សមត្ថកិច្ចចាប់បានរថយន្តនាំចូលគេចពន្ធជាង ៥០០គ្រឿង

2019-08-23 03:09:49
ព័ត៌មាន

2019-08-23 03:09:49
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តចាប់បាននិងឃាត់ទុកមានចំនួន ៥០០គ្រឿង ក្នុងនោះជាង២០០គ្រឿងត្រូវបានចាប់ដោយគយចល័ត។ ការចាប់បាននេះព្រោះមានទិន្នន័យកំណត់គោលដៅច្បាស់លាស់ពីប្រព័ន្ធបច្ចេកវិទ្យាក្រសួងសាធារណការ និងដឹកជញ្ជូន និងអគ្គនាយកដ្ឋានគយ និងរដ្ឋាករកម្ពុជា។ នេះបើយោងតាមផេកផ្លូវការរបស់ក្រសួងសាធារណការនិងដឹកជញ្ជូន។

ប្រតិបត្តិការរករថយន្តអត់ពន្ធកាន់តែមានប្រសិទ្ធភាពខ្ពស់បន្ទាប់ពីអគ្គនាយកដ្ឋានគយ និងរដ្ឋាករ បានតភ្ជាប់ប្រព័ន្ធស្វ័យប្រវត្តិកម្មជាមួយក្រសួងសាធារណការ និងដឹកជញ្ជូន ដែលផ្ដួចផ្ដើមឡើងដោយ ឯកឧត្ដម ស៊ុន ចាន់ថុល។

គួរកត់សម្គាល់ថា គំនិតផ្ដួចផ្ដើមដែលដឹកនាំដោយឯកឧត្ដមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានសហការជាមួយអគ្គនាយកដ្ឋានគយ និងរដ្ឋាករកម្ពុជា ក្រោមការជ្រោមជ្រែងពីឯកឧត្ដមអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន បានបង្កើតក្រុមការងារអន្តរក្រសួងមួយ។

ក្រុមការងារខាងលើនេះ កាលពីថ្ងៃទី២១ ខែឧសភា ឆ្នាំ២០១៨ បានសម្រេចដាក់ឱ្យដំណើរយន្តការប្រព័ន្ធបច្ចេកវិទ្យា ដើម្បីចែករំលែកទិន្នន័យចុះបញ្ជីយានយន្ត និងទិន្នន័យពន្ធនាំចូលយានយន្តទៅវិញទៅមក និងតាមដានភាពមិនប្រក្រតីពាក់ព័ន្ធ។

បន្ទាប់ពីដាក់ឲ្យដំណើរយន្តការប្រព័ន្ធបច្ចេកវិទ្យានេះដែរ សមត្ថកិច្ចបានផ្ដើមប្រតិបត្តិការ កាលពីថ្ងៃទី ២១ សីហា ២០១៩ ក្រុមការងារអន្តរក្រសួង បានចុះពិនិត្យជាក់ស្ដែងចំពោះរថយន្តមានភាពមិនប្រក្រតី ដែលមន្ត្រីគយ និងរដ្ឋាករមានសមត្ថកិច្ចបានឃាត់ទុកនៅឃ្លាំងគយបណ្ដោយមហាវិថីឈ្នះឈ្នះ។ ជាលទ្ធផល សមត្ថកិច្ចអន្តរក្រសួងបានឃាត់ទុកសរុបជាង ៥០០គ្រឿង។

បេសកកម្មខាងលើនេះ ត្រូវបានដឹកនាំដោយលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈ និងជាសហប្រធានក្រុមការងារអន្តរក្រសួង តភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក និងប្រព័ន្ធស្វ័យប្រវត្តិកម្មទិន្នន័យគយ និងលោក ប៉ោ សួន អនុប្រធាននាយកដ្ឋានកិច្ចការច្បាប់ សវនកម្ម និងទំនាក់ទំនាក់ទំនងសាធារណៈ និងជាអនុប្រធានក្រុមការងារ ដោយមានការចូលរួមពីមន្ត្រីជំនាញពាក់ព័ន្ធមកពីអគ្គនាយកដ្ឋានដឹកជញ្ជូនផ្លូវគោក អគ្គនាយកដ្ឋានគយ និងរដ្ឋាករកម្ពុជា និងនាយកដ្ឋានព័ត៌មានវិទ្យា និងទំនាក់ទំនងសាធារណៈ។

របាយការណ៍របស់ក្រសួងសាធារណការ និងដឹកជញ្ជូនបានឲ្យដឹងដែរថា កិច្ចខិតខំប្រឹងប្រែងនេះក៏បានចូលរួមធ្វើឱ្យចំណូលពន្ធនាំចូលយានយន្តមានការកើនឡើងប្រមាណ៣៤% ក្នុងឆ្នាំ២០១៨ ធៀបនឹងឆ្នាំ ២០១៧ ៕

រូបភាព៖ ផេកផ្លូវការក្រសួងសាធារណការ និងដឹកជញ្ជូន

អត្ថបទ៖ ប៊ិន ប៊ុណ្ណា