ប៉ូលិសហុងកុងរងការរិះគន់ខ្លាំងៗ ក្រោយក្រុមអាវសវាយប្រហារមកលើបាតុករយ៉ាងចាស់ដៃ

2019-07-23 02:16:02
ព័ត៌មាន

2019-07-23 02:16:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ប៉ូលិសហុងកុង កំពុងត្រូវរងការចោទប្រកាន់ពីបទមិនអាចការពារក្រុមអ្នកតវ៉ាដែលត្រូវបានវាយប្រហារដោយក្រុមបាតសង្គមអាវសកាលពីថ្ងៃអាទិត្យកន្លងទៅ។

យោងតាមសមាជិកសភាមកពីប្រឆាំងឲ្យដឹងថា ភាពអសកម្មរបស់ប៉ូលិសធ្វើឲ្យក្រុមបាតសង្គមបានដៃវាយប្រហារក្រុមអ្នកតវ៉ាដោយសន្ដិភាព។ ពួកក្រុមអាវសនាំគ្នាពាក់ម៉ាស និងប្រដាប់ទៅដោយដំបង អាវុធផ្សេងៗ វាយប្រហារមកលើអ្នកតវ៉ា និងអ្នកដំណើរនៅស្ថានីយរថភ្លើង បណ្ដាលឲ្យមនុស្សជាច្រើននាក់រងរបួស។

យោងតាមសារព័ត៌មានក្នុងតំបន់ឲ្យដឹងថា ហេតុការណ៍នេះបានកើតឡើងនៅស្ថានីយរថភ្លើង Yeun Long MTR ក្រោយពេលដែលលេចមុខក្រុមមនុស្សពាក់អាវពណ៌សនៅវេលាកណ្ដាលអាធ្រាត្រ ចេញមកបង្ក្រាបក្រុមបាតុករនៅមុខច្រកចូល ព្រមទាំងអ្នកដំណើរតាមផ្លូវ និងអ្នកកាសែតផងដែរ។ ក្នុងហេតុការណ៍នេះ គេមិនឃើញមានប៉ូលិសណាម្នាក់ចូលរួមពាក់ព័ន្ធនោះទេ រហូតដល់ម៉ោង ២៖៣០នាទីរំលងអាធ្រាត្រ ហើយប្រជាជនក្នុងតំបន់ជាច្រើនបង្ហាញការខឹងសម្បារនឹងប៉ូលិសដែលអនុញ្ញាតឲ្យក្រុមអាវសបង្កចលាចល។

ក្រោយកើតហេតុ មនុស្សយ៉ាងហោច ៣៦នាក់រងរបួសដោយក្នុងនោះ ៣នាក់ត្រូវបានបញ្ជូនទៅកាន់មន្ទីរពេទ្យដើម្បីសម្រាកព្យាបាល។ ជាមួយគ្នា រដ្ឋាភិបាលក្រុងហុងកុង បានធ្វើការថ្កោលទោសយ៉ាងធ្ងន់ធ្ងរចំពោះអំពើហិង្សារបស់ក្រុមអាវស ដែលចេញក្នុងសេចក្ដីថ្លែងការណ៍មួយកាលពីយប់មិញផងដែរ៕