- 2019-07-17 02:27:05
- ការអប់រំ
ម្ចាស់មេដៃមាសរូបវិទ្យាបង្ហើបពីគន្លឹះធ្វើលំហាត់រូប
- 2019-07-17 02:27:05
- ចំនួនមតិ 0 | ចំនួនចែករំលែក 0
ម្ចាស់មេដៃមាសរូបវិទ្យាបង្ហើបពីគន្លឹះធ្វើលំហាត់រូប
ចន្លោះមិនឃើញ
រូបវិទ្យា ជាមុខវិជ្ជាសំខាន់មួយ ក្នុងចំណោមមុខវិជ្ជាវិទ្យាសាស្ត្រផ្សេងៗទៀត នៅក្នុងការប្រលងសញ្ញាប័ត្រមធ្យមសិក្សាទុតិយភូមិ ថ្នាក់វិទ្យាសាស្ត្រពិត។
ដើម្បីជួយសម្រួលដល់សិស្សថ្នាក់ទី ១២ ទាំងឡាយ ឲ្យកាន់តែមានភាពងាយស្រួលដោះស្រាយលំហាត់មុខវិជ្ជានេះ សារព័ត៌មាន Sabay បានធ្វើកិច្ចសម្ភាសន៍ជាមួយម្ចាស់មេដៃមាសរូបវិទ្យាទូទាំងប្រទេសឆ្នាំ ២០១៩ អំពីគន្លឹះសំខាន់ៗក្នុងការធ្វើលំហាត់រូបវិទ្យា។
ជាសិស្សថ្នាក់ទី ១២ នៃវិទ្យាល័យ មេសាង ក្នុងខេត្តព្រៃវែង កញ្ញា កុច តុលា បានប្រាប់ឲ្យដឹងថា ដើម្បីដោះស្រាយលំហាត់រូប រឿងដែលត្រូវធ្វើមុនគេបង្អស់នោះគឺ អានប្រធានឲ្យយល់ ដើម្បីស្គាល់ពីប្រភេទលំហាត់ថាតើ វាស្ថិតនៅក្នុងមេរៀនមួយណា បន្ទាប់មកកញ្ញាចាប់ផ្ដើមគិត អំពីរូបមន្ត និងទ្រឹស្ដីផ្សេងៗវិញម្ដង។
យុវតីរូបនេះបន្តថា តម្លៃថេរ ជាបញ្ហាមួយ ដែលធ្វើឲ្យសិស្សភ័ន្តច្រឡំ ព្រោះថា ពេលខ្លះតម្លៃថេរមិនមានប្រាប់នៅក្នុងលំហាត់ឡើយ ដូច្នេះហើយសិស្សគ្រប់រូបត្រូវតែចាំពីតម្លៃទាំងអស់នោះ ចំណែកឯខ្នាតវិញ គឺត្រូវបំបែកជាខ្នាត SI (ខ្នាតអន្តរជាតិប្រើនៅក្នុងរូបវិទ្យា) ដោយសារតែបម្រាមនៅក្នុងលំហាត់ភាគច្រើន មិនបានដាក់ជាខ្នាតអន្តរជាតិទេ។
ដោយឡែកចំពោះការសរសេរនៅពេលប្រលង តុលា បាននិយាយថា៖ «សម្រាប់ការសរសេរ នៅពេលមានលំហាត់ដាក់មក ខ្ញុំនឹងស្រង់បម្រាប់នៅក្នុងហ្នឹងទាំងអស់ យកមកដាក់នៅខាងលើ។ បន្ទាប់មកបានសរសេរសំនួរ ដែលគេសួរ ហើយប្រសិនជាលំហាត់ទាក់ទងនឹងរូបមន្តត្រង់ (លំហាត់ដែលដាក់រូបមន្តចូល ហើយជំនួសលេខ) ខ្ញុំនឹងដាក់តាមរូបមន្តត្រង់»។
ដោយសារតែមានការត្អូញត្អែរជាច្រើនអំពីការលំបាកក្នុងការយល់ពីបាតុភូតរូបវិទ្យានោះ យុវតី ខេត្ត ព្រៃវែង រូបនេះ បានបកស្រាយថា៖ «តាមពិតបាតុភូតហ្នឹង គឺវាទាក់ទងនឹងមេរៀន អ៊ីចឹងប្រសិនជាយើងចង់យល់បាតុភូត គឺយើងត្រូវយល់ពីមេរៀន ហើយមួយទៀតគឺយើងត្រូវយល់ពីពាក្យគន្លឹះ នៅក្នុងលំហាត់ ដើម្បីឲ្យយល់ពីបាតុភូត ថាវាចង់និយាយពីអ្វី ហើយវានឹងជួយសម្រួលដល់ការដោះស្រាយរបស់យើង»។
ចំពោះសិស្សមិនបានខំរៀនពីដើមឆ្នាំ កញ្ញាបានណែនាំឲ្យអ្នកទាំងអស់នោះ សង្ខេបមេរៀនឡើងវិញដោយផ្ដោតទៅលើនិយមន័យ ទ្រឹស្ដី រូបមន្ត ដែលពួកគាត់គិតថាសំខាន់ ដោយសារតែកញ្ញាជឿជាក់ថា លំហាត់បាក់ឌុប មានលំហាត់ខ្លះ គ្រាន់តែដាក់រូបមន្តចូលហើយដោះស្រាយតែប៉ុណ្ណោះ មិនមានបាតុភូតអ្វីច្រើនឡើយ ដូច្នេះហើយបើចាំរូបមន្ត គឺអាចធ្វើបានហើយ៕