សាលាភូមិន្ទរដ្ឋបាលសង្ឃឹម ៥ឆ្នាំទៀតនឹងសម្រេចគោលដៅ Digital School

2019-08-05 05:17:30
ព័ត៌មាន

2019-08-05 05:17:30
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាភូមិន្ទរដ្ឋបាលមានមហិច្ឆតាចង់បង្កើតកម្មវិធីសិក្សា Digital School គឺការបណ្ដុះបណ្ដាលតាមអនឡាញ។ ការបង្រៀនតាមអនឡាញ ធ្វើឲ្យចំណេញពេល និងបណ្ដុះបណ្ដាលបានធនធានបានច្រើនបំពេញសេចក្ដីត្រូវការអ្នកទទួលសេវាបានទាន់ពេល។ យ៉ាងណាក៏ដោយការវិវឌ្ឍ នៃការបង្រៀនតាមបច្ចេកវិទ្យានេះ ត្រូវការពេល៥ឆ្នាំយ៉ាងតិច ដើម្បីសម្រេចបានតាមផែនការ ព្រោះនៅមានឧបសគ្គមួយចំនួនដែលត្រូវជម្រះ? តើអ្វីខ្លះជាឧបសគ្គ នៃការបង្កើត Digital School?

សូមចុចអាន៖ នាយកសាលាភូមិន្ទរដ្ឋបាល ជម្រះមន្ទិលសង្ស័យរឿងប្រឡងក្របខណ្ឌរដ្ឋ ទាល់តែមានខ្សែ និងមានលុយទើបជាប់

ឯកឧត្តម យក់ ប៊ុនណា នាយកសាលាភូមិន្ទរដ្ឋបាល បានប្រាប់ Sabay ថា សាលាពិតជាមានមហិច្ឆតាចង់បង្កើតកម្មវិធីសិក្សា Digital Shool ប៉ុន្ដែយើងត្រូវការពេលយ៉ាងតិច ៥ឆ្នាំទៀត។ "យើងទាមទារពេលវេលានៃការផ្លាស់ប្ដូរទម្លាប់នៃការបង្រៀនធម្មតាមកជាបង្រៀនតាមអនឡាញ"។

ឯកឧត្តម យក់ ប៊ុនណា នាយកសាលាភូមិន្ទរដ្ឋបាល បាន

ទោះយ៉ាងណា ឯកឧត្ដម យក់ ប៊ុនណា បានលើកឡើងថា សព្វថ្ងៃនេះសាលាភូមិន្ទរដ្ឋបាលបានចាប់ផ្ដើមបណ្ដើរៗហើយ គឺផ្ដើមពីការចុះឈ្មោះរៀនតាមអនឡាញ និងការប្រឡងតេស្តសមត្ថភាពតាមអនឡាញជាដើម។ កត្តាទាំងអស់នេះផ្ដើមឲ្យមានទម្លាប់ទាំងគ្រូផង និងអ្នកមកចង់ចូលរៀនផង។

ឆ្លើយតបនឹងសំណួរដែលមហាជនធ្លាប់លើកឡើងថា ការផ្ដល់សេវារបស់មន្រ្តីនៅថ្នាក់មូលដ្ឋានកន្លងមកនៅមិនទាន់ពេញចិត្តអ្នកទទួលសេវា ឯកឧត្តម យក់ ប៊ុនណា បានលើកឡើងថា រវាងអ្នកផ្ដល់សេវា និងអ្នកទទួលមិនងាយជួបគ្នានោះទេ។ មិនងាយជួបនៅត្រង់នេះចង់ពន្យល់ថា មន្ត្រីអ្នកផ្ដល់សេវាបានខិតខំយ៉ាងខ្លាំង ប៉ុន្តែការរំពឹងទុករបស់អ្នកទទួលសេវាកាន់តែខ្ពស់។

ឯកឧត្ដមបានពន្យល់យ៉ាងលម្អិតដូច្នេះថា «កាលណាអ្នកផ្ដល់សេវាដល់កម្រិតមួយ អ្នកទទួលសេវាដល់កម្រិត១ទៀត។ ពិបាកណាស់សេវារដ្ឋបាលផ្ដល់ឲ្យត្រូវតម្រូវការរំពឹងទុករបស់អ្នកប្រើប្រាស់សេវា ដោយសារសេចក្ដីរំពឹងទុកអ្នកប្រើប្រាស់សេវា គឺពីមួយពេលទៅមួយពេល មានការវិវឌ្ឈខ្ពស់ទៅៗ។ តែមន្ត្រីធ្វើការងាររដ្ឋបាល ត្រូវប្រឹងប្រែងជាប្រចាំមិនអាចនៅមួយកន្លែងបានឡើយទើបដេញតាមទាន់តម្រូវការរបស់អ្នកទទួល»។

នាយកសាលាភូមិន្ទរដ្ឋបាល បានបន្តទៀតថា «អ្នកធ្វើការងាររដ្ឋបាលត្រូវមានការវិវឌ្ឍទៅមុខជានិច្ចអភិវឌ្ឈន៍ខ្លួនជានិច្ច។ មន្ត្រីត្រូវអភិវឌ្ឍន៍សមត្ថភាពរបស់ខ្លួនជានិច្ចមិនអាចនៅមួយកន្លែងបានទេ ប៉ុន្តែថាឲ្យជួបគ្នារវាងអ្នកផ្ដល់ និងអ្នកទទួល ពិបាកឲ្យជួបគ្នា។ យ៉ាងណាខ្ញុំមានសុទិដ្ឋិនិយមថា ការប្រឹងប្រែងរបស់យើង គឺនឹងអាចធ្វើឲ្យស្ថានភាពកាន់តែប្រសើរពីមួយពេលទៅមួយពេល»។

ដើម្បីសម្រេចបាននូវការផ្ដល់សេវាឲ្យទាន់ពេល កម្មវិធីសិក្សា Digital Shcool គឺជាផ្នែកមួយទៀត ដើម្បីបណ្ដុះធនធានមនុស្សរបស់មន្ត្រី ឲ្យកាន់តែរឹងមាំ និងមានគុណភាព ស្របតាមតម្រូវការសព្វថ្ងៃនេះ។

សូមចុចអាន៖ នាយកសាលាភូមិន្ទរដ្ឋបាល៖ "អ្នកល្មើសវិន័យមិនអាចចរចាបាន ហើយប្រឈមបញ្ឈប់ពីការសិក្សា" (វីដេអូ)

កាលពីឆ្នាំ ២០១៥ សាលាភូមិន្ទរដ្ឋបាលបានបណ្ដុះបណ្ដាលធនធានមនុស្សប្រមាណជា ៣០០ទៅ៤០០នាក់។ បើគិតមកដល់បច្ចុប្បន្ននេះវិញ គឺបណ្ដុះបណ្ដាលបានរហូតដល់ជាង ៣ ០០០នាក់ ប៉ុន្តែតួលេខនេះនៅមិនទាន់គ្រប់តម្រូវការរបស់អង្គភាពស្ថាប័ន ដែលចង់បាននៅឡើយ គឺត្រូវបង្កើនចំនួនថែមទៀត។ នេះជាការលើកឡើងរបស់ ឯកឧត្ដម យក់ ប៊ុនណា។

ដូច្នេះការបង្រៀនតាមអនឡាញ ដែលរំពឹងថានឹងលេចជារូបរាងនៅអំឡុងឆ្នាំ ២០២៣ ខាងមុខ គឺជាផ្នែកមួយនៃការបង្កើនការបណ្ដុះបណ្ដាលដល់មន្ត្រីមួយចំនួនឲ្យកាន់តែមានគុណភាព ដើម្បីជាប្រយោជន៍ផ្ដល់សេវាដល់សាធារណជន។ ប៉ុន្តែកិច្ចការ នៃការធ្វើឲ្យសម្រេចបាននៅកម្មវិធីសិក្សាថ្មីនេះ ទាមទារពេលវេលា ដូចជាការផ្លាស់ប្ដូរទម្លាប់, កែទម្រង់រដ្ឋបាលសាធារណៈ, កែទម្រង់ការគ្រប់គ្រងហិរញ្ញវត្ថុសាធារណៈ, កែទម្រង់វិមជ្ឈការ និងសហវិមជ្ឈការ, និងកិច្ចការមួយចំនួនទៀត ដើម្បីឲ្យកម្មវិធីនេះកាន់តែប្រសើរឡើង។

"ខ្ញុំមានជំនឿថា មន្ត្រីរបស់យើងអាចទទួលយកការបណ្ដុះបណ្ដាល នៃការរៀនតាមអនឡាញនេះបាន ដោយសារតែសង្គមរបស់យើងបើកចំហបច្ចេកវិទ្យា ហើយលទ្ធភាព នៃការប្រើប្រាស់ប្រសើរជាងមុន ហើយរបៀបនៃការបង្រៀន ដោយឧទាហរណ៍ថា មុខវិជ្ជាមួយបង្រៀន ៦០ម៉ោង រៀននៅសាលា ហើយ៤០ម៉ោងរៀនតាមអនឡាញ ឬ៥០ម៉ោងនៅសាលា ៥០ម៉ោងអនឡាញ ជាដើម"។

អត្ថបទ៖ ប៊ិន ប៊ុណ្ណា