ម្ចាស់ផលិតអំពូលដំបូងគេ Thomas ធ្លាប់យំច្រើនម៉ោងពេលអានសំបុត្រមួយច្បាប់

2016-11-03 16:55:13
ការអប់រំ

2016-11-03 16:55:13
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Thomas Edison ជាអ្នកបង្កើតអំពូលដំបូងគេដ៏ល្បីឈ្មោះជនជាតិអាមេរិក កើតនៅថ្ងៃទី១១កុម្ភៈឆ្នាំ ១៨៤៧ នៅទីក្រុង Milan រដ្ឋ Ohio ក្នុងគ្រួសារក្រីក្រតោកយាក និងស្លាប់នៅថ្ងៃទី១៨តុលាឆ្នាំ ១៩៣១ នៅទីក្រុង West Orange រដ្ឋ New Jersey។

លោកបានបង្កើតឧបករណ៍ប្រើប្រាស់ប្រចាំថ្ងៃជាច្រើនប្រភេទសម្រាប់មនុស្សជាតិបច្ចុប្បន្នរួមមានម៉ាស៊ីនថតសំឡេង កាមេរ៉ាថតរូប និងអំពូលពងមាន់។ ពេលនេះសូមលើកយកបទពិសោធន៍មួយរបស់ Thomas កាលនៅក្មេងដែលធ្វើឲ្យគាត់សម្រក់ទឹកភ្នែកដោយភាពឈឺចាប់។

ថ្ងៃមួយលោក Thomas បានចេញពីសាលារៀន និងហុចក្រដាសមួយច្បាប់ឲ្យម្ដាយ។ លោកគ្រូបានឲ្យក្រដាសនេះដោយប្រាប់ថា "យករបស់នេះទុកឲ្យម្ដាយឯងទៅ"។

ពេល Thomas មកដល់ផ្ទះក៏ហុចក្រដាសឲ្យម្ដាយតាមបណ្ដាំគ្រូ។ ម្ដាយរបស់ Thomas បានទទួល រួចបើកមើលដល់ចប់ ស្រាប់តែទឹកមុខគាត់ប្រែជាក្រហម និងទឹកភ្នែកស្រក់ហូរតែម្ដង។ ដោយសារខ្លួននៅតូចមិនទាន់ចេះអានអក្សរច្រើន Thomas បានសួរម្ដាយរបស់ខ្លួនថា "ម៉ែ! តើគេចង់និយាយអំពីអ្វីក្នុងក្រដាសហ្នឹង"?

ម្ដាយបានអានសំបុត្រនោះឮៗឲ្យកូនប្រុសស្ដាប់ "កូនប្រុសអ្នកជាសិស្សមានទេពកោសល្យម្នាក់។ សាលានេះតូចណាស់ យើងមិនមានធនធានគ្រប់គ្រាន់ និងគ្រូល្អៗសម្រាប់បង្រៀនកូនទេ។ សូមអ្នកជាម្ដាយបង្រៀនកូនដោយខ្លួនឯងផង"។

អស់រយៈពេលជាច្រើនឆ្នាំកន្លងផុតទៅ ម្ដាយរបស់ Thomas បានទទួលមរណភាព ហើយគាត់បានក្លាយជាច្នៃប្រឌិតបង្កើតរបស់ថ្មីដ៏អស្ចារ្យម្នាក់។ ថ្ងៃមួយ Thomas បានរកមើលរបស់ចាស់ៗនៅក្នុងផ្ទះដែលធ្លាប់រស់នៅតាំងពីតូច គាត់បានប្រទះឃើញក្រដាសឆ្មូលជាដុំនៅជ្រុងថតតុរបស់គាត់។ គាត់ក៏បានរើសយកមកអានភ្លាមៗ។

ក្នុងក្រដាសនោះសរសេរថា "កូនប្រុសរបស់អ្នកមានជំងឺសតិអារម្មណ៍ យើងមិនអាចឲ្យគេរៀននៅសាលានេះបន្តទៀតឡើយ"។ នេះជាក្រដាសតែមួយដែលគ្រូបានឲ្យ Thomas ជូនម្ដាយកាលនៅតូច។

ក្រោយអានចប់ Thomas បានអង្គុយយំតូចចិត្តអស់ពេលជាច្រើនម៉ោង និងបានសរសេរជាកំណត់ហេតុទុកប្រចាំជីវិតគាត់ដែរ។ ទោះជាបែបនេះ Thomas បានក្លាយជាបុគ្គលល្បីលើពិភពលោកដែលបានរកឃើញវិធីផលិតអំពូលភ្លើងបំភ្លឺមុនគេបំផុតក្នុងប្រវត្តិសាស្ត្រ៕

តម្លៃអប់រំ៖ មនុស្សម្នាក់ដែលមិនព្រមបោះបង់អ្វីខ្លួនចង់ធ្វើ។ យើងត្រូវតែជឿជាក់លើខ្លួនឯង និងត្រូវដើរទៅមុខជានិច្ច ដោយប្រកាន់ខ្ជាប់ឥរិយាបថវិជ្ជមាន និងប្រឹងប្រែងឲ្យអស់សមត្ថភាពដែលខ្លួនមាន។