- 2019-07-19 08:46:22
- សុខភាព
គ្រាន់តែដើរមួយថ្ងៃ៣០នាទី ផ្ដល់អត្ថប្រយោជន៍ដ៏អស្ចារ្យដល់សុខភាព
- 2019-07-19 08:46:22
- ចំនួនមតិ 0 | ចំនួនចែករំលែក 0
គ្រាន់តែដើរមួយថ្ងៃ៣០នាទី ផ្ដល់អត្ថប្រយោជន៍ដ៏អស្ចារ្យដល់សុខភាព
ចន្លោះមិនឃើញ
ការសិក្សាមួយបង្ហាញថាការដើរបានផ្តល់ផលប្រយោជន៍ជាច្រើនដល់សុខភាព ហើយការដើរនេះទៀតសោតក៏អាចធ្វើបានដោយងាយស្រួលមិនចំណាយថ្លៃសេវាអ្វីផ្សេងៗដូចទៅកន្លែងហាត់ប្រាណនោះដែរ។
Walk For Health ជាអង្គការផ្នែកសុខភាពមួយមានទីតាំងនៅប្រទេសអង់គ្លេស លើកឡើងថាអ្នកដែល អង្គុយនៅមួយកន្លែងយូរ មិនសូវមានចលនាប្រឈមនឹងការស្លាប់លឿនជាងអ្នកដែលមានចលនាច្រើន។
អង្គការដដែលបង្ហាញតួលេខមួយថាមនុស្សស្លាប់ដោយសារមិនសូវធ្វើចលនាឬបញ្ចេញកម្លាំងពលកម្មមានចំនួន៦ភាគរយនៃអ្នកស្លាប់ទូទាំងពិភពលោក ហើយការមិនសូវមានចលនានេះបានក្លាយជាឃាតករធំទី៤ដែលសម្លាប់មនុស្សក្នុងពិភពលោកដូចគ្នា។
អង្គការដដែលបញ្ជាក់ដែរថាការមិនសូវបញ្ចេញកម្លាំងពលកម្មនេះ ក៏ជាដើមហេតុនាំឲ្យមានជំងឺទឹកនោមផ្អែម ជំងឺគាំងបេះដូង និងជំងឺមហារីកសុដន។ ដើម្បីដោះស្រាយបញ្ហានេះ អង្គការខាងលើបានផ្តល់អនុសាសន៍ដល់អ្នកដែលមិនសូវបានបញ្ចេញកម្លាំងពលកម្មឲ្យដើរឲ្យបានយ៉ាងតិច៣០នាទីក្នុងមួយថ្ងៃ។
ការដើរជួយការពារមិនឲ្យលើសជាតិស្ករ ឡើងទម្ងន់ខុសប្រក្រតី កាត់បន្ថយការឡើងសម្ពាធឈាម ជួយឲ្យគេងលក់ស្រួល កាត់បន្ថយអារម្មណ៍មួម៉ៅ និងជួយពង្រឹងការចងចាំជាដើម។ នេះបើតាមប្រភពដដែល។
ចំណែករបាយការណ៍មួយដែលធ្វើឡើងដោយក្រសួងសុខាភិបាលកម្ពុជា និងសាកលវិទ្យាល័យវិទ្យាសាស្រ្តសុខាភិបាល ចេញផ្សាយកាលឆ្នាំ២០១០ បាននិយាយដល់ប្រភេទជំងឺដែលមិនអាចដឹងមុន ដូចជាជំងឺទឹកនោមផ្អែម ជំងឺបេះដូង អំងឺដាច់សរសៃឈាមក្នុងខួរក្បាល និងមហារីកជាដើម។
ក្នុងករណីសិក្សានេះក៏បានលើកពីកត្តាបញ្ចេញកម្លាំងពលកម្ម ជាផ្នែកមួយក្នុងការសិក្សាពីកម្រិតប្រឈមនៃជំងឺទាំងនេះ។ បើតាមរបាយការណ៍នេះ អ្នករស់នៅទីប្រជុំជនប្រឈមនឹងការកើតជំងឺទឹកនោមផ្អែមពីរដងខ្ពស់ជាងអ្នកនៅទីជនបទ។ ចំណែកការឡើងសម្ពាធឈាមខ្ពស់ក៏ដូចគ្នា អ្នករស់នៅទីប្រជុំជនមានអត្រាខ្ពស់ជាងអ្នករស់នៅជនបទគឺ១៦,៩ភាគរយ ទល់នឹង១០ភាគរយ។
ចំពោះការណ៍ដែលអ្នករស់នៅទីប្រជុំជនមានអត្រាកើតជំងឺទាំងនេះខ្ពស់ជាងអ្នករស់នៅទីជនបទ ទំនងជាអ្នកនៅទីជនបទបានបញ្ជេញកម្លាំងពលកម្មច្រើនជាងអ្នករស់នៅទីប្រជុំជនក្នុងមួយថ្ងៃៗ។
បើតាមការសិក្សាប្រហាក់ប្រហែលគ្នាផ្សេងទៀត បានផ្តល់អនុសាសន៍ឲ្យប្រជាពលរដ្ឋដើរយ៉ាងតិចបាន៣០នាទីក្នុងមួយថ្ងៃ ឬ១៥០នាទីក្នុងមួយសប្តាហ៍៕