- 2017-03-22 07:25:08
- ការអប់រំ
វិធីសាស្រ្តទាំង៧ អាចជួយឲ្យសិស្សរៀនគណិតវិទ្យាឆាប់ចេះ និងឆាប់យល់
- 2017-03-22 07:25:08
- ចំនួនមតិ 0 | ចំនួនចែករំលែក 0
វិធីសាស្រ្តទាំង៧ អាចជួយឲ្យសិស្សរៀនគណិតវិទ្យាឆាប់ចេះ និងឆាប់យល់
ចន្លោះមិនឃើញ
ជាការពិតណាស់គណិតវិទ្យាគឺជាមុខវិជ្ជាវិទ្យាសាស្ត្រពិតមួយដែលសិក្សាអំពីលេខនព្វន្ត ការគណនា ការវិភាគជាដើម។ អ្វីដែលគួរអោយចាប់អារម្មណ៍នោះគឺមុខវិជ្ជាមួយនេះមានការលំបាកខ្លាំង សម្រាប់សិស្សានុសិស្ស និង និស្សិតភាគច្រើន។ លោក សួន ច័ន្ទសុធី ជានិស្សិតឆ្នាំទី៤នៃដេប៉ាតឺម៉ង់គណិតវិទ្យារបស់សកលវិទ្យាល័យភូមិន្ទភ្នំពេញបានអោយដឹងថា មានវិធីសាស្ត្រមួយចំនួនដើម្បីអោយសិស្សអាចរៀនគណិតវិទ្យាងាយឆាប់ចេះ និង ឆាប់យល់បាន៖
១ រៀនអោយច្បាស់ពីមូលដ្ឋានគ្រឹះពីថ្នាក់ក្រោម
និស្សិតផ្នែកគណិតវិទ្យារូបនេះ ពោលថាការរៀនច្បាស់ពីមូលដ្ឋានគ្រឹះនៃគណិតវិទ្យាពីថ្នាក់ក្រោមមក គឺជាទុនយ៉ាងសំខាន់ក្នុងការយកវាទៅប្រើប្រាស់ និង រៀនអោយបានស៊ីជម្រៅនៅថ្នាក់លើយ៉ាងប្រាកដ។ ដូចនេះការសិក្សាគណិតវិទ្យាគឺជាការសិក្សារយៈពេលវែង ដែលទាមទារអោយសិស្សត្រូវវិនិយោគតាំងពីថ្នាក់តូចៗមកម្ល៉េះ។
២ ស្រលាញ់ និង មានចិត្តតស៊ូ
ចំពោះអ្នកដែលរៀនពូកែខាងមុខវិជ្ជានេះ ភាគច្រើនគឺជាមនុស្សដែលស្រលាញ់គណិតវិទ្យាផ្ទាល់តែម្ដង ដោយមិនមែនគ្រាន់តែរៀនលេងៗនោះទេ។ មួយវិញទៀតពួកគេជាប្រភេទមនុស្សដែលតស៊ូ មិនបោះបង់ចោលនោះឡើយ ទោះបីប្រឈមនឹងការដោះស្រាយចម្លើយនៃលំហាត់មិនចេញក្ដី។
៣ ទន្ទេញតែរូបមន្តសំខាន់ៗមួយចំនួនបានហើយ
ជាការពិតណាស់ ដែលថាសិស្សភាគច្រើនចូលចិត្តទន្ទេញរូបមន្តគណិតវិទ្យាទាំងគរៗ ប៉ុន្តែការធ្វើបែបនេះគឺគ្រាន់តែអាចអោយពួកគេចងចាំបានរយៈពេលខ្លីប៉ុណ្ណោះ។ អ្វីដែលសំខាន់គឺសិស្សត្រូវទន្ទេញតែរូបមន្តណាដែលសំខាន់ៗ និង ប្រើប្រាស់ញឹកញាប់បានហើយ។ បន្ទាប់មកព្យាយាមធ្វើលំហាត់អោយបានច្រើន នោះច្បាស់ជាចាំរូបមន្តឯកឯងមិនខាន។
៤ រៀនគណិតវិទ្យាជាក្រុម
តាមរយៈបទពិសោធន៍ផ្ទាល់ខ្លួន លោក សុធីបាននិយាយថាការរៀនគណិតវិទ្យាគឺតម្រូវអោយមានសមាធិ មានអារម្មណ៍ស្ងប់ស្ងាត់ទើបអាចផ្ដោតទៅលើការរៀន និង គិតស៊ីជម្រៅលើការដោះស្រាយលំហាត់បាន។ ប៉ុន្តែបើធៀបគ្នារវាងរៀនម្នាក់ឯង និង រៀនជាក្រុមវិញ លោកបានផ្ដល់យោបល់ថា ការរៀនជាក្រុមមានលក្ខណៈល្អប្រសើរជាង។ ជាធម្មតា ការរៀនជាក្រុមតែងមានគំនិតល្អៗច្រើនដែលចេញពីមនុស្សម្នាក់ៗ ហើយពេលដែលសមាជិកម្នាក់មិនអាចស្វែងរកដំណោះស្រាយឃើញ នោះមានមិត្តភក្តិក្នុងក្រុមអាចជួយបង្ហាញផ្លូវដោះស្រាយបាន។
៥ ចែកម៉ោងរៀនអោយបានច្បាស់
នៅក្នុងមុខជំនាញគណិតវិទ្យាមួយតែងបែងចែកជាមុខវិជ្ជាផ្នែកៗជាច្រើនទៀត ដែលមានដូចជាពីជគណិត គណិតវិភាគ ការគណនា ធរណីមាត្រជាដើម។ ដូចនេះគេមិនត្រូវរៀនវាទាំងអស់ច្របល់ចូលគ្នាក្នុងពេលតែមួយនោះឡើយ អ្វីដែលល្អគឺការបែបចែកពេលវេលា ថាថ្ងៃនេះគួររៀនផ្នែកមួយណា ហើយថ្ងៃស្អែករៀនផ្នែកមួយណា។ សម្រាប់សុធីផ្ទាល់គឺពេលយប់ ជាពេលដែលល្អសម្រាប់ការរៀន ព្រោះមានអារម្មណ៍ស្ងប់ស្ងាត់ និង មានពេលច្រើនដើម្បីគិតអោយបានស៊ីជម្រៅ។
៦ រៀនធ្វើលំហាត់តូចៗអោយចេះជាមុនសិន
បើតាមការយល់ឃើញរបស់សុធី បានបង្ហាញថា សិស្សភាគច្រើនចូលចិត្តធ្វើលំហាត់តាមវិញ្ញាសាប្រឡងនានាដែលធ្លាប់ចេញនាពេលមុនៗ ប៉ុន្តែមិនបានឆ្លងកាត់ការធ្វើលំហាត់តូចៗជាមុនសិននោះឡើយ។ ប្រការនេះគឺមិនអាចអោយគាត់អាចរៀនចេះគណិតវិទ្យានោះឡើយ គឺគ្រាន់តែជាការរៀនអោយបានប្រឡងជាប់ប៉ុណ្ណោះ។ លោកបន្តថា កាលណាគេយល់ពីលំហាត់តូចៗនៅតាមមេរៀនរួចសិន ទើបគេអាចឆ្ពោះទៅធ្វើវិញ្ញាសាប្រឡងជាក្រោយ នោះទើបជាការត្រឹមត្រូវ។
៧ ចេះស្រាវជ្រាវតាមអ៊ីនធឺណិត
បច្ចុប្បន្នដោយសារតែបច្ចេកវិទ្យាព័ត៌មានវិទ្យាមានការរីកចម្រើនខ្លាំង ដូចនេះវាបានបង្កភាពងាយស្រួលសម្រាប់សិស្សនិស្សិតក្នុងការរៀនគណិតវិទ្យាតាមប្រព័ន្ធអនឡាញ ដូចជាវេបសាយគណិតវិទ្យាល្អៗ Facebook Group ដែលមានសមាជិកជាអ្នកគណិតវិទ្យា និង អាចស្វែងរកវីដេអូតាមYoutube ស្ដីពីការបង្រៀនដោះស្រាយលំហាត់ថែមទៀតផង។