នា​ថ្ងៃ​ទី១៥ ខែមករា ឆ្នាំ២០២០ ធនាគារអេស៊ីលីដា ភីអិលស៊ី និងធនាគារឯកទេស វីង (ខេមបូឌា) លីមីធីត បាន​ប្រកាសជាសាធារណៈ ស្តីអំពី​ពិធី​ដាក់​ឲ្យ​ដំណើរ​ការ​សេវាផ្ទេរ និងទូទាត់ប្រាក់ រវាងធនាគារ​ទាំងពីរ។

ពិធីដាក់ឱ្យដំណើរការសេវាផ្ទេរ និងទូទាត់ប្រាក់នេះ មានការចូលរួមពីបណ្ឌិត អ៊ិន ចាន់នី ប្រធាន​នាយកប្រតិបត្តិ ធនាគារ អេស៊ីលីដា ភីអិលស៊ី និងអ្នកឧកញ៉ា គិត ម៉េង ប្រធានក្រុមប្រឹក្សាភិបាល ធនាគារ ឯកទេស វីង (ខេមបូឌា) លីមីធីត ព្រមទាំងថ្នាក់ដឹកនាំរបស់ស្ថាប័នទាំងពីរ ។

កិច្ចសហប្រតិបត្តិការរវាងធនាគារទាំងពីរ គឺ​ក្នុង​គោល​បំណង​ដើម្បី​បង្កើន​ភាពងាយ​ស្រួល​ជូន​ដល់​អតិថិជន​ក្នុង​ការធ្វើប្រតិបត្តិការ ដូចខាងក្រោម៖

១- ផ្ទេរប្រាក់ រវាងគណនី Core Banking របស់ធនាគារ អេស៊ីលីដា ភីអិលស៊ី និងគណនីវីង

២- ផ្ទេរប្រាក់ រវាងគណនីអេស៊ីលីដាយូនីធីទាន់ចិត្ត និងគណនីវីង

៣- ទូទាត់សំណងឥណទានទៅកាន់គណនី Core Banking របស់ធនាគារ អេស៊ីលីដា ភីអិលស៊ី តាមរយៈភ្នាក់ងារវីង

បណ្ឌិត អ៊ិន ចាន់នី ប្រធាននាយកប្រតិបត្តិ ធនាគារ អេស៊ីលីដា ភីអិលស៊ី បានមានប្រសាសន៍ថា៖ "ធនាគារ អេស៊ីលីដា ភីអិលស៊ី មានសេចក្តីសោមនស្សរីករាយ ដែលធនាគារ ឯកទេស វីង (ខេមបូឌា) លីមីធីត បានចាប់ដៃគូជាយុទ្ធសាស្រ្ត ក្នុងកិច្ចសហប្រតិបត្តិការជាមួយធនាគារ អេស៊ី​លីដា ភីអិលស៊ី ក្នុង​ការ​បម្រើ​សេវា​ផ្ទេរ​ប្រាក់ និង​ទូទាត់​ប្រាក់​របស់​ស្ថាប័ន​ទាំង​ពីរ​ឲ្យ​កាន់​តែ​ទូលំ​ទូលាយ​ថែមទៀត ដើម្បីលើកកម្ពស់ក្នុងការពង្រីកប្រតិបត្តិការធនាគារទាំងពីរឱ្យកាន់តែទំនើប ប្រកប​ដោយប្រសិទ្ធភាព និងសុវត្ថិភាពខ្ពស់ថែមទៀត ដែល​អនុញ្ញាត​ឲ្យ​អតិថិជន​របស់​ធនាគារ​ទាំង​ពីរ អាច​ធ្វើ​ការ​ផ្ទេរ និងទូទាត់ប្រាក់រវាងគ្នា និងគ្នា"។

បណ្ឌិត អ៊ិន ចាន់នី បាន​បន្ត​ថា​កិច្ចសហប្រតិបត្តិការនេះ នាំ​ឲ្យ​ធនាគារ​ទាំង​ពីរ​មាន​បណ្ដាញ​ប្រតិបត្តិការ​សម្បូរ​បែបចំនួន ៤៣៤៧៦ កន្លែង គ្របដណ្តប់គ្រប់ខេត្ត-រាជធានី នៃ​ព្រះ​រាជា​ណាចក្រ​កម្ពុជា ធ្វើឲ្យអតិថិជនងាយស្រួលក្នុងការជ្រើសរើស ដែល​ជំរុញ​ឲ្យ​សេវា​ផ្ទេរ​ប្រាក់​កាន់​តែ​ទូលំ​ទូលាយ ឆាប់រហ័ស ងាយស្រួល និងមានសុវត្ថិភាព។

សមិទ្ធផល​នេះបានផ្តល់អត្ថប្រយោជន៍យ៉ាងច្រើនដល់អតិថិជន និងសាធារណៈជន និង​គាំទ្រ​ដល់​ការ​រីក​លូតលាស់​របស់អតិថិជន ជាមួយនឹងការកាត់ បន្ថយចំណាយ និងហានិភ័យ។ ឥឡូវនេះ អតិថិជន​ឥណទាន និងអតិថិជនដែលមានគណនីនៅ ធនាគារ អេស៊ីលីដា ភីអិលស៊ី អាច​ធ្វើ​ទូទាត់​សង​ឥណ​ទាន និង​ធ្វើការ​ដក-ដាក់សាច់ប្រាក់ នៅ​តាម​បណ្ដាញ​ប្រតិបត្តិការ​របស់​ធនាគារ​ទាំង​ពីរ​គ្រប់​ទី​កន្លែងទូទាំងប្រទេស។

លោកបណ្ឌិតបានបន្ថែមថា "ធនាគារ អេស៊ីលីដា ភីអិលស៊ី ជាធនាគារឌីជីថល ដែលមាន អេស៊ីលី​ដា យូនីធី ទាន់ចិត្ត ដែល​អតិថិជន​អាច​ធ្វើ​ប្រតិបត្តិការ​សេវា​ធនាគារ​យ៉ាង​សម្បូរ​បែប​តាម​រយៈទូរសព្ទ​ដៃដោយខ្លួនឯង។ គិតមកដល់បច្ចុប្បន្ននេះ អេស៊ីលីដា យូនីធី ទាន់ចិត្ត ជា​សេវា​ធនាគារ​តាម​ទូរសព្ទ​ដែលដែលធំជាងគេនៅព្រះរាជាណាចក្រកម្ពុជា ដែលមានអ្នកចុះឈ្មោះប្រើ អេស៊ីលីដា យូនីធី ទាន់​ចិត្ត ចំនួន ១ ២២៦ ៣៨៣ ជាលក្ខណៈបុគ្គល និង ៣០ ៩៨៩ ជាលក្ខណៈដៃគូ។

អំពីធនាគារ អេស៊ីលីដា ភីអិលស៊ី

ធនាគារ អេស៊ីលីដា ភីអិលស៊ី មានក្រុមហ៊ុនបុត្រសម្ព័ន្ធចំនួនប្រាំ គឺអេស៊ីលីដា ស៊ីឃ្យួរឹធី ភីអិលស៊ី វិទ្យាស្ថាន ពាណិជ្ជសាស្ត្រ អេស៊ីលីដា អេស៊ីលីដា ប្រូភើធី អិលធីឌី ធនាគារ អេស៊ីលីដា ឡាវ លីមី​ធីត និងស្ថាប័នមីក្រូហិរញ្ញវត្ថុ អេស៊ីលីដា មីយ៉ាន់ម៉ា និង​ព្រម​ទាំង​មាន​ការិយាល័យ​តំណាង​នៅ​សាធារណរដ្ឋ​សហភាពមីយ៉ាន់ម៉ា។

ធនាគារ អេស៊ីលីដា ភីអិលស៊ី មានទ្រព្យសកម្មសរុបចំនួនជាង ៦,១៩ ពាន់លានដុល្លារអាមេរិក សមតុល្យ​ឥណទានសរុបចំនួន ៣,៨៨ ពាន់លានដុល្លារអាមេរិក និងប្រាក់បញ្ញើសន្សំសរុបចំនួន ៤ ៣៣ ពាន់លានដុល្លារអាមេរិក និងមានអតិថិជនប្រមាណជាងពីរលាននាក់ គិតត្រឹមដំណាច់ខែធ្នូ ឆ្នាំ​២០១៩ នេះ៕

សម្រាប់ព័ត៌មានបន្ថែមសូមទស្សនាវេបសាយ: www.acledabank.com.kh

ធនាគារ ឯកទេស វីង (ខេមបូឌា) សម្រាប់ព័ត៌មានបន្ថែមសូមចូលទៅកាន់ទំព័រហ្វេសប៊ុក https://www.facebook.com/WINGmoney/

សម្រាប់ព័ត៌មានបន្ថែម សូមទាក់ទងតាមរយៈ លោក ផល សុខចំរើន នាយកប្រតិបត្តរងទីផ្សារ ទូរស័ព្ទ៖ ០១៥ ៨០០ ៩០៣