- 2019-08-30 02:50:34
- ព័ត៌មាន
អង្គការដោះមីនជប៉ុននឹងនៅជួយកម្ពុជារហូតអស់មីន ព្រោះចង់ឃើញស្នាមញញឹមពលរដ្ឋខ្មែរ
- 2019-08-30 02:50:34
- ចំនួនមតិ 0 | ចំនួនចែករំលែក 0
អង្គការដោះមីនជប៉ុននឹងនៅជួយកម្ពុជារហូតអស់មីន ព្រោះចង់ឃើញស្នាមញញឹមពលរដ្ឋខ្មែរ
ចន្លោះមិនឃើញ
អង្គការសកម្មភាពកំចាត់មីនក្រៅរដ្ឋាភិបាលជប៉ុនហៅកាត់ថាJMAS បានលើកឡើងថាខ្លួនចង់ឃើញស្នាមញញឹមរបស់ប្រជាជនកម្ពុជា ដែលជាហេតុនាំឲ្យអង្គការមួយនេះបន្តរួមចំណែកជាមួយរាជរដ្ឋាភិបាលកម្ពុជាក្នុងការដោះ និងបោសសម្អាតមីន។
ថ្លែងក្នុងសន្និសីទសារព័ត៌មាននៅស្ថានទូតជប៉ុនកាលពីម្សិលមិញលោក NAKANO Masahito ទីប្រឹក្សាបច្ចេកទេសរបស់អង្គការJMASបានលើកឡើងថាលោកនឹងខិតខំលើកទឹកចិត្តឲ្យប្រតិបត្តិករដោះមីនខិតខំធ្វើយ៉ាងណាសម្រេចឲ្យបានក្នុងការបោសសម្អាតមីនឲ្យអស់ក្នុងឆ្នាំ២០២៥ ដូចដែលរដ្ឋាភិបាលកម្ពុជាបានកំណត់។ ទោះយ៉ាងណាលោកមិនហានអះអាងមួយរយភាគរយថានឹងអាចដោះអស់នៅឆ្នាំ២០២៥។
លោកមានប្រសាសន៍ថា៖ «អស់ឬមិនអស់ខ្ញុំក៏មិនដឹងដូចគ្នាដែរ ខ្ញុំនឹងខំប្រឹងលើកទឹកចិត្តដល់ប្រតិបត្តិករដើម្បី[ដោះ]ឲ្យហើយ ខ្ញុំមានបំណងនៅជួយប្រទេសកម្ពុជារហូតដល់អស់មីន»។
លោកមានប្រសាសន៍បន្ថែមថាលោកចង់ឃើញស្នាមញញឹមរបស់ប្រជាជនកម្ពុជា ដោយទំនងសំដៅដល់ពេលប្រជាពលរដ្ឋអាចអាស្រ័យផលលើដីដែលបានដោះមីនរូច។
លោកបន្តថា៖ «ខ្ញុំខំប្រឹងជួយ ដោយសារមុនពេលខ្ញុំទៅវិញខ្ញុំចង់ឃើញស្នាមញញឹមរបស់ប្រជាពលរដ្ឋខ្មែរ»។
ក្នុងសន្និសីទសារព័ត៌មានកាលពីម្សិលមិញJMAS បានបង្ហាញនូវសមិទ្ធផលរបស់ខ្លួនដែលសម្រេចបានតាំងពីការចាប់ផ្ដើមការងារនៅកម្ពុជាពីឆ្នាំ២០០២ ដល់ឆ្នាំ២០១៨។
បើតាមទិន្ន័យនេះ គិតចាប់ពីឆ្នាំ២០០២មកដល់ឆ្នាំ២០១៨ JMACសម្រេចបាននូវការបោសសម្អាតផ្ទៃដីមានគ្រាប់មីន និងគ្រាប់មិនទាន់ផ្ទុះចំនួន៣ ២៨៧ ហិកតា។ ដោះមីនប្រឆាំងមនុស្សចំនួន១៩ ៤៥៤គ្រាប់ មីនប្រឆាំងរថក្រោះ ឬរថពាសដែកចំនួន៦៣៦គ្រាប់ និងគ្រាប់មិនទាន់ផ្ទុះគ្រប់ប្រភេទចំនួន៣៨៧ ៦១៩គ្រាប់។ ក្រៅពីនេះនៅមានក្រុមឆ្លើយតបបន្ទាន់បានឆ្លើយតបទៅនឹងការរាយការណ៍ពីប្រជាពលរដ្ឋទាក់ទងនឹងគ្រាប់មីន ឬគ្រាប់មិនទាន់ផ្ទុះចំនួន៣៧ ៥៣៤លើក៕
