- 2017-09-18 02:09:51
- សេដ្ឋកិច្ច
កសិករជាង ៣ពាន់គ្រួសារ នៅខេត្តព្រះវិហារទទួលបានចំណូលជាក់លាក់ពីកិច្ចសន្យាកសិកម្មលើដំណាំស្រូវសរីរាង្គជាមួយក្រុមហ៊ុន នាំចេញអង្ករអេមរុ៍រ៉ាយ
- 2017-09-18 02:09:51
- ចំនួនមតិ 0 | ចំនួនចែករំលែក 0
កសិករជាង ៣ពាន់គ្រួសារ នៅខេត្តព្រះវិហារទទួលបានចំណូលជាក់លាក់ពីកិច្ចសន្យាកសិកម្មលើដំណាំស្រូវសរីរាង្គជាមួយក្រុមហ៊ុន នាំចេញអង្ករអេមរុ៍រ៉ាយ
ចន្លោះមិនឃើញ
ទោះបីជាកម្ពុជាមានអង្ករក្រអូបសម្រាប់នាំចេញទៅកាន់ទីផ្សារអ៊ឺរ៉ុប និងអាមេរិកក្ដី ក៏ប៉ុន្ដែយើងត្រូវប្រកួតប្រជែងខ្លាំងជាមួយប្រទេសនាំចេញ ដែលមានលទ្ធភាពខ្លាំងជាងយើង ជាក់ស្ដែងដូចជាប្រទេសថៃ និងឥណ្ឌាជាដើម។ ដូច្នេះយើងត្រូវពង្រឹងការនាំចេញអង្ករសរីរាង្គទៅកាន់ប្រទេសទាំងនោះវិញ ដែលយើងអាចមានលទ្ធភាពខ្ពស់ក្នុងការប្រកួតប្រជែង។ នេះបើតាមការឲ្យដឹងរបស់លោក សុង សារ៉ន នាយកក្រុមហ៊ុននាំចេញ អង្ករអេមរុ៍រ៉ាយស៍។
លោកសារ៉ន បានឲ្យដឹងថា ក្រុមហ៊ុនអេមរុ៍ បានចុះកិច្ចសន្យាជាមួយសហគមន៍កសិកម្មក្នុងខេត្តព្រះវិហារលើការដាំដុះស្រូវសរីរាង្គតាំងពីឆ្នាំ ២០១៣មកម្ល៉េះ ដោយកាលណោះក្រុមហ៊ុនទទួលបានការផ្គត់ផ្គង់ស្រូវសរីរាង្គពីកសិករត្រឹមតែជាង ១០០តោនប៉ុណ្ណោះ។
នាយកក្រុមហ៊ុន រូបនេះបន្ថែមថា សម្រាប់ឆ្នាំ២០១៧ ក្រុមហ៊ុនបានបង្កើនការចុះកិច្ចសន្យាកសិកម្មលើដំណាំស្រូវសរីរាង្គជាមួយសហគមន៍កសិកម្មសរុបចំនួន ២៤ គិតជាផ្ទៃដាំដុះប្រមាណជាង ១ម៉ឺនហិកតា គ្របដណ្ដប់ទៅលើស្រុកទាំង ៧ក្នុងខេត្តព្រះវិហារ និងអាចផ្ដល់នូវទិន្នផលស្រូវសរីរាង្គបានជាង ២២ ៥០០តោន។ លោកថា សម្រាប់កិច្ចសន្យានេះគឺមានកសិករប្រមាណជាង ៣ពាន់គ្រួសារដែលទទួលបានការធានាទិញទិន្នផលស្រូវសរីរាង្គរបស់ពួកគាត់ក្នុងតម្លៃខ្ពស់ជាងទីផ្សារ។
លោក សារ៉ន បញ្ជាក់ថា កិច្ចសន្យាកសិកម្មលើការដាំដុះស្រូវសរីរាង្គ ផ្ដោតសំខាន់ទៅលើការព្រមព្រៀងរវាងសហគមន៍កសិកម្ម ជាមួយនឹងក្រុមហ៊ុន ក្នុងការដាំដុះដំណាំស្រូវដែលគ្មានប្រើប្រាស់ជីគីមី និងស្របទៅតាមបទដ្ឋានបច្ចេកទេសត្រឹមត្រូវ ដោយក្រុមហ៊ុនជាអ្នកធានាទិញក្នុងតម្លៃគោល និងមានប្រាក់បុព្វលាភបន្ថែម។
តាមរយៈកិច្ចសន្យាដែលបានធ្វើឡើងរួមគ្នារវាងសហគមន៍កសិកម្ម និងក្រុមហ៊ុនអេមរុ៍រ៉ាយស៍ បានចែងរួចជាស្រេចអំពីតម្លៃគោលដែលត្រូវកំណត់ ១០៥០រៀលក្នុងមួយគីឡូក្រាម សម្រាប់ស្រូវសរីរាង្គមានគុណភាពល្អ និងតម្លៃបុព្វលាភចន្លោះពី ២៧០រៀល ទៅ៣០០រៀលក្នុងមួយគីឡូក្រាមបន្ថែមទៀត។ ដូច្នេះស្រូវសរីរាង្គមានគុណភាពល្អអាចមានតម្លៃរហូតដល់១៤០០រៀលក្នុងមួយគីឡូក្រាម ខណៈដែលទីផ្សារទូទៅមានតម្លៃប្រមាណ១១០០រៀលប៉ុណ្ណោះក្នុងមួយគីឡូក្រាម និងឡើងចុះទៅតាមមាត់ឈ្មួញទៀតនោះ។
លោក ប៉ោ សុវ៉ាត ប្រធានសហគមន៍កសិកម្មសាមគ្គីរហ័សមានជ័យ ស្ថិតនៅក្នុងស្រុករវៀង ខេត្តព្រះវិហារបានឲ្យដឹងថា សហគមន៍របស់លោកបានចុះកិច្ចសន្យាកសិកម្មលើការដាំដុះស្រូវសរីរាង្គជាមួយក្រុមហ៊ុនអេមរុរ៉ាយស៍ តាំងពីឆ្នាំ២០១៤មកម្ល៉េះ។ កាលពីឆ្នាំ២០១៦កន្លងទៅ សហគមន៍បានផ្គត់ផ្គង់ស្រូវសរីរាង្គសរុប ៣៤២តោនទៅឲ្យក្រុមហ៊ុនអេមរុរ៉ាយស៍ស្របតាមការចុះកិច្ចសន្យារួមគ្នា។ បច្ចុប្បន្នសហគមន៍ដែលមានសមាជិកសរុប ២៦០នាក់នេះ កំពុងពង្រីកផ្ទៃដីដាំដុះស្រូវសរីរាង្គដល់ជាង ៤០០ហិកតា ដើម្បីផ្គត់ផ្គង់ទៅឲ្យក្រុមហ៊ុនតាមកិច្ចសន្យាថ្មីបន្ថែមទៀត។
ថ្លែងស្រដៀងគ្នាដែរ លោកស្រី សៀង ប៉ូយ ប្រធានក្រុមប្រឹក្សាភិបាលសហគមន៍លើកកម្ពស់ស្ដ្រី ដែលបានចុះកិច្ចសន្យាក្នុងការដាំដុះ និងផ្គត់ផ្គង់ស្រូវសរីរាង្គប្រមាណ ៣ ៧០០តោន ឲ្យទៅក្រុមហ៊ុនអេមរុរ៉ាយស៍ក្នុងឆ្នាំ២០១៧ បានឲ្យដឹងថា សហគមន៍របស់លោកស្រីមិនមានការព្រួយបារម្ភឡើយពីការឡើងចុះតម្លៃស្រូវតាមទីផ្សារ ខណៈដែលបច្ចុប្បន្នសហគមន៍លោកស្រីបង្កើនផ្ទៃដីដាំដុះដល់ទៅ៣ពាន់ហិកតាក្ដី។ នោះក៏ដោយសារតែមានការធានាទិញជាក់លាក់ពីសំណាក់ក្រុមហ៊ុន។
គួរបញ្ជាក់ថា ខេត្តព្រះវិហារមានផ្ទៃដាំដុះស្រូវសរីរាង្គប្រមាណ ១៥ ០០០ហិកតា។ បើតាមលោក ពឹង ទ្រីដា ប្រធានមន្ទីរកសិកម្មខេត្តព្រះវិហារបានឲ្យដឹងថា មូលហេតុដែលក្រុមហ៊ុននាំចេញអង្ករសម្រេចចុះកិច្ចសន្យាកសិកម្មជាមួយសហគមន៍កសិកម្មក្នុងទឹកដីខេត្តព្រះវិហារ ដោយសារតែផ្ទៃដីខេត្តនេះមិនទាន់ទទួលរងនូវការប្រើប្រាស់ជីគីមី ហើយកសិករក៏មិនមានទម្លាប់ប្រើប្រាស់ ជីគីមីផងដែរ។