- 2019-06-20 07:11:49
- ព័ត៌មាន
ក្រសួងអប់រំព្រមានចាត់វិធានការក្តៅចំពោះសាលាណា អនុញ្ញាតឱ្យលក់អាហារចំណីហាមឃាត់
- 2019-06-20 07:11:49
- ចំនួនមតិ 0 | ចំនួនចែករំលែក 0
ក្រសួងអប់រំព្រមានចាត់វិធានការក្តៅចំពោះសាលាណា អនុញ្ញាតឱ្យលក់អាហារចំណីហាមឃាត់
ចន្លោះមិនឃើញ
ក្រសួងអប់រំយុវជន និងកីឡា បានព្រមានចាត់វិធានការទៅលើសាលារៀនណា ដែលអនុញ្ញាតឱ្យលក់ចំណីអាហារហាមឃាត់ ។ វិធានការនេះនឹងអាចឈានទៅដាក់ពិន័យជារដ្ឋបាល ដល់នាក់ដឹកនាំសាលារៀន ដែលអនុញ្ញាតឱ្យអ្នកលក់ដូរដាក់លក់ចំណីអាហារបំពានបម្រាមរបស់ក្រសួង។
លោក ឌី ខាំបូលី អ្នកនាំពាក្យក្រសួងអប់រំ យុវជន និងកីឡា បានឱ្យដឹងថា អស់រយៈពេលជាច្រើនខែមកហើយ ដែលក្រសួងអប់រំ បានប្រកាសហាមឃាត់ការលក់ចំណីអាហារ និងភេសជ្ជៈជាច្រើនមុខនៅក្នុងសាលារៀន ហើយការប្រកាសនេះគឺមានគោលដៅសំខាន់មិនចង់ឱ្យសិស្សានុសិស្ស និងកុមារតូចបរិភោគទៅងាយរងការប៉ះពាល់ដល់សុខភាព និងការសិក្សា។
ទន្ទឹមនឹងការដាក់បម្រាមនេះ ក្រសួងអប់រំក៏បានស្នើឱ្យគ្រប់ភាគីពាក់ព័ន្ធទាំងអស់ពិសេសរដ្ឋបាលសាលាស្រុក ខណ្ឌទាំងអស់ត្រូវចូលរួមតាមដានចុះត្រួតពិនិត្យឱ្យបានជាប់ជាប្រចាំ ខណៈអ្នកលក់ដូរមួយចំនួននៅតែរឹងរុះលក់ចំណីអាហារហាមឃាត់ទាំងនៅក្នុងសាលា និងនៅក្រៅរបងសាលា។ លោកបានបន្ថែមថា គ្រប់ចំណីអាហារ និងភេសជ្ជៈ ដែលគ្មានគុណភាព គ្មានអនាម័យលក់ឱ្យសិស្សានុសិស្ស ពិសេសលក់ឱ្យកុមារតូចបរិភោគ គឺវារងការប៉ះពាលច្រើន ហើយការប៉ះ ពាលក្រៅពីខាតបង់ថវិកាអាណាព្យាបាលសិស្ស គឺវាធ្វើឱ្យប៉ះពាល់ដល់សុខភាពរបស់សិស្ស និងប៉ះពាល់ការសិក្សារៀនសូត្ររបស់សិស្សថែមទៀត។
ថ្មីៗកន្លងមកនេះក្រសួងអប់រំបានផ្សព្វផ្សាយឡើងវិញពីសេចក្ដីណែនាំស្តីពីចំណីអាហារ និងភេសជ្ជៈ ដែលត្រូវហាមឃាត់មិនឲ្យលក់ក្នុងគ្រឹះស្ថានអប់រំ ខណៈមានសាលារៀនមួយចំនួននៅតែអនុញ្ញាតឱ្យអាជីវករបន្តលក់ចំណីអាហារហាមឃាត់ទាំងនៅក្នុងសាលា និងនៅជិតសាលា។
ចំណីអាហារនិងភេសជ្ជៈទាំងនោះ រួមមាន ចំណីអាហារ ដែលហួសកាលកំណត់ ចំណីអាហារដែលគ្មានប្រភពច្បាស់ លាស់ ភេសជ្ជៈប៉ូវកម្លាំង ភេសជ្ជៈផ្អែមកាហ្វេ ការ៉េម ទឹកស៊ីរ៉ូប៍ ស្ករសូកូឡា ស្ករគ្រាប់ ស្ករកៅស៊ូ, ចាហួយ នំដូណាត់ នំផ្អែម រួមទាំងគ្រឿងស្រវឹង និងថ្នាំជក់ជាដើម៕
