- 2016-02-13 19:32:46
- ព័ត៌មាន
យុវវ័យ ៥នាក់នៅខេត្តតាកែវ បង្ហាញគម្រោងថ្ងៃ១៤ កុម្ភៈ
- 2016-02-13 19:32:46
- ចំនួនមតិ 0 | ចំនួនចែករំលែក 0
យុវវ័យ ៥នាក់នៅខេត្តតាកែវ បង្ហាញគម្រោងថ្ងៃ១៤ កុម្ភៈ
ចន្លោះមិនឃើញ
យុវវ័យសម័យថ្មីហាក់ចាប់យកវប្បធម៌បរទេសកាន់តែច្រើនឡើង មិនថាតែនៅទីក្រុង ឬតាមបណ្ដាខេត្តនោះទេ ប៉ុន្តែពួកគេបានបង្ហាញការយល់ឃើញខុសៗគ្នា។ សិស្សានុសិស្សមួយចំនួនបានយល់ច្រឡំថាថ្ងៃ១៤ កុម្ភ: ជាថ្ងៃណាត់ជួបសង្សារ ឬណាត់ជួបគូស្នេហ៍ ប៉ុន្តែមួយចំនួនទៀតគិតថាជាថ្ងៃល្អសម្រាប់មនុស្សជាទីស្រលាញ់ប៉ុណ្ណោះ។ ចុះយុវវ័យនៅខេត្តតាកែវ នឹងធ្វើអ្វីខ្លះនៅថ្ងៃ១៤ កុម្ភៈ?
ខាងក្រោមនេះជាគម្រោងយុវវ័យមួយចំនួននៅខេត្តតាកែវក្នុងថ្ងៃ១៤ កុម្ភៈ៖
យុវសិស្ស ទាវ គឹមហុង ជាសិស្សថ្នាក់ទី ១២ក បានរៀបរាប់ថា ថ្ងៃ១៤កុម្ភ:ជាទិវានៃក្ដីស្រលាញ់ រូបគេចង់រួមចំណែកខ្លះក្នុងសង្គមដោយគិតបបួលមិត្តភ័ក្ដិទៅសួរសុខទុក្ខលោកគ្រូអ្នកគ្រូដែលធ្លាប់បង្រៀនតាំងពីនៅបឋមសិក្សា ភ្ជាប់ជាមួយកាដូតិចតួចជូនគាត់ដើម្បីជាការតបស្នង។
ដោយឡែក កញ្ញា ឌុក ស្រីលក្ខណ៏ ជាមន្ត្រីកសិកម្មខេត្ត បានប្រាប់ Sabay ថា "ចំពោះនាងខ្ញុំថ្ងៃ១៤ កុម្ភៈ គឺជាថ្ងៃធម្មតាប៉ុណ្ណោះសម្រាប់យើងជាកូនខ្មែរ។ ប៉ុន្តែប្អូននាងខ្ញុំបបួលគ្នាចាក់បាញ់ឆែវហូបជួបជុំបងប្អូនសប្បាយលេងប៉ុណ្ណឹង"។
និស្សិតពេទ្យឆ្នាំទី២ តុញ សុខកន្និដា ជាអតីតសិស្សថ្នាក់ទី ១២ក នៃវិទ្យាល័យជាស៊ីមតាកែវបានប្រាប់ថា ថ្ងៃទី១៤ នោះ ជាថ្ងៃអាទិត្យ នាងចង់អញ្ជើញឪពុកម្ដាយព្រមទាំងប្អូនស្រីម្នាក់ទៅហូបអាហារជុំគ្នានៅហាងស៊ុបមួយកន្លែងនៅខាងត្បូងផ្សាតាកែវ ព្រោះខានញាំបាយជាមួយប៉ាម៉ាក់ជុំគ្នាយូរហើយ។ កន្និដ្ឋា បាននិយាយថា៖ "គាប់ជួនថ្ងៃនោះជាថ្ងៃបុណ្យនៃក្ដីស្រលាញ់ទៀត ធ្វើឲ្យនាងខ្ញុំផុសចេញនូវអារម្មណ៍ស្រលាញ់ប៉ាម៉ាក់កាន់តែខ្លាំង"។
បង្ហាញពីចំណាប់អារម្មណ៍របស់ខ្លួនជាមួយ Sabay កញ្ញា អែម ពេជ្រចន្ទ័បរមី សិស្សថ្នាក់ទី ១១ច បានបញ្ចេញយោបល់ផ្ទាល់ខ្លួនថា "ចំពោះនាងខ្ញុំគិតថា ក្នុងឱកាសបុណ្យនៃក្ដីស្រលាញ់ នាងខ្ញុំបានត្រៀមកាដូដល់ប៉ាម៉ាក់រួចហើយ តែពេលនេះមិនទាន់ឲ្យពួកគាត់ដឹងទេ ដើម្បីឲ្យគាត់មានការភ្ញាក់ផ្អើលនៅថ្ងៃនោះតែម្ដង។ កញ្ញាបន្ថែមថា “នាងខ្ញុំមិនបានគិតគូរដើរលេងពពាក់ពពូនជាមួយមិត្តភ័ក្ដិប្រុសស្រីនោះទេ មនុស្សជាទីស្រលាញ់របស់ខ្ញុំគឺប៉ាម៉ាក់និងក្រុមគ្រួសារ”។
កំពុងតែផ្ដោតអារម្មណ៍ជាមួយការធ្វើតេស្តភាសាអង់គ្លេស កញ្ញា កា ទឺមរស្មីចន្ទ័ សិស្សថ្នាក់ទី១០ក បានឆ្លៀតផ្ដល់សម្ភាសន៍ជាមួយSabayថា នាងនឹងធ្វើនំ Cakeម្យ៉ាង ព្រមទាំងមានបាច់ផ្កាកូលាបជូនប៉ាម៉ាក់ដើម្បីអោយពួកគាត់សប្បាយរីករាយនៅថ្ងៃនោះ។
តាមរបាយការណ៍មួយរបស់អង្គការក្រៅរដ្ឋាភិបាលបានឲ្យដឹងថា នៅឆ្នាំ២០១៣ កន្លងទៅមានយុវវ័យចំនួន១២,៤% បានលះបង់ខ្លួនប្រាណទៅឲ្យគូស្នេហ៍នៅថ្ងៃបុណ្យនៃក្តីស្រលាញ់នេះ។ តើយុវវ័យនៅខេត្តតាកែវយើងគួរធ្វើខ្លួនបែបណា? អត្ថបទ៖ ជិន វេន
មានអត្ថបទថ្មី និង ប្លែកៗ កើតមានគ្រប់ទីកន្លែង ប្រិយមិត្តចង់រាយការណ៍ ឬ ចង់ឲ្យ Sabay ចុះផ្សាយ សូមទំនាក់ទំនងតាម៖
-លេខទូរសព្ទ៖ 099 588 880
-អ៊ីមែល៖ bin.bunna@cidc.com.kh
ចង់ដឹងលក្ខខណ្ឌដើម្បីសរសេរផ្ញើមកកាន់ Sabay បានសូមចុចត្រង់នេះ!