- 2019-06-27 04:05:52
- សុខភាព
មូសខ្លាញីចម្លងជំងឺបីប្រភេទមកមនុស្ស ប្រយ័ត្នសុខភាពកូនៗ
- 2019-06-27 04:05:52
- ចំនួនមតិ 0 | ចំនួនចែករំលែក 0
មូសខ្លាញីចម្លងជំងឺបីប្រភេទមកមនុស្ស ប្រយ័ត្នសុខភាពកូនៗ
ចន្លោះមិនឃើញ
មន្ត្រីជំនាញឲ្យដឹងថាមូខ្លាញីមិនត្រឹមតែអាចចម្លងជំងឺគ្រុនឈាមទៅកាន់មនុស្សប៉ុណ្ណោះទេ តែវាអាចបង្កជំងឺពីរប្រភេទផ្សេងទៀតទៅកាន់មនុស្សផងដែរ។
លោកវេជ្ជបណ្ឌិត ហ៊ុយ រេកុល ប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត បានលើកឡើងក្នុងសន្និសីទសារព័ត៌មានទាក់ទងនឹងជំងឺគ្រុនឈាមនាព្រឹកនេះថា មូសខ្លាញីជាប្រភពចម្លងជំងឺចំនួនបីគឺគ្រុនឈាម ជងឺខួរក្បាលតូច និងជំងឺឈឺសន្លាក់។
លោកវេជ្ជបណ្ឌិតឲ្យដឹងថាមូសខ្លាញីមានលទ្ធភាពហើរចេញពីកន្លែងរស់នៅចម្ងាយ១៥០ម៉ែត្រដើម្បីរកចំណីអាហារ ហើយមូសនេះចូលចិត្តបឺតឈាមមនុស្សជាងឈាមសត្វ។ មួយវិញទៀតមូសខ្លាញីក៏មានសមត្ថភាពស្រូបក្លិនញើងរបស់មនុស្សបានក្នុងចម្ងាយប្រាំគីឡូម៉ែត្រផងដែរ ដែលករណីនេះលោកថាមូសខ្លាញីអាចនឹងព្យាយាមហោះទៅរកមនុស្សនៅចម្ងាយឆ្ងាយជាង១៥០ម៉ែត្របើសិនជានៅជិតកន្លែងវារស់នៅមិនមានមនុស្សរស់នៅ។ ចំណែកមូសខ្លាញីមួយអាចខាំមនុស្សពីពីរទៅបីនាក់ដើម្បីចម្អែតពោះរបស់វា និងចិញ្ចឹមពង។
លោកឲ្យដឹងទៀតថាមូសខ្លាញីមួយក្បាលអាចពងបានចំនួន៣០០ពង និងថាពងញាស់ក្នុងរយៈពេល១៥ថ្ងៃ ឬត្រឹម១២ថ្ងៃបើអាកាសធាតុកាន់តែក្ដៅ។ លោកបញ្ជាក់ថា៖ «បើសិនជាមានភ្លៀងហើយក្ដៅៗនោះវដ្ដបង្កកំណើតរបស់មូសខ្លាក៏កាន់តែខ្លី»។
លោកអះអាងថាមូសខ្លាមានលទ្ធភាពចម្លងជំងឺគ្រុនឈាមបានពេញមួយឆ្នាំគ្រាន់តែថានៅរដូវភ្លៀងមានលទ្ធភាពពីរដងខ្ពស់ជាងរដូវប្រាំង។ លោកបន្តថាបើសិនជាអាកាសធាតុកើនឡើងក្ដៅមួយដឺក្រេលទ្ធភាពចម្លងជំងឺគ្រុនឈាមកើនឡើង២០ភាគរយ ហើយបើចំនួនទឹកភ្លើងកើនឡើង១មីលីម៉ែត្រនោះលទ្ធភាពចម្លងកើនឡើងរហូតដល់៣០ភាគរយ បើធៀបទៅនឹងពេលធម្មតា។
លោកបញ្ជាក់ថាមូសខ្លាញីចូលចិត្តរស់នៅក្នុងកន្លែងដក់ទឹកដែលគ្មានក្លិនស្អុយ ដូចជានៅក្នុងអាង ពាង និងសម្បកកង់រថយន្តជាដើម ហើយថាគ្រាន់តែសម្បកកង់រយន្តមួយអាចផ្ទុកដង្កួវទឹករហូតដល់៥០០០ ហើយកន្លែងដែលគ្មានពន្លឺចេញចូលបានជាកន្លែងដែលវាចូលចិត្តនៅផងដែរ៕
