- 2019-06-24 07:53:15
- ព័ត៌មាន
រ៉ុន សុភី អតីតក្មេងរើសសំរាម មានគោលបំណងបី ដើម្បីឈានទៅសម្រេចជោគជ័យថ្ងៃអនាគត
- 2019-06-24 07:53:15
- ចំនួនមតិ 0 | ចំនួនចែករំលែក 0
រ៉ុន សុភី អតីតក្មេងរើសសំរាម មានគោលបំណងបី ដើម្បីឈានទៅសម្រេចជោគជ័យថ្ងៃអនាគត
ចន្លោះមិនឃើញ
យុវតីមួយរូប ដែលបានប្រែក្លាយជីវិតខ្លួនឯងពីក្មេងរើសសំរាមទៅជាសិស្សអាហារូបករណ៍នៅប្រទេសអូស្ត្រាលីថា ខ្លួនមានគោលបំណងបី ដើម្បីឈានទៅសម្រេចគោលដៅជោគជ័យទៅថ្ងៃអនាគត។
ទើបបានបញ្ចប់ថ្នាក់មូលដ្ឋានរយៈពេល១ឆ្នាំ នឹងគ្រោងបន្តថ្នាក់បរិញ្ញាបត្រឆ្នាំទី១ នៅសាកលវិទ្យាល័យមួយក្នុងប្រទេសអូស្ត្រាលីលើជំនាញពាណិជ្ជកម្ម យុវតីរូបនេះឱ្យដឹងថា គោលបំណងទាំងបីនោះរួមមាន ទីការខិតខំប្រឹងប្រែងរៀនសូត្រ ទី២ រកការងារធ្វើនៅប្រទេសអូស្ត្រាលី និងទី៣ ជួយឱ្យគ្រួសាររួចផុតពីភាពក្រីក្រ។
ប្រាប់អ្នកសារព័ត៌មាន ក្នុងឱកាសចែករំលែកបទពិសោធន៍ជោគជ័យកាលពីថ្ងៃទី ២០ មិថុនា ឆ្នាំ ២០១៩ នៅអង្គការមូលនិធិកុមារកម្ពុជា សុភី បន្តថា ក្រោមការជួយជ្រោមជ្រែង ពីអង្គការមូលនិធិកុមារកម្ពុជា ទើបខ្លួនអាចបានចូលសាលាដូចគេឯង និងឈានទៅទទួលបានអាហារូបករណ៍ថ្នាក់បរិញ្ញាបត្រនៅសាកលវិទ្យាល័យ Mellbourne ប្រទេសអូស្ត្រាលី។ ដូច្នេះកញ្ញាប្ដេជ្ញាខិតខំប្រឹងប្រែងរៀនសូត្រឱ្យអស់ពីសមត្ថភាព ដើម្បីទទួលបានចំណេះដឹង និងស្វែងរកការងារធ្វើរយៈពេលខ្លីយកបទពិសោធន៍ដើម្បីរួមចំណែកអភិវឌ្ឍន៍កម្ពុជា ព្រមទាំងជួយលើកទឹកចិត្តកុមារ ដែលធ្លាប់មានភាពលំបាកដូចខ្លួន និងជួយលើកស្ទួយជីវភាពគ្រួសារចាកផុតពីភាពក្រីក្រ។
សុភី ឱ្យដឹងថា ការលើកស្ទួយជីវភាពគ្រួសារនេះ គឺជាបំណងធំបំផុត ខណៈកន្លងមកខ្លួនបានប្រឈមទៅនឹងការលំបាក និងខ្វះភាពកក់ក្ដៅ រហូតស្ទើរគ្មានឱកាសបានរៀនសូត្រ ប៉ុន្តែជាសំណាងល្អ ដែលបានជួបលោក Scott Neeson នាយកប្រតិបត្តិអង្គការមូលនិធិកុមារកម្ពុជា ទើបខ្លួនមានថ្ងៃនេះ។ "ខ្ញុំមិនដែលឃើញឪពុក-ម្តាយ ខ្ញុំស្រួលម្ដងណាទេ ពេលខ្លះឃើញគ្រួសារគេមានហូបចុកគ្រប់គ្រាន់ ឃើញគេលេងសប្បាយជាមួយគ្រួសារ ខ្ញុំលួចសម្រក់ទឹកភ្នែកនឹកច្រណែនគ្រួសារគេ។ ដូច្នេះការជៀសផុតពីភាពក្រីក្រគឺជាកត្តាធំបំផុត”។
យុវតី រ៉ុន សុភី ទទួលបានការថែទាំ និងលើកទឹកចិត្តពីអង្គការមូលនិធិកុមារកម្ពុជាកាលពីអាយុ ១១ ឆ្នាំ ខណៈជីវិតរបស់ខ្លួនពេលនោះ មានតែភាពលំបាក ស្នាមប្រឡាក់ជាមួយក្លិនស្អុយលើភ្នំសំរាម និងពុំទទួលបានការសិក្សានោះទេ។ បច្ចុប្បន្ន សុភី បានស្គាល់ពីតម្លៃ នៃការសិក្សា ស្គាល់ពីពិភពលោកខាងក្រៅ និងខិតខំសិក្សារហូតទទួលបានអាហារូបករណ៍ នៅសាកលវិទ្យាល័យ Mellbourne ប្រទេសអូស្ត្រាលី ក្រោមការជ្រំជ្រែងពីអង្គការ។ សុភី នឹងត្រូវត្រឡប់ទៅសិក្សានៅប្រទេស អូស្ត្រាលីវិញ ដោយចាប់ផ្ដើមឆ្នាំសិក្សាថ្មីនៅថ្ងៃទី ២៩ ខែកក្កដា ឆ្នាំ ២០១៩ដ៏ខ្លីខាងមុខនេះ ។ ជាចុងក្រោយ សុភី ថា ការខិតខំប្រឹងប្រែងពិតប្រាកដត្រូវកើតឡើងជាមួយនឹងសកម្មភាព មិនមែនគ្រាន់តែនិយាយនោះទេ ទើបទទួលជោគជ័យ៕