- 2019-10-17 02:16:38
- ព័ត៌មាន
សពសត្វប្រើសមួយក្បាលនឹងដឹកពីខេត្តព្រះវិហារទៅសៀមរាបដើម្បីធ្វើជារូបសំណាក
- 2019-10-17 02:16:38
- ចំនួនមតិ 0 | ចំនួនចែករំលែក 0
សពសត្វប្រើសមួយក្បាលនឹងដឹកពីខេត្តព្រះវិហារទៅសៀមរាបដើម្បីធ្វើជារូបសំណាក
ចន្លោះមិនឃើញ
អ្នកនាំពាក្យក្រសួងបរិស្ថានឲ្យដឹងថាសត្វប្រើសមួយក្បាលដែលត្រូវព្រានព្រៃបាញ់ស្លាប់កាលពីម្សិលមិញនៅខេត្តព្រះវិហារនឹងត្រូវដឹកទៅកាន់ខេត្តសៀមរាប ដើម្បីធ្វើជារូបសំណាកទុកបម្រើផលប្រយោជន៍សម្រាប់ការសិក្សាផ្នែកវិទ្យាសាស្រ្តអំពីជីវៈចម្រុះ។
ឯកឧត្តម នេត្រ ភក្រ្តា អ្នកនាំពាក្យក្រសួងបរិស្ថានបានឲ្យដឹងតាមរយៈសេចក្ដីប្រកាសព័ត៌មានរបស់ក្រសួងនាព្រឹកនេះថាក្នុងរយៈពេលពីរខែចុងក្រោយនេះសត្វប្រើសចំនួនបីក្បាលហើយបានស្លាប់នៅក្នុងខេត្តព្រះវិហារ។ សត្វប្រើសទីមួយបានស្លាប់ដោយសាររថយន្តបុក មួយក្បាលទៀតត្រូវព្រានព្រៃបាញ់សម្លាប់ និងមួយក្បាលចុងក្រោយស្លាប់កាលពីម្សិលមិញនេះក៏ត្រូវព្រានព្រៃបាញ់ដោយកាំភ្លើងច្នៃចំក បណ្ដាលឲ្យស្លាប់។
ឯកឧត្តមឲ្យដឹងថាសត្វប្រើសនីមួយៗមានទម្ងន់២០០គីឡូក្រាម ហើយសត្វប្រើសស្លាប់ចុងក្រោយនេះបានរត់មកដល់ភូមិអ្នកស្រុកនៅជាប់នឹងដែនជម្រកសត្វព្រៃព្រះរការ ក្នុងខេត្តព្រះវិហារ។ សម្រាប់សពសត្វប្រើសនេះក៏ត្រូវប្រជាពលរដ្ឋធ្វើពិធីសាសនាឧទ្ទិសកុសលដល់សត្វប្រើសនេះផងដែរ។
ក្រៅពីនេះឯកឧត្តមបញ្ជាក់ថាសពសត្វប្រើសនេះនឹងត្រូវដឹកទៅកាន់ខេត្តសៀមរាបដើម្បីធ្វើជារូបសំណាកទុកបម្រើផលប្រយោជន៍សម្រាប់ការសិក្សាផ្នែកវិទ្យាសាស្រ្តអំពីជីវៈចម្រុះ និងសម្រាប់ការដាក់តាំងពិព័រណ៌សម្រាប់សាធារណជនទស្សនាពេលមានពិព័រណ៌នានាដែលក្រសួងបរិស្ថាន ចូលរួម។ ។
ក្នុងសេចក្ដីប្រកាសព័ត៌មានសរសេរទៀតថា៖ «ជាមួយគ្នានេះ រដ្ឋលេខាធិការក្រសួងបរិស្ថាន ឯកឧត្តម នេត្រ ភក្ត្រា បានថ្លែងថាបទល្មើសសត្វព្រៃនៅតែកើតមាន ប៉ុន្តែថា ចំនួននៃបទល្មើសមានការថយចុះដោយសារតែការរឹតបន្តឹងការអនុវត្តច្បាប់ប្រឆាំងនឹងក្រុមជនល្មើស ការទប់ស្កាត់បង្ក្រាបបទល្មើស និងការដកអន្ទាក់ពីក្នុងព្រៃ ការចុះផ្សព្វផ្សាយអប់រំ ណែនាំ ការចុះបិទខិត្តប័ណ្ណ រាយការណ៍ពីបទល្មើសសត្វព្រៃផ្សេងៗ »៕