យសរសើរ! ស្ថាប័នផ្សេងៗគ្នា រួមបង្កើតសៀវភៅកុមារបន្ថែម ១០ ក្បាល ដើម្បីលើកស្ទួយការអាន
ចន្លោះមិនឃើញ
អង្គការមូលនិធិអាស៊ីប្រចាំកម្ពុជា បានរៀបចំកម្មវិធីបង្កើតសៀវភៅរឿងសម្រាប់កុមារលើកទី៦ (BookLab) ដើម្បីបង្កើតសៀវភៅកុមារ ១០ បន្ថែមទៀតដែលកម្មវិធីនេះ ជាផ្នែកមួយនៃគម្រោង Let’s Read ដើម្បីពង្រឹងសមត្ថភាពអ្នកបង្កើតសៀវភៅក្នុងស្រុកបង្កើតធនធានអំណានឱ្យមានគុណភាពខ្ពស់ និងជំរុញទម្លាប់នៃការអានរបស់កុមារ។ បណ្ណាល័យឌីជីថល Let’s Read បានបង្កើនចំនួនសៀវភៅជាភាសាខ្មែរជិត ៣០០ ក្បាល និងមានសៀវភៅជាង ២០០០ ក្បាលផ្សេងទៀតក្នុង ២៣ភាសាផ្សេងគ្នា។ បណ្ណាល័យឌីជីថលនេះ បានឆក់យកឱកាសក្នុងយុគសម័យដែលទូរសព្ទស្មាតហ្វូន និងថេប្លែតកំពុងតែពេញនិយម ហើយសាធារណៈជនក៏អាចរកអានសៀវភៅតាមរយៈគេហទំព័រ និងកម្មវិធីក្នុងទូរសព្ទ Android។
ឯកឧត្ដម បណ្ឌិត អ៊ឹម កុច រដ្ឋលេខាធិការក្រសួងអប់រំ យុវជន និងកីឡាជាមួយនឹងអ្នកស្រី មេឡូនី លីនប៊ឺក តំណាងអង្គការមូលនិធិអាស៊ីប្រចាំកម្ពុជា បានផ្ដល់កិត្តិយសចូលរួមបើកកម្មវិធី BookLab ដែលប្រព្រឹត្តទៅរយៈពេល២ថ្ងៃពេញ។
ឯកឧត្តម បណ្ឌិត អ៊ឹម កុច បានលើកឡើងថា៖ «ក្រសួងអប់រំ គាំទ្រជាខ្លាំងទៅលើការងាររបស់អង្គការមូលនិធិអាស៊ី ដែលមានគោលដៅស្របទៅនឹងគោលដៅរបស់រាជរដ្ឋាភិបាល ក៏ដូចជាក្រសួងផ្ទាល់ ក្នុងការពង្រឹងសមត្ថភាពធនធានមនុស្ស បង្កើតធនធានអប់រំដែលមានគុណភាពខ្ពស់ ជាពិសេសជំរុញទម្លាប់នៃការអាន និងការគិតពិចារណាល្អិតល្អន់ (critical thinking)របស់កុមារតូចៗនៅកម្ពុជា។»
អ្នកស្រី មេឡូនី លីនប៊ឺក ក៏បានបន្ថែមថា៖ «សៀវភៅរឿងថ្មីៗដែលនឹងត្រូវផលិតក្នុងកម្មវិធី BookLab នេះទាក់ទងទៅនឹងប្រធានបទផ្សេងៗ ដូចជា ភាពក្លាហាន ភាពតស៊ូអត់ធ្មត់ ក៏ដូចជាមិត្តភាព និងភាពច្នៃប្រឌិត។ រឿង "សៀវភៅវេទមន្ត" និយាយពីក្មេងប្រុសម្នាក់ឈ្មោះ "វិទូ" ដែលទើបដឹងថា មូលហេតុដែលធ្វើឱ្យប្អូនស្រីរបស់ខ្លួនមានចំណេះដឹងច្រើន គឺដោយសារតែនាងមានទម្លាប់អានសៀវភៅជារៀងរាល់ថ្ងៃ។ នៅពេលដែលវិទូចាប់ផ្តើមអានសៀវភៅប្រចាំថ្ងៃជំនួសឱ្យការលេងវីដេ-អូហ្គេម វិទូមានការយល់ដឹងច្រើនជាងមុន ហើយអាចដោះស្រាយចំណោទបញ្ហា និងអាចចូលរួមប្រកួតប្រជែងចំណេះដឹងនៅក្នុងសាលា ព្រមទាំងទទួលបានរង្វាន់ទៀតផង។ នេះគ្រាន់តែជារឿងមួយក្នុងចំណោមរឿងល្អៗផ្សេងទៀត ដែលមានសារអប់រំល្អ អាចទាក់ទាញចំណាប់អារម្មណ៍របស់ក្មេង និងជំរុញឱ្យពួកគេចាប់ផ្តើម ឬបន្តទម្លាប់អានសៀវភៅ»។
កម្មវិធី Let’s Read ត្រូវបានគាំទ្រឧបត្ថម្ភដោយក្រុមហ៊ុន Smart Axiata ដែលជាក្រុមហ៊ុនទូរគមនាគមន៍នាំមុខគេនៅប្រទេសកម្ពុជា។ លោក Jonathan Yap ជាប្រធានផ្នែកគ្រប់គ្រង និងកិច្ចការសហការ នៃក្រុមហ៊ុន Smart Axiata បានថ្លែងថា៖ «សៀវភៅឌីជីថល ដែលបង្កើតចេញពីកម្មវិធី BookLab មុនៗ ទាក់ទាញអ្នកអាននៅកម្ពុជាជាច្រើននាក់។ វាស្តែងចេញពីចំណាប់អារម្មណ៍ខ្ពស់តាមរយៈគេហទំព័រហ្វេសប៊ុក Smart for Cambodia របស់ក្រុមហ៊ុន Smart Axiata។ យើងមានការជឿជាក់ខ្ពស់ក្នុងការប្រើប្រាស់បច្ចេកវិទ្យាដើម្បីចូលរួមធ្វើឱ្យប្រសើរឡើងនូវការអប់រំ ជាពិសេសខ្លឹមសារច្នៃប្រឌិតខ្ពស់ និងមានលក្ខណៈជំរុញទឹកចិត្ត ដូចជាសៀវភៅរឿងដែលត្រូវបាន ផលិតនៅក្នុងកម្មវិធី Let’s Read នេះជាដើម។ យើងរំពឹងថា នឹងមានក្មេងៗច្រើនបន្ថែមទៀតប្រើប្រាស់បណ្ណា- ល័យឌីជីថលមួយនេះដើម្បីបង្កើតទម្លាប់អានសៀវភៅ និងចាប់ផ្តើមការស្រមើស្រមៃខ្ពស់”៕
