- 2019-07-17 04:45:51
- ព័ត៌មាន
មន្ត្រីសុខាភិបាលច្រានចោលសារសំឡេងដែលថាក្រសួងហាមបរិភោគសាច់ជ្រូកមួយរយៈ
- 2019-07-17 04:45:51
- ចំនួនមតិ 0 | ចំនួនចែករំលែក 0
មន្ត្រីសុខាភិបាលច្រានចោលសារសំឡេងដែលថាក្រសួងហាមបរិភោគសាច់ជ្រូកមួយរយៈ
ចន្លោះមិនឃើញ
មន្ត្រីនាំពាក្យក្រសួងសុខាភិបាលបានច្រានចោលសារជាសំឡេងមួយដែលចែកបន្តគ្នាតាមបណ្ដាញសង្គមនិយាយពីការហាមបរិភោគសាច់ជ្រូកមួយរយៈ ខណៈជំងឺប៉េស្តជ្រូកអាហ្វ្រិកកំពុងផ្ទុះនៅកម្ពុជា។
សារជាសំឡេងនេះបានចែករំលែកតៗគ្នាតាមប្រអប់សាររបស់បណ្ដាញសង្គម ដែលមានខ្លឹមសារថាក្រសួងសុខាភិបាលបានហាមប្រជាពលរដ្ឋបរិភោគសាច់ជ្រូកមួយរយៈពេល ខណៈកំពុងមានការរាលដាលជំងឺប៉េស្តជ្រូកអាហ្វ្រិកក្នុងប្រទេស។
ថ្លែងទៅកាន់អ្នកសារព័ត៌មានក្នុងសិក្ខាសាលាផ្សព្វផ្សាយស្ដីពីការចូលរួមទប់ស្កាត់ជំងឺគ្រុនឈាម លោក វេជ្ជបណ្ឌិត លី សូវ៉ាន់ អ្នកនាំពាក្យក្រសួងសុខាភិបាល បានបដិសេធចំពោះសារជាសំឡេងនេះ និងថាក្រសួងមិនបានណែនាំបែបនេះនោះទេ។
លោកបន្តថា៖ «នេះសុទ្ធតែយកក្រសួងសុខាភិបាលមកលាបទៀត តាមពិតយើងមិនបាននិយាយទេ គឺយើងគ្រាន់តែ ប្រកាសថាមេរោគប៉េស្តជ្រូកអាហ្វ្រិកហ្នឹងមិនឆ្លងមកមនុស្ស ហើយក៏មិនប៉ះពាល់ដល់ខុសភាពសាធារណទេ... ជំងឺនេះមិនមែនជាជំងឺថ្មីទេ គេរកឃើញជាងមួយសតវត្សរ៍ហើយ វាកើតនៅអាហ្វ្រិក ឆ្លងមកអ៊ឺរ៉ុប អាម៉េរិក ថ្មីៗមកចិន មកវៀតណាម និងមកកម្ពុជាយើង»។
លោកវេជ្ជបណ្ឌិតឲ្យដឹងថាបើសិនជាចៃដន្យមានការបរិភោគប៉ះចំសាច់ជ្រូកកើតជំងឺនេះ ក៏មិនមានបញ្ហាសុខភាពដល់អ្នកបរិភោគដែរ។ អ្វីដែលសំខាន់លោកថាតាមវិធានការណ៍អប់រំ គឺមិនអនុញ្ញាតិឲ្យអ្នកបរិភោគ បរិភោគសាច់ជ្រូកឈឺងាប់នោះទេ។
គួរបញ្ជាក់ថាជំងឺប៉េស្តជ្រូកអាហ្វ្រិកបានមកដល់កម្ពុជាកាលពីខែមេសា កន្លងទៅ ហើយបច្ចុប្បន្នខេត្តដែលរកឃើញជំងឺនេះមានរតនគិរី ត្បូងឃ្មុំ កណ្ដាល តាកែវ និងស្វាយរៀង៕
