ហួសចិត្ត! ក្រុមហ៊ុនវៀតណាម យកក្រដាសអនាម័យមកផលិតម៉ាស់ ត្រូវអាជ្ញាធរចុះចាប់

2020-02-14 06:50:52
ព័ត៌មាន

2020-02-14 06:50:52
ចំនួនមតិ 0 | ចំនួនចែករំលែក 0

ចន្លោះមិនឃើញ

អាជ្ញាធរទីក្រុងហាណូយ បានរកឃើញក្រុមហ៊ុនមួយដែលយកក្រដាសអនាម័យមកផលិតជាម៉ាស់សម្រាប់លក់ទៅកាន់ទីផ្សារ ខណៈពេលតម្រូវការកើនឡើងខ្ពស់ដោយសារកូរ៉ូណាវីរុសវាយប្រហារ។

យោងតាមអាជ្ញាធរឲ្យដឹងថា ក្រុមហ៊ុន Viet Han Company Ltd ដែលមានរោងចក្រស្ថិតក្នុងសង្កាត់ Thuong Tin ត្រូវបានអាជ្ញាធរចុះបង្ក្រាបកាលពីថ្ងៃពុធ។ អាជ្ញាធរបានរកឃើញដុំក្រដាសអនាម័យជាច្រើន ដែលត្រូវបានប្រើប្រាស់សម្រាប់ធ្វើជាស្រទាប់ម៉ាស់។ យោងតាមប្រធាននាយកដ្ឋានឃ្លាំមើលទីផ្សារហាណូយលក Hoang Dai Nghia បានឲ្យដឹងថា "ក្រុមហ៊ុននេះ កំពុងតែបោកប្រាស់អតិថិជនខណៈពេលដែលកូរ៉ូណាវីរុសកំពុងផ្ទុះឡើង។” លោកបន្ថែមថា ម៉ាស់ក្លែងក្លាយទាំងនេះ ត្រូវបានរឹបអូស ហើយនាយកដ្ឋានកំពុងពិចារណាផាកពិន័យធ្ងន់ធ្ងរទៅលើក្រុមហ៊ុន។ ជាមួយគ្នាដែរ ក្រុមហ៊ុន Viet Han មិនបានចុះឈ្មោះជាអ្នកផលិតឧបករណ៍វិជ្ជសាស្ត្រនោះទេ ប៉ុន្តែជាក្រុមហ៊ុនបោះពុម្ភ និងផលិតក្រដាសជូតមាត់។

គួរបញ្ជាក់ថា ក្នុងរយៈពេល ១២ថ្ងៃចុងក្រោយនេះ អាជ្ញាធរវៀតណាមបានរកឃើញការរំលោភបំពានជាង ៤ ២០០ករណីក្នុងការផលិតម៉ាសទូទាំងប្រទេស។ ម៉ាស់ ត្រូវបានកើនឡើងតម្រូវការខ្ពស់ក្នុងប្រទេសវៀតណាម ខណៈពេលដែលមានរបាយការណ៍ពីអ្នកឆ្លងកូរ៉ូណាវីរុស ១៦ករណីហើយបើគិតមកត្រឹមថ្ងៃសុក្រនេះ៕

ប្រភព៖ vnexpress ប្រែសម្រួល៖ រ័ត្ន