សម្តេចក្រឡាហោម ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃកម្ពុជា បាន​អះអាងថា សមត្ថកិច្ចកម្ពុជាបាននិងកំពុងធ្វើការបើកការស៊ើបអង្កេត ដើម្បីរកប្រភពនិង​ឫសគល់ពិតប្រាកដចំពោះការនាំចូលលុយដែលគ្មានប្រភពច្បាស់លាស់ចូលមកទឹកដីកម្ពុជា។

ក្នុងពិធីបិទទិវាប្រជាជនពិភពលោកលើកទី៣០ និងខួបទី២៥ឆ្នាំ នៃសន្និសីទអន្តរជាតិ​ស្ដីពី​ប្រជាជន និងការអភិវឌ្ឍ នៅមជ្ឈមណ្ឌលសហប្រតិបត្តិការកម្ពុជា-ជប៉ុន CJCC នៃ សាកល​វិទ្យាល័យភូមិន្ទភ្នំពេញ កាលពីថ្ងៃទី១១ ខែកក្កដា ឆ្នាំ២០១៩ សម្តេចក្រឡាហោម ស ខេង បានគូសបញ្ជាក់ថា គិតមកដល់ពេលនេះ សមត្ថកិច្ចជំនាញកម្ពុជាបាន ធ្វើការរឹកអូស លុយជាង៧លានដុល្លារអាម៉េរិក ដែលគ្មានប្រភពច្បាស់លាស់ចូលមកកម្ពុជា។

សម្តេចក្រឡា ហោមបានបន្ដថា បច្ចុប្បន្នលុយទាំងនោះត្រូវបានរក្សាទុកយ៉ាងត្រឹមត្រូ​វនៅក្នុងធនាគារជាតិ​នៃ​កម្ពុជា។ សម្តេចក្រឡាហោមបានលើកឡើងថា សមត្ថកិច្ចកំពុងសហការជាមួយខាង​សមត្ថ​កិច្ចហុងកុង ដើម្បីស្រាវជ្រាវចំពោះករណីនេះ ហើយដោយសារតែទីក្រុងហុងកុង នៃ​សាធារណ​រដ្ឋ​ប្រជាមានិតចិន កំពុងមានបញ្ហាបាតុកម្ម ដូច្នេះបញ្ហានេះ ត្រូវបានពន្យាពេល​ស្រាវ​ជ្រាវសិន។ តែទោះបីយ៉ាងណាក៏ដោយ សម្តេចក្រឡាហោម បានអះអាងថា សមត្ថកិច្ច​កម្ពុជា នឹងខិតខំស្រាវជ្រាវដើម្បីរកឫសគល់ប្រភពនៃលុយទាំងនោះ។

សូមជម្រាបជូនថា សមត្ថកិច្ចកម្ពុជានៅច្រកព្រលានយន្តហោះអន្តរជាតិភ្នំពេញ និង​ខេត្តសៀមរាប បានធ្វើការឃាត់ខ្លួនជនបរទេសដែលបាននាំចូលលុយដុល្លារជាច្រើនម៉ឺន និង​លាន​ដុល្លារចូលទឹកដីកម្ពុជា ជាបន្តបន្ទាប់កាលពីពេលកន្លងទៅថ្មីៗនេះ។ ភាគច្រើននៃជន​សង្ស័យដែលនាំចូលលុយដុល្លារគ្មានប្រភពច្បាស់លាស់ពីក្រៅប្រទេសនោះ គឺជាជនជាតិ ចិន។ ជនទាំងនោះត្រូវបានសមត្ថកិច្ចធ្វើការឃាត់ខ្លួន និងចាប់បញ្ជូនទៅតុលាការ​ដើម្បីធ្វើ​ការស្រាវជ្រាវ និងផ្តន្ទាទោសតាមច្បាប់របស់កម្ពុជា៕