• ប្រែសម្រួល៖ Sokcheng Seang
• សហការជាមួយ wapatoa.com

សូមអ្នកទាំងអស់គ្នាកាត់បន្ថយផ្លាស្ទិក!

យើងទាំងអស់គ្នាត្រូវជួយថែរក្សាបរិស្ថាន!

យើងម្នាក់ៗ មិនដឹងធ្លាប់ឮឃ្លានេះប៉ុន្មានសិបដងទៅហើយទេ តែសួរថា យើងនៅខ្មែរ បើចង់រស់នៅជីវិតមួយដែលមានផ្លាស្ទិកតិចបំផុត ហើយបញ្ចេញកាកសំណល់តិចបំផុតទៅកាន់ផែនដីវិញនោះ តើយើងគួរធ្វើតាមរបៀបណា? ស្មេរបានធ្វើការសាកល្បងជាងមួយឆ្នាំហើយ ពេលនេះគឺមានធីបចំនួន ៦ ដែលអ្នកអាចសាកបានខ្លួនឯង!

១. បញ្ចូលទឹកប៊ិច

តើមួយខែៗអ្នកបោះប៊ិចចោលប៉ុន្មានដើមដែរ ទោះជាសំបកក្រៅនិងមុខវានៅស្អាត ទាស់តែវាអស់ទឹកក៏ដោយនោះ? ប្រសិនបើយើងអាចបញ្ចូលទឹកវាបានដូចទឹកហ្វឺតនោះ មិនដឹងជាចំណេញលុយ និងចំណេញផ្លាស្ទិកប៉ុណ្ណាទេ…

មានដឹងអត់ថា តាមការពិតទៅ មានប៊ិចជាច្រើនប្រភេទដែលយើងអាចបញ្ចូលទឹកបាន។ ឧទាហរណ៍ដូចប៊ិចប្រភេទ ម៉ាយក្រុន (Micron) ដែលខ្ញុំចូលចិត្តប្រើប៉ុន្មានឆ្នាំកន្លងមកនេះអញ្ចឹង។ រាប់ឆ្នាំហើយ ខ្ញុំមិនដែលមានគំនិតសាកបើកគំរបគូទវាដើម្បីឆែកនោះទេ ដូច្នេះខ្ញុំតែងបោះវាចោលពេលវាអស់ទឹកដូចគេដូចឯងអញ្ចឹង។ មួយខែសរសេរអស់ទៅ ១ ទៅ ២ ដើមឯណោះ! ទើបតែប្រហែលកន្លះឆ្នាំមុននេះទេ ទើបខ្ញុំបែកគំនិតឆែកទៅ ទើបបានដឹងថាតាមពិតខាងក្នុងវាមានអេប៉ុងអាចបញ្ចូលទឹកបានសោះ!

ការបញ្ចូលទឹកនេះត្រូវការឲ្យយើងចំណាយលុយបន្តិចពីដំបូង ដើម្បីទៅទិញទឹកប៊ិច និងរកអ្វីមួយមកជារបស់បឺតបញ្ចូល។ ក្នុងករណីខ្ញុំវិញ ខ្ញុំបានទិញទឹកប៊ិចម៉ាក LAMY នេះមួយដបអស់ ២០ ដុល្លារ ហើយប្រើដបទឹកហ្វឺតទទេមួយ ដើម្បីបឺត និងបញ្ចូលទឹក។

តែឲ្យតែមានរបស់គ្រប់អស់ហើយ គឺយើងអាចចំណេញច្រើនណាស់។ ទឹកប៊ិចមួយដបនេះ ខ្ញុំប្រើជិតមួយឆ្នាំហើយ បញ្ចូលប៊ិចរាប់សិបដង តែនៅមិនទាន់អស់ដល់ពាក់កណ្តាលដបផង! ព្រោះប៊ិចធម្មតាត្រូវការតែ ២ ទៅ ៣ ដំណក់ក៏យើងអាចប្រើវាបានមួយអាទិត្យទៅហើយ!

ដូច្នេះសាកបើកគូទប៊ិចរបស់អ្នកមើលៗ តិចថាអាចបញ្ចូលទឹកបាន! ហើយបើវាបញ្ចូលមិនបានទេ ប្រហែលជាអាចសាកប្រើប្រភេទប៊ិចដែលមានអេប៉ុងពីក្នុងទៅហ្អី? ចំណេញលុយហើយចំណេញបរិស្ថានទៀតណា!

២. ចបជីកតូចច្រឡឹង

សម្រាប់​អ្នកដែលមានកូនរុក្ខជាតិតូចៗប៉ុន្មានផើងនៅផ្ទះ ឬនៅកន្លែងធ្វើការ ហើយចង់បានចបជីកតូចមួយដើម្បីជីកដី និងរោយជីជាដើម… នេះជាវិធីដ៏ល្អបំផុត!

បើចង់ដឹងរបៀបកាត់កូនដបទឹកឲ្យបានចេញជាចបជីកនេះ អាចមើលវីដេអូនេះបាន ចុចទៅនាទី ០០៖៥១ ណា!

៣. កាត់បន្ថយផលិតផលផ្លាស្ទិកសំអាងប្រចាំថ្ងៃ

កាលពីកន្លះឆ្នាំមុន ខ្ញុំបានតាំងចិត្តតាមដានផលិតផលផ្លាស្ទិកដែលខ្ញុំតែងបោះចោលក្នុងមួយខែៗ។ លទ្ធផលក៏ឃើញថា ភាគច្រើននៃផ្លាស្ទិកក្នុងធុងសំរាមខ្ញុំគឺគ្មានអ្វីក្រៅពីផលិតផលសំអាងនោះទេ មានដូចជាដបសាប៊ូដុសខ្លួន សាប៊ូលាងមុខ កក់សក់ និងឡេជាដើម។

តែសំណាងដែរ ដែលខ្ញុំបានស៊ើបរកឃើញមានហាងខ្មែរយើងពីរបីកន្លែងដែលចាប់ផ្តើមលក់ផលិតផលសំអាងធ្វើដោយខ្លួនឯង ហើយវ៉ិចខ្ចប់មិនដាក់ផ្លាស្ទិកនោះ! ខ្ញុំស្គាល់តែពីរកន្លែងដែលគួរឲ្យជឿទុកចិត្តល្អនោះទេ! បើគ្នាយើងស្គាល់កន្លែងណាផ្សេងៗ ជួយផ្ញើមកអុីម៉ែលរបស់វប្បធម៌ប្រាប់ស្មេរវិញផងណា (hello@wapatoa.com) !

រូបបានមកពីទំព័ររបស់លម្អអង្គ

សំរាប់ហាងពីរដែលស្មេរស្គាល់នោះគឺ មួយមានឈ្មោះថា ហាងលម្អអង្គ ដែលជាគំរោងថ្មី តែមានតំលៃថោកជាងគេ។ ខាងនោះមានលក់ប្រេងដូង សាប៊ូដុសខ្លួន ដុសមុខ ក្រែមលាបក្លៀក និងក្រែមលាបមាត់ធ្វើឡើងដោយដៃ និងវ៉ិចខ្ចប់ដោយមិនមានផ្លាស្ទិកទាំងអស់។ តំលៃគឺពី ៣ ទៅ ៦ ដុល្លារ។ សំរាប់ផលិតផលដែលមានដប អ្នកអាចយកដបទៅដូរយកផលិតផលថ្មី ហើយបានចុះតំលៃបន្តិចផងណា! លម្អអង្គជាហាងអនឡាញមួយដោយមានសេវាដឹកជញ្ជូន ដូច្នេះបើចង់សាករបស់ពួកគាត់ អាចផ្ញើសារទៅទំព័រហ្វេសប៊ុករបស់លម្អអង្គទៅណា!

រូបបានមកពីទំព័ររបស់ដៃខ្មែរ

មួយទៀតគឺហាងដៃខ្មែរ ដែលមានគេស្គាល់រាងច្រើនណាស់ដែរហើយ។ ពួកគាត់មានវត្តមាននៅខ្មែរយូរហើយ ហើយក៏កំពុងតែរីកដុះដាល ដោយមានផលិតផលច្រើនជាងមុនណាស់ មានទាំងសាប៊ូដុសខ្លួន សាប៊ូបោកខោអាវ កក់សក់ បន្ទន់សក់ និងម្សៅទៀតផង! សំខាន់គឺពួកគាត់មានហាងខាងក្រៅ ដូច្នេះយើងអាចយកកំប៉ុង ឬដបដែលយើងប្រើហើយទៅបញ្ចូលផលិតផលថ្មីបានតាមចិត្ត! នៅចាំអីទៀត! ទៅដើរលេងមើលរបស់ពួកគាត់បន្តិចទៅ អាចទាក់ទងគាត់តាមទំព័រហ្វេសប៊ុករបស់ដៃខ្មែរបានណា!

ឯធីបបីក្រោមនេះគឺយើងនៅរក្សាពីអត្ថបទចាស់របស់យើង!

៥. វិក្កយបត្រប្រើហើយ —> ក្រដាស់កត់ត្រាផ្សេងៗ

ចាំបានវិក្កយបត្រជាច្រើនរយសន្លឹកដែលបានពីការញ៉ាំក្រៅទប់មិនឈ្នះ ឬពេលទិញឥវ៉ាន់ផ្សេងៗហ្អ៎? ជាធម្មតាគឺខ្នងវានៅទទេសស្អាតនោះទេ ដូច្នេះម៉េចមិនប្រមូលវាចូលគ្នា ហើយទុកប្រើវាដើម្បីកត់នេះកត់នោះ ត្រូវប្រជុំនិយាយអីខ្លះ ឬក៏សំរាប់កត់ម្ហូបដែលយើងចង់ទិញមុនពេលទៅផ្សារទៅ?

៥. កំប៉ុងត្រីខ —> សំរាប់ដាក់របស់របរកញ្ចេបកញ្ចុប

មានចាំថ្ងៃដែលអ្នកក្រខ្សត់ អត់អីញ៉ាំក្រៅពីត្រីខកំប៉ុងអត់? ម៉េចមិនប្រមូលកំប៉ុងនៅសល់ទាំងប៉ុន្មាន ដើម្បីយកមកប្រើដាក់របស់តូចៗ ដូចជាដាក់បុិច ដៃខ្មៅ និងគ្រឿងសិក្សា -ល-? បើសិនជាចង់បំបិទមុខស្រីបីនាក់នោះចោលទៀត ក៏អាចទិញថ្នាំយកមកលាបកំប៉ុងទាំងនេះផងដែរ!

៦. មុននឹងបោះចោលអីមួយ កុំភ្លេចកាត់វាជាពីរសិនណា

ធីបមួយនេះគឺអាចជួយយើងសន្សំលុយផង ជួយយើងកាត់បន្ថយផ្លាស្ទិកផង នោះគឺ មុននឹងបោះចោលផលិតផលដែលមានកញ្ចប់ខាងក្រៅជាផ្លាស្ទិក ដូចជាឡេ ម្សៅ ឬថ្នាំដុសធ្មេញជាដើម សូមកាត់វាជាពីរសិន! ព្រោះពេលយើងច្របាច់វាលែងចេញ មិនមែនបានន័យថាវាអស់នោះទេ! ឧទាហរណ៍ដូចជាឡេលាបការពារកំដៅថ្ងៃខាងក្រោមអញ្ចឹង តាមពិតគឺវាច្របាច់លែងចេញហើយ តែតាមពិតបើកាត់ទៅ តាមពិតនៅសល់អាចប្រើបានជិតមួយខែទៀតឯណោះ! ធ្វើយ៉ាងនេះ យើងនឹងប្រើផលិតផលមួយៗបានយូរជាងមុន ហើយក៏អាចកាត់បន្ថយចំនួនផ្លាស្ទិកដែលយើងបោះចោលផងដែរ។

អត្ថបទនេះ គឺមកពីវ៉ិបសាយវប្បធម៌ Wapatoa.com ជាវិបសាយ​ផ្តោត​លើ​ចំណេះ​ដឹង​ចិត្ត​វិទ្យា សិល្បៈ និងការ​អភិវឌ្ឍ​ខ្លួន

បើចង់អានអត្ថបទល្អៗដូចនេះទៀត សូមចូលទៅកាន់៖ wapatoa.com