- 2019-07-29 09:08:47
- ការអប់រំ
លោក លឹម លីហុង ប្រាប់ពីលក្ខណៈសម្បត្តិត្រូវមានដើម្បីបានអាហារូបករណ៍សិក្សានៅជប៉ុន
- 2019-07-29 09:08:47
- ចំនួនមតិ 0 | ចំនួនចែករំលែក 0
លោក លឹម លីហុង ប្រាប់ពីលក្ខណៈសម្បត្តិត្រូវមានដើម្បីបានអាហារូបករណ៍សិក្សានៅជប៉ុន
ចន្លោះមិនឃើញ
លោក លឹម លីហុង បានទៅប្រទេសជប៉ុនកាលពីខែតុលា ឆ្នាំ២០១២ ក្រោយបញ្ជប់ថ្នាក់បរិញ្ញាបត្រពីកម្ពុជា ដើម្បីបន្តការសិក្សាលើមុខវិជ្ជាច្បាប់ ទាំងថ្នាក់អនុបណ្ឌិត និងបណ្ឌិត ដោយបានចំណាយពេលជិតប្រាំមួយឆ្នាំក្នុងប្រទេសជឿនលឿនមួយនេះ។
លោកបានបញ្ចប់ការសិក្សាថ្នាក់បណ្ឌិតកាលពីឆ្នាំ២០១៨។ ឆ្លងកាត់បទពិសោធន៍ទទួលបានអាហារូបករណ៍សិក្សានៅប្រទេសជប៉ុននេះ លោកថាអ្នកចង់ទៅសិក្សានៅប្រទេសនេះក្នុងក្រមខណ្ឌអាហារូបករណ៍គួរមានលក្ខណៈសម្បត្តិមួយចំនួនជាគោល។
ភាសាអង់គ្លេសលោកថាមិនអាចជៀសផុតបានទេ ដែលអ្នកចង់បានអារូបករណ៍ត្រូវចេះ តែថាបើចង់ទៅជប៉ុន អ្នកដែលចេះភាសាជប៉ុនទំនងជាមានឱកាសកាន់តែច្រើន។ លោកបន្តថារូបលោកបានសិក្សាភាសាជប៉ុន និងបានទាំងរៀនពីច្បាប់របស់ជប៉ុនខ្លះផងមុននឹងបានដាក់អាហារូបករណ៍ទៅសិក្សាប្រទេសមួយនេះ។
លោកបន្ថែមបែបនេះថា៖ «បើគាត់មានពេលគួរតែទៅរៀនភាសាជប៉ុន បើមិនបាន[ចេះ]ច្រើន ក៏អាចថាបានត្រឹមនិយាយ ទំនាក់ទំនងមូលដ្ឋានក៏បានដែរ ដើម្បីងាយស្រួលបង្កើនទំនាន់ទំនង ឬបង្កើតមិត្តនៅប្រទេសជប៉ុនហ្នឹង»។
ក្រៅពីផ្នែកភាសាបរទេសលោកថាចំណោទបញ្ហាដែលត្រូវស្រាវជ្រាវ និងដំណោះស្រាយនៅពេលសិក្សាសិក្សានៅទីនោះក៏ជារឿងសំខាន់។ លោកបន្តថា៖ «និស្សិតដែលរៀនថ្នាក់ស្រាវជ្រាវនោះយើងចាំបាច់សរសេរនិក្ខេបបទថ្នាក់អនុបណ្ឌិត គេនឹងសួរថាអ្នកឯងពេលទៅរៀននៅជប៉ុននឹងស្រាវជ្រាវលើវិស័យអីគេ អ្វីជាចំណោទបញ្ហាដោះស្រាយយ៉ាងម៉េច»។
រីឯចំណុចទីបីវិញលោកថាគឺការមានទំនាក់ទំនងល្អ និងការហាត់ការងារក្នុងពេលរៀននៅថ្នាក់បរិញ្ញាបត្រ។ លោកឲ្យដឹងថារូបលោកផ្ទាល់បានរៀនផង និងចូលហាត់ការងារផងពេលកំពុងរៀនថ្នាក់បរិញ្ញាបត្រ។ ដោយមានទំនាក់ទំនងល្អជាមួយម្ចាស់ស្ថាប័ន លោកបានទទួលលិខិតឧទ្ទេសនាមមួយពីម្ចាស់ស្ថាប័ន ដើម្បីដាក់អាហារូបករណ៍ទៅសិក្សាថ្នាក់អនុបណ្ឌិត។
លោកបន្ថែមថា៖ «ខ្មែរយើងចង់បានអាហារូបករណ៍ទៅសិក្សានៅជប៉ុន ទី១ត្រូវពង្រឹកផ្នែកភាសាហ្នឹងឲ្យមែនទែន...ហើយត្រូវសម្រួចមុខវិជ្ជាសិក្សាស្រាវជ្រាវឲ្យមែនទែន ពេលទៅដល់នោះយើងស្រាវជ្រាវពីមុខវិជ្ជាអ្វី មានបញ្ហាអ្វីដែលយើងចង់ស្រាវជ្រាវ និងទីបីត្រូវក្ដាប់ព័ត៌មានឲ្យបានច្បាស់លាស់ សាកសួរសិស្សច្បង ការបានព័ត៌មានគ្រប់គ្រាន់យើងអាចសម្រេចចិត្តបានលឿន»។
ចុះសំណួរអ្វីខ្លះដែលអាចមានពេលសម្ភាសន៍?
សម្រាប់លោក លឹម លីហុង ពេលដាក់ពាក្យរៀនថ្នាក់អនុបណ្ឌិតមិនមានឆ្លងកាត់ការសម្ភាសន៍នោះទេ គឺថាបានជាប់តាមរយៈការដាក់ពាក្យ និងឆ្លើយសំណួរនានាទៅតាមតម្រូវការរបស់ម្ចាស់អាហារូបករណ៍នៅលើពាក្យសុំនោះ ដែលលោកថាហាក់មានលក្ខណៈពិសេសបន្តិច។ ប៉ុន្តែសម្រាប់ថ្នាក់បណ្ឌិតវិញលោកថាសំណួរដែលកើតឡើងពេលសម្ភាសន៍គឺទាក់ទនងនឹងគោលបំណងនៃការសិក្សា និងពេលចប់ការសិក្សាចង់ធ្វើអ្វីបន្តទៀតទៅថ្ងៃអនាគត។
លោកបន្ថែមថា៖ «មួយទៀតគឺគេសួរថាហេតុអ្វីបានជាចង់ទៅសិក្សានៅប្រទេសជប៉ុន តើនៅជប៉ុនមានអ្វីដែលអ្នកអាចរៀនបាន និស្សិតដែលត្រៀមយើងថាយើងមានចំណុចដែលត្រូវស្រាវជ្រាវឲ្យបានច្បាស់លាស់ អាហ្នឹងជាចំណុចវិជ្ជមាន»។
គួរបញ្ជាក់ថាបច្ចុប្បន្នលោក លឹម លីហុង ជាប្រធានសមាគមន៍អតីតនិស្សិតខ្មែរប្រចាំសាកលវិទ្យាល័យNagoya និងក៏ជាសមាជិកនៃ ASEAN-Nagoya Clubផងដែរ៕