- 2019-09-03 02:13:10
- ព័ត៌មាន
ប្រទេស៩ ដែលបានផ្លាស់ប្តូរដ្ឋធានី ទៅទីតាំងថ្មី
- 2019-09-03 02:13:10
- ចំនួនមតិ 0 | ចំនួនចែករំលែក 0
ប្រទេស៩ ដែលបានផ្លាស់ប្តូរដ្ឋធានី ទៅទីតាំងថ្មី
ចន្លោះមិនឃើញ
ប្រទេសដែលបានរើរដ្ឋធានីរួមមាន៖
១. មីយ៉ាន់ម៉ា
ទីក្រុង យ៉ង់ហ្គូន គឺជាអតីតរដ្ឋធានីរបស់មីយ៉ាន់ម៉ា។ នៅក្នុងឆ្នាំខែវិច្ឆិកា ឆ្នាំ២០០៥ រដ្ឋាភិបាលយោធាមីយ៉ាន់ម៉ា បានប្រាប់មន្រ្តី និងបុគ្គលិករដ្ឋាភិបាលទាំងអស់ ឲ្យរើទៅកាន់ក្រុងណៃពិដោ ដែលត្រូវបានសាងសង់ក្នុងឆ្នាំ២០០២។ ណៃពិដោ ជាទីក្រុងយុទ្ធសាស្រ្ត និងស្ថិតនៅចំកណ្តាលប្រទេសជាងក្រុង យ៉ង់ហ្គូន។
២. រុស្ស៊ី
ក្រុងមូស្គូ ជារាជធានីរបស់អាណាចក្ររុស្ស៊ី ពីស.វទី ១៤ ដល់ឆ្នាំ ១៧១២។ បន្ទាប់មក រុស្ស៊ី បានផ្លាស់ប្តូររាជធានី ទៅកាន់ក្រុង St. Petersburg ដើម្បីនៅកាន់តែកៀកអឺរ៉ុប។ នៅឆ្នាំ១៩១៨ ក្រុងមូស្គូ បានក្លាយជារដ្ឋធានីម្តងទៀត របស់រុស្ស៊ី។
៣. ប្រេស៊ីល
ដោយសារតែមានមនុស្សរស់នៅកុះករច្រើនពេក នៅទីក្រុង Rio de Janeiro ប្រេស៊ីល បានផ្លាស់ប្តូររដ្ឋធានី ទៅកាន់ក្រុង Brasilia នៅក្នុងឆ្នាំ១៩៦១។
៤. នីហ្សេរីយ៉ា
ប្រទេសនីហ្សេរីយ៉ា បានរើរដ្ឋធានី ពីទីក្រុង Lagos ទៅកាន់ក្រុង Abuja ក្នុងឆ្នាំ១៩៩១។ មូលហេតុ គឺដោយសារតែមានមនុស្សរស់នៅណែនណាន់តាន់តាប់ក្នុងទីក្រុង Lagos។ ក្រុង Abuja ស្ថិតនៅភាគកណ្តាលប្រទេស ជាកន្លែងដែលមានការរស់នៅដោយស្មើភាពគ្នារវាង ក្រុមសាសនា និងជនជាតិភាគតិចនានា។
៥. កាហ្សាក់ស្ថាន
ក្រុង Almaty នៅភាគខាងត្បូង កាហ្សាក់ស្ថាន គឺជារដ្ឋធានី នៅពេលដែលប្រទេសនេះ ទទួលបានឯករាជ្យពីសហភាពសូវៀត នៅក្នុងឆ្នាំ១៩៩១។ នៅខែធ្នូ ឆ្នាំ១៩៩៧ រដ្ឋាភិបាល ក៏បានផ្លាស់ប្តូររដ្ឋធានី ទៅកាន់ក្រុង Astana ដោយសារក្រុង Almaty មិនអាចពង្រីកទៀតបាន អាចនឹងជួបគ្រោះរញ្ជួយដី ព្រមទាំងស្ថិតនៅកៀកនឹងប្រទេសជិតខាងផងដែរ ដោយអាចបង្កជាបញ្ហានយោបាយផ្សេងៗ។
៦. Belize
នៅក្នុងឆ្នាំ១៩៦១ ខ្យល់ព្យុះហារីខែន Hattie បានបំផ្លាញទីក្រុង Belize ដែលជាអតីតរដ្ឋធានីរបស់ប្រទេស Belize។ នៅឆ្នាំ ១៩៧០ ទីក្រុង Belmopan បានក្លាយជារដ្ឋធានីថ្មីរបស់ប្រទេសនេះ ដោយទីក្រុងនេះ អាចការពារប្រតិបត្តិការរបស់រដ្ឋាភិបាល ឯកសារ និងប្រជាជន ក្នុងករណីបើមានព្យុះហារីខែនទៀត។
៧. តាហ្សានី
នៅក្នុងទសវត្សរ៍ឆ្នាំ ១៩៧០ ប្រទេសតាហ្សានី បានចាប់ផ្តើមរើរដ្ឋធានី ពីក្រុង Dar es Salaam ទៅកាន់ក្រុង Dodoma។ ប៉ុន្តែជាច្រើនទសវត្សរ៍មកនេះ ការរើរដ្ឋធានី មិនទាន់បានបញ្ចប់នៅឡើយ។
៨. កូដូវ័រ
នៅក្នុងឆ្នាំ ១៩៨៣ ក្រុង Yamoussoukro ក្លាយជារដ្ឋធានីថ្មីរបស់ប្រទេស កូដូវ័រ។ រដ្ឋធានីថ្មីនេះ ជាស្រុកកំណើតរបស់ប្រធានាធិបតី លោក Felix Houphouet-Boigny ដែលចង់អភិវឌ្ឍនៅតំបន់កណ្តាល នៃប្រទេស។ ទោះជាយ៉ាងណា ការិយាល័យរដ្ឋាភិបាល និងស្ថានទូតបរទេស នៅតែស្ថិតក្នុងទីក្រុង Abidjan ដែលជាអតីតរដ្ឋធានីនោះនៅឡើយ។
៩. ប៉ាគីស្ថាន
នៅក្នុងឆ្នាំ ១៩៥៩ ប្រទេសប៉ាគីស្ថាន បានសម្រេចចិត្តរើរដ្ឋធានីពីក្រុង Karachi ស្ថិតនៅភាគខាងត្បូង ទៅកាន់ក្រុង Islamabad ស្ថិតនៅភាគខាងជើងប្រទេស។ នៅឆ្នាំ១៩៦១ រដ្ឋធានីថ្មី ត្រូវបានចាប់ផ្តើមសាងសង់ ដោយប្រើរយៈពេលជាងរាប់ទសវត្សរ៍ ទើបបញ្ចប់ការសាងសង់។
ក្រៅពីប្រទេសខាងលើនេះ អេហ្ស៊ីប ក៏បានបញ្ចេញផែនការសង់រដ្ឋធានីថ្មី នៅជាយក្រុងគែរ ក្នុងទំហំផ្ទៃដីប្រហែល ៧០០គីឡូម៉ែត្រក្រឡា។
ថ្មីៗនេះ ឥណ្ឌូណេស៊ី ក៏បានប្រកាសពីបំណងនៃការរើរដ្ឋធានីចេញពីក្រុងហ្សាការតាផងដែរ ដោយសារតែបញ្ហាការកកស្ទះចរាចរខ្លាំងពេក៕