- 2019-09-18 03:05:58
- ព័ត៌មាន
ផ្ទះរចនាប័ទ្មខ្មែរតែប្រាំប្រភេទប៉ុណ្ណោះដែលត្រូវអនុញ្ញាតឲ្យអ្នកស្រុកអង្គរសាងសង់បាន
- 2019-09-18 03:05:58
- ចំនួនមតិ 0 | ចំនួនចែករំលែក 0
ផ្ទះរចនាប័ទ្មខ្មែរតែប្រាំប្រភេទប៉ុណ្ណោះដែលត្រូវអនុញ្ញាតឲ្យអ្នកស្រុកអង្គរសាងសង់បាន
ចន្លោះមិនឃើញ
អាជ្ញាធរជាតិអប្សរាឲ្យដឹងថាខ្លួនបានអនុញ្ញាតឱ្យអ្នកស្រុកអង្គរ ជួសជុលផ្ទះចាស់ទ្រុឌទ្រោម ឬសាងសង់ផ្ទះថ្មីជំនួសផ្ទះចាស់ ហើយផ្ទះដែលត្រូវបានអនុញ្ញាតឱ្យសាងសង់ គឺជាប្រភេទផ្ទះដែលមានរចនាប័ទ្មបែបខ្មែរ គ្មានគ្រឹះជ្រៅ ឬលក្ខណៈទំនើបកម្ម។
នៅលើទំព័រហ្វេសប៊ុករបស់ខ្លួននាព្រឹកនេះ អាជ្ញាធរជាតិអប្សរាសរសេរថាផ្ទះមានរចនាប័ទ្មខ្មែរចំនួនប្រាំប្រភេទដែលអនុញ្ញាតគឺប្រភេទផ្ទះខ្មែរ ឬកឹង ប្រភេទផ្ទះរោង(ផ្ទះកន្តាំង) ប្រភេទផ្ទះរោងដោល ប្រភេទផ្ទះរោងឌឿង និងប្រភេទផ្ទះប៉ិត។ ចំពោះប្រភេទផ្ទះក្រៅពីនេះ អាជ្ញាធរជាតិអប្សរាមិនអនុញ្ញាតឡើយ ដូចជាផ្ទះតៀម ផ្ទះល្វែងមួយជាន់ ឬច្រើនជាន់ ឬសំណង់ទាំងឡាយណាដែលមានការជីកគ្រឹះជ្រៅទៅក្នុងដី និងមានលក្ខណៈទំនើបកម្ម។
ប្រភពបន្តថាក្នុងនោះដែរ អាជ្ញាធរជាតិអប្សរក៏បានគិតគូរដល់ថ្នាំពណ៌ផ្ទះ ដំបូលត្រូវធ្វើអំពីក្បឿងប្រើពណ៌ដីដុត ឬពណ៌ស៊ីម៉ងត៍ ហ្វ៊ីប្រូ ឬស័ង្កសីត្រូវប្រើពណ៌ក្រហម ឬពណ៌បៃតង ជញ្ជាំងឥដ្ឋខាងក្រោមអាចលាបពណ៌ស៊ីម៉ងត៍ ឬពណ៌ដីលែង ឱ្យស្រគាំទៅនឹងពណ៌ឈើ ចំណែកឯជញ្ជាំង ទ្វារ បង្អួច ដែលធ្វើអំពីឈើត្រូវទុកសាច់ឈើធម្មជាតិ ឬក៏លាបពណ៌ដូចឈើធម្មជាតិ។ ពណ៌ក្រៅពីនេះដែលមានសភាពស្រស់ឆើតឆាយ ត្រូវបានហាមឃាត់ ពុំអនុញ្ញាតឡើយ។
អាជ្ញាធរជាតិអប្សរាពន្យល់ថា៖ «ដើម្បីថែរក្សា និងលើកកម្ពស់ទេសភាពវប្បធ៌មក្នុងរមណីយដ្ឋានអង្គរ ជាពិសេសលើកតម្លៃនិងអភិរក្សផ្ទះបុរាណខ្មែរ អាជ្ញាធរជាតិអប្សរាបានដាក់ចេញនូវគោលការណ៍គំរូសាងសង់លំនៅដ្ឋានបែបខ្មែរបុរាណដល់អ្នកស្រុកអង្គរ។ ផ្ទះបែបបុរាណខ្មែរ ជាប្រភេទផ្ទះបានកសាងខ្ពស់ផុតពីដី ជាប្រភេទសំណង់ស្រាល គ្មានការជីកគ្រឹះជ្រៅទៅក្នុងដី និងមានទម្រង់៥ប្រភេទ ដោយប្រភេទនីមួយៗមានភាពខុសគ្នាត្រង់រចនាប័ទ្មនៃដំបូល»៕