- 2017-01-04 07:42:00
- ព័ត៌មាន
តំបន់ទេសចរណ៍ទាំង៥ ដែលភ្ញៀវអន្តរជាតិសម្រុកទៅលេងនៅសៀមរាបក្នុងឆ្នាំ២០១៦
- 2017-01-04 07:42:00
- ចំនួនមតិ 0 | ចំនួនចែករំលែក 0
តំបន់ទេសចរណ៍ទាំង៥ ដែលភ្ញៀវអន្តរជាតិសម្រុកទៅលេងនៅសៀមរាបក្នុងឆ្នាំ២០១៦
ចន្លោះមិនឃើញ
ខេត្តសៀមរាបគឺជាទឹកដីដ៏ពិសិដ្ឋមួយសម្រាប់ប្រជាជនកម្ពុជាទាំងមូល និង ត្រូវបានចាត់ទុកជាគោលដៅទេសចរមួយដ៏សំខាន់សម្រាប់ភ្ញៀវទេសចរអន្តរជាតិទៀតផង។ បើតាមការលើកឡើងរបស់ លោក លី សែ នាយកប្រតិបត្តិគ្រឹះស្ថានអង្គរបានរៀបរាប់ថា ទេសចរអន្តរជាតិបានសម្រុកទៅលេងខ្លាំងនៅកន្លែងចំនួន៥នៃខេត្តសៀមរាបមានដូចជា៖
១. អង្គរវត្ត និង ក្រុមប្រាសាទ អង្គរធំ
លោក លី សែ បានបញ្ជាក់ថា ប្រាសាទអង្គរវត្តគឺជាសំណង់សាសនាដ៏ធំជាងគេលើពិភពលោក ដែលទេសចរណ៍គ្រប់រូបចាប់អារម្មណ៍បំផុត ព្រោះតែប្រាសាទមួយនេះពោរពេញទៅដោយភាពស្រស់ស្អាត បានបង្ហាញពីវប្បធម៌ អរិយធម៌ ដ៏អស្ចារ្យរបស់ជនជាតិខ្មែរ។ មិនតែប៉ុណ្ណោះ ក្រុមប្រាសាទនានាដែលស្ថិតនៅក្នុងបរិវេណអង្គរធំ ឬប្រាសាទបាយ័នក៏ជាទីកន្លែងសំខាន់សម្រាប់ភ្ញៀវទេសចរ និង អ្នកសិក្សាស្រាវជ្រាវផងដែរ។
២. ភូមិលិចទឹកជុំវិញបឹងទន្លេសាប
តំបន់ទេសចរណ៍បែបធម្មជាតិមួយនេះកំពុងតែទទួលបានប្រជាប្រិយភាពយ៉ាងខ្លាំងពីសំណាក់ភ្ញៀវទេសចរអន្តរជាតិ។ នៅទីនោះ ទេសចរណ៍រីករាយនឹងការទស្សនាហ្វូងសត្វស្លាប ព្រៃលិចទឹក និង ស្វែងយល់ពីជីវិតរស់នៅលើទឹករបស់ប្រជាជនក្នុងតំបន់នោះផងដែរ។
៣. ប្រាសាទបឹងមាលា
ប្រាសាទបឹងមាលាគឺជាប្រាសាទបុរាណមួយដែលមានសម្រស់ស្អាត ប្លែក មានរចនាបថពិសេស និង ពោរពេញដោយធម្មជាតិស្រស់បំព្រងទាក់ទាញភ្នែកភ្ញៀវទេសចរយ៉ាងខ្លាំង។ ហើយក៏មានអ្នកទេសចរដែលនិយមថតរូបបែបសិល្បៈនៅប្រាសាទមួយនេះផងដែរ។
៤. ភ្នំគូលែន
ភ្នំគូលែនគឺជាអតីតរាជធានីខ្មែរសម័យបុរាណ ហើយជាភ្នំមួយដែលពោរពេញទៅដោយភាពត្រជាក់ត្រជំ និង អារម្មណ៍ស្រស់ស្រាយសម្រាប់ភ្ញៀវទេសចរណ៍ដែលបានទៅទីនោះ។ លើសពីនេះទៅទៀត ចម្លាក់ក្រោមទឹកនៃទឹកជ្រោះភ្នំគូលែនមានលក្ខណៈថ្លា ត្រជាក់ ប្រៀបបានដូចជាទឹកមន្តសម្រាប់ ប្រោះព្រំអោយមានសិរីសួស្ដីដល់ភ្ញៀវទេសចរណ៍គ្រប់រូបផងដែរ។
៥. ភូមិវប្បធម៌
ភូមិវប្បធម៌គឺជារមណីយដ្ឋានវប្បធម៌មួយដ៏សំខាន់របស់ខេត្តសៀមរាប ដែលមានការដាក់តាំងនូវស្នាដៃសិល្បៈនានា ជាពិសេសទាក់ទងនឹងប្រវត្តិសាស្ត្ររបស់ប្រទេសកម្ពុជា។ ហើយអ្វីដែលភ្ញៀវទេសចរអន្តរជាតិមិនអាចបំភ្លេចបាននោះ គឺការសំដែងសិល្បៈនានានៅទីនោះ ដែលប្រកបដោយភាពប៉ិនប្រសប់ និងបង្ហាញអំពីវប្បធម៌ខ្មែរដ៏ល្អផូរផង់ផងដែរ។
ក្រៅពីគោលដៅទេសចរណ៍ទាំង៥ខាងលើ លោកលី សែបានបញ្ជាក់ថាពេលរាត្រី ទេសចរភាគច្រើនបានចំណាយពេលដើរលេងនៅក្នុងក្រុងសៀមរាបវិញម្ដង ដូចជាទស្សនា និង ទិញទំនិញនៅផ្សាររាត្រី ការញ៉ាំអាហារប៊ូហ្វេក្នុងតម្លៃត្រឹមតែ៥ ទៅ ៧ដុល្លារ ស្ដាប់ភ្លេង និង ក្រេបស្រានៅ Pub Street ជាដើម៕