- 2019-08-02 07:54:46
- ព័ត៌មាន
និស្សិតមកពី១០ប្រទេសនៅតំបន់អាស៊ីជុំគ្នានៅភ្នំពេញ និងសៀមរាបប្រាំមួយថ្ងៃ
- 2019-08-02 07:54:46
- ចំនួនមតិ 0 | ចំនួនចែករំលែក 0
និស្សិតមកពី១០ប្រទេសនៅតំបន់អាស៊ីជុំគ្នានៅភ្នំពេញ និងសៀមរាបប្រាំមួយថ្ងៃ
ចន្លោះមិនឃើញ
និស្សិតមកពីប្រទេសចំនួន១០ក្នុងតំបន់អាស៊ីនឹងចំណាយពេលប្រាំមួយថ្ងៃនៅទីក្រុងភ្នំពេញ និងខេត្តសៀមរាបដើម្បីចូលរួមកម្មវិធីវេទិកាបរិស្ថាននិស្សិតអាស៊ីលើកទីប្រាំបី។
កម្មវិធីនេះចាប់ថ្ងៃទី១ ដល់ថ្ងៃទី៦ ខែសីហា ឆ្នាំ២០១៩ ក្នុងរាជធានីភ្នំពេញ និងខេត្តសៀមរាប។ កម្មវិធីវេទិកាបរិស្ថាននិស្សិតអាស៊ីរៀបចំដោយមូលនិធិបរិស្ថានAEONដែលចាប់ផ្ដើមដំបូងនៅឆ្នាំ២០១២ ផ្ដោតលើការអប់រំផ្នែកបរិស្ថាន និងអភិរក្សបរិស្ថាន។
កាលពីព្រឹកមិញនិស្សិតទាំង១០ប្រទេសចំនួន៨០នាក់បានចូលរួមស្ដាប់ការណែនាំ និងបើកកម្មវិធីដោយមានមន្ត្រីក្រសួងអប់រំកម្ពុជា មន្ត្រីមកពីបណ្ដាស្ថានទូរបស់និស្សិតផងដែរ។
កម្មវិធីវេទិកាបរិស្ថាននិស្សិតអាស៊ីឆ្នាំនេះរៀបចំក្រោមប្រធានបទ «ការកសាងសន្តិភាពប្រកបដោយនិរន្តរភាព» ដែលមានសាកលវិទ្យាល័យភូមិន្ទភ្នំពេញជាម្ចាស់ផ្ទះទទួលនិស្សិតទាំងនេះ។និស្សិតទាំងអស់នឹងចុះតាមកន្លែងមួយចំនួននៅភ្នំពេញ និងទៅកាន់តំបន់អង្គរក្នុងខេត្តសៀមរាប ដើម្បីសិក្សាពីប្រវត្តិសាស្រ្តកម្ពុជា និងបរិស្ថានធម្មជាតិ។
ក្នុងពិធីបើកកម្មវិធីព្រឹកមិញសាកលវិទ្យាធិការងសាកលវិទ្យាល័យភូមិន្ទភ្នំពេញ លោកស្រី អ៊ុំ រ៉ាវី ថ្លែងថា៖ «ការដែលមានយុវជនចូលរួមក្នុងកិច្ចការការពារបរិស្ថាន មិនត្រឹមតែមានឥទ្ធិពលលើការផ្លាស់ប្តូរផ្នត់គំនិតពួកគេលើបញ្ហាបរិស្ថានប៉ុណ្ណោះទេ តែក៏អាចមានឥទ្ធិពលលើឪពុកម្តាយ សាច់ញាតិ និងក្រុមគ្រួសារពួកគេផងដែរ។ យុវជនជាឆ្អឹងខ្នងរបស់សង្គម ពួកគេអាចផ្លាស់ប្ដូរសង្គមជាមួយនឹងចំណេះដឹងរបស់គេ»។
និស្សិតទាំង១០ប្រទេសនោះមានកូរ៉េខាងត្បូង ចិន ជប៉ុន ឥណ្ឌូនេស៊ី ម៉ាឡេស៊ី កម្ពុជា វៀតណាម ថៃ ភីលីពីន និងមីយ៉ាន់ម៉ា៕
