- 2019-07-04 07:55:34
- ការអប់រំ
កំពូលសិស្សនិទ្ទេស A ទាំង ៣ លំដាប់ កាលឆ្នាំមុន ទៅដល់ណាអស់ហើយ?
- 2019-07-04 07:55:34
- ចំនួនមតិ 0 | ចំនួនចែករំលែក 0
កំពូលសិស្សនិទ្ទេស A ទាំង ៣ លំដាប់ កាលឆ្នាំមុន ទៅដល់ណាអស់ហើយ?
ចន្លោះមិនឃើញ
បន្ទាប់ពីលទ្ធផលបាក់ឌុបឆ្នាំ ២០១៨ ប្រកាសជាលើកទី ២ ក្រោយពីមានការតវ៉ាយ៉ាងច្រើនពីសំណាក់សិស្សានុសិស្សនោះ រូបភាពសិស្សនិទ្ទេស A លំដាប់ពិន្ទុកំពូលៗ ជាពិសេសចំពោះសិស្សលំដាប់ពិន្ទុទី ១ ទី ២ និងទី ៣ ត្រូវបានគេចែកចាយពេញបណ្ដាញសង្គម ហ្វេសប៊ុក ព្រមទាំងបានទទួលការស្ងើចសរសើរពីប្រជាជនខ្មែរទៀតផង។
ទោះបីជាទទួលបានភាពល្បីល្បាញនៅខណៈពេលនោះក៏ពិតមែន ក៏ប៉ុន្តែព័ត៌មានផ្សេងៗរបស់អ្នកទាំង ៣ បានបាត់ទៅវិញបន្តិចម្ដងៗពីភ្នែកសាធារណៈជន ដែលជាហេតុធ្វើឲ្យមហាជនកាន់តែចង់ដឹង ជាពិសេសសិស្សទី ១២ កំពុងត្រៀមប្រលងបាក់ឌុបក្នុងឆ្នាំនេះថា តើពួកគេទាំង ៣ នាក់ នៅពេលនេះដើរដល់ដំណាក់កាលណាហើយ។
ខាងក្រោមនេះ ជាព័ត៌មានបច្ចុប្បន្នភាពរបស់សិស្សឆ្នើមនិទ្ទេស A លំដាប់កំពូលទាំង ៣៖
១. កញ្ញា ថល រតនា
បន្ទាប់ពីបដិសេធមិនទទួលយកអាហារូបករណ៍ទៅសិក្សានៅប្រទេសចិន សិស្សឆ្នើមនិទ្ទេស A លំដាប់ពិន្ទុ ១០០.០០ មកពីវិទ្យាល័យផ្សារដើមថ្កូវរូបនេះ កំពុងបន្តថ្នាក់ឧត្ដមសិក្សារបស់ខ្លួននៅសាកលវិទ្យាល័យ វិទ្យាសាស្ត្រសុខាភិបាល ផ្នែកវេជ្ជសាស្ត្រ។
ចំពោះការរៀនសូត្រនៅសាកលវិទ្យាល័យវិញ រតនាបានឲ្យដឹងថាខ្លួនមានការលំបាកទៅលើមុខវិជ្ជាមួយចំនួនធំ ពីព្រោះមុខវិជ្ជាទាំងអស់នោះត្រូវសិក្សាយ៉ាងលម្អិតមានការស្រាវជ្រាវច្រើន ហើយជាពិសេសក្នុង ១ មុខវិជ្ជាត្រូវបង្រៀនដោយគ្រូច្រើននាក់។
ដោយសារតែការប្រលងសញ្ញាប័ត្រ មធ្យមសិក្សាទុតិយភូមិ ជិតមកដល់ហើយនោះ កញ្ញាបានផ្ដាំផ្ញើទៅកាន់សិស្សទី ១២ ទាំងអស់ថា៖ «នៅពេលកំពុងប្រលង ត្រូវតែជឿជាក់លើខ្លួនឯង ជឿថាខ្លួនឯងអាចធ្វើបាន និងត្រូវចងចាំថា យើងជាអ្នកកំណត់វាសនាខ្លួនឯង សូមជូនពរឲ្យប្អូនៗសម្រេចជោគជ័យទាំងអស់គ្នា»។
២. លោក ប៉េង ម៉េងហេង
សព្វថ្ងៃនេះ អតីតសិស្សឆ្នើមនិទ្ទេស A នៃវិទ្យាល័យប៊ែលធីអន្តរជាតិទី ៧ ប៉េង ម៉េងហេង កំពុងសិក្សាថ្នាក់បរិញ្ញាបត្រ ផ្នែកវិទ្យាសាស្ត្រកុំព្យូទ័រ នៅមហាវិទ្យាល័យ Skyline ស្ថិតនៅក្នុងទីក្រុង San Bruno នៃរដ្ឋ California ហើយមូលហេតុ ដែលគេជ្រើសរើសរៀនមុខវិជ្ជានេះ ដោយសារតែរូបគេផ្ទាល់ចូលចិត្តកុំព្យូទ័រតាំងពីតូច ហើយក៏ចង់ដឹងពីរបៀបដំណើរការនៃការសរសេរកូដផងដែរ។
ចំពោះស្ថានភាពរៀនសូត្រនៅ មហាវិទ្យាល័យ Skyline យុវជនម្នាក់នេះ បានរៀបរាប់ថា ខ្លួនគេមានការពិបាកក្នុងការចុះសម្រុងទៅនឹងបរិបទថ្មី ហើយត្រូវសម្រេចចិត្តធ្វើអ្វីៗដោយខ្លួនឯងទាំងអស់ដោយពុំមានឪពុកម្ដាយមកចាំជួយទៀតឡើយ ហើយណាមួយនឹកផ្ទះ ដូច្នេះធ្វើឲ្យបាត់បង់អារម្មណ៍រៀនសូត្រ។
នៅពេលសួរទៅដល់គម្រោងនៅពេលរៀនចប់ ម៉េងហេង បានឆ្លើយថា៖«ពេលចប់ ខ្ញុំគិតថា ខ្ញុំនឹងត្រឡប់ទៅកម្ពុជាវិញ ព្រោះខ្ញុំចង់យកចំណេះ និងបទពិសោធន៍ដែលទទួលបាន មកចូលរួមជំរុញការអភិវឌ្ឍន៍ផ្នែកបច្ចេកវិទ្យានៅប្រទេសកម្ពុជាឲ្យបានជឿនលឿន»។
៣. កញ្ញា តែ ស៊ូចេង
ជាសិស្សនិទ្ទេស A មួយរូប ដែលត្រូវបានអ្នកលេងបណ្ដាញសង្គម ហ្វេសប៊ុក សរសើរមិនដាច់ពីមាត់កាលពីឆ្នាំមុនថា ស្អាតហើយរៀនពូកែទៀតនោះ អតីតសិស្សទី ១២ នៃវិទ្យាល័យអន្តរជាតិសិង្ហបុរីរូបនេះ កំពុងបន្តថ្នាក់ឧត្ដមសិក្សារបស់ខ្លួនលើមុខជំនាញប្រព័ន្ធផ្សព្វផ្សាយ និងសារគមនាគមន៍នៅ សាកលវិទ្យាល័យ ភូមិន្ទភ្នំពេញ និងថ្នាក់បរិញ្ញាបត្រ អក្សរសាស្ត្រអង់គ្លេស នៅវិទ្យាស្ថានភាសាបរទេស។
ថ្វីបើកញ្ញាជាសិស្សនិទ្ទេស A ក៏ពិតមែន ប៉ុន្តែកញ្ញានៅតែមិនទាន់អាចសម្របខ្លួនទៅនឹងការសិក្សាដោយខ្លួនឯងបានឡើយ ចំពោះការរៀនបែបកម្រិតឧត្តមសិក្សានៅឡើយទេ។ ចំពោះគម្រោងនៅពេលបញ្ចប់ថ្នាក់បរិញ្ញាបត្រ យុវតីរូបនេះលើកឡើងថា មិនទាន់ច្បាស់ថានឹងត្រូវធ្វើអ្វីបន្តទៀតនោះទេ៕